ແຈ້ງເຕືອນ ເຂື່ອນໄຟຟ້ານ້ຳງື່ມ 1 ຈະປ່ອຍນ້ຳ

206 13 ສ.ຫ. 2018 ຂ່າວໜ້າ​ໜຶ່ງ

    ອີງ​ຕາມ​ໜັງ­ສື​ສະ­ເໜີ​ຂອງ​ເຂື່ອນ​ໄຟ­ຟ້າ​ນ້ຳ​ງື່ມ 5 ເຂື່ອນ​ໄຟ­ຟ້າ​ນ້ຳ​ງື່ມ 2 ແລະ ອີງ­ໃສ່​ສະ­ພາບ​ປະ­ລິ­ມານ​ນ້ຳ​ໄຫຼ​ເຂົ້າ​ອ່າງ​ຕົວ​ຈິງ ແລະ ການ​ປະ​ເມີນ​ປະ­ລິ­ມານ​ນ້ຳ​ໄຫຼ​ເຂົ້າ​ອ່າງ​ຂອງ​ເຂື່ອນ​ໄຟ­ຟ້າ​ນ້ຳ​ງື່ມ 1 ແຕ່​ເດືອນ​ສິງ­ຫາ-ເດືອນ​ຕຸ­ລາ 2018.

    ບໍ­ລິ­ສັດ ຜະ­ລິດ-ໄຟ­ຟ້າ​ລາວ​ມະ­ຫາ­ຊົນ ຂໍ​ແຈ້ງ​ມາ​ຍັງ​ອຳ­ນາດ​ການ​ປົກ­ຄອງ​ທ້ອງ­ຖິ່ນ​ທຸກ​ຂັ້ນ ອົງ​ການ­ຈັດ­ຕັ້ງ​ທຸກ​ພາກ­ສ່ວນ ແລະ ພໍ່​ແມ່​ປະ­ຊາ­ຊົນ​ຊາບ​ທົ່ວ​ເຖິງ​ກັນ​ວ່າ: ເຂື່ອນ​ໄຟ­ຟ້າ​ນ້ຳ​ງື່ມ 1 ທີ່​ຕັ້ງ​ຢູ່​ທ່າ​ລາດ ເມືອງ​ແກ້ວ​ອຸ­ດົມ ແຂວງ​ວຽງ​ຈັນ ຈະ​ໄດ້​ເປີດ​ປະ­ຕູ​ນ້ຳ​ລົ້ນ ເພື່ອ​ລະ­ບາຍ​ນ້ຳ​ອອກ​ຈາກ​ອ່າງ ຈະ​ເລີ່ມ​ປ່ອຍ​ແຕ່​ວັນ​ທີ 15 ສິງ­ຫາ 2018 ເວ­ລາ​ປະ­ມານ 9:00 ໂມງ ເປັນ­ຕົ້ນ​ໄປ ເຊິ່ງ​ຈະ​ໄດ້​ເປີດ​ປະ­ຕູ​ນ້ຳ ຈຳ­ນວນ 4 ບານ ລວງ​ສູງ​ເປີດ 40 ຊັງ​ຕີ​ແມັດ ແລະ ຈະ​ມີ​ນ້ຳ​ໄຫຼ​ຜ່ານ​ປະ­ຕູ​ນ້ຳ​ລົ້ນ​ທັງ​ໝົດ 148.449 ແມັດ​ກ້ອນ​ຕໍ່​ວິ­ນາ­ທີ ຈະ​ເຮັດ​ໃຫ້​ລະ­ດັບ​ນ້ຳ​ໃຕ້​ເຂື່ອນ ແລະ ຕາມ​ລຳ​ແມ່­ນ້ຳ​ງື່ມ​ເພີ່ມ​ຂຶ້ນ​ປະ­ມານ 5-10 ຊັງ​ຕີ​ແມັດ ແຕ່​ຈະ​ບໍ່​ສົ່ງ​ຜົນ​ກະ­ທົບ​ຕໍ່​ພໍ່​ແມ່​ປະ­ຊາ­ຊົນ​ທີ່​ອາ­ໄສ​ຢູ່​ຕາມ​ລ້ອງ​ນ້ຳ​ງື່ມ ເນື່ອງ​ຈາ​ກວ່າ​ຍັງ​ເປັນ​ໄລ­ຍະ​ຕົ້ນ​ລະ­ດູ­ຝົນ ຄາດ​ວ່າ​ຍັງ​ຈະ​ມີ​ພາ­ຍຸ ແລະ ຝົນ­ຕົກ​ໜັກ​ໃນ​ໄລ­ຍະ​ເດືອນ ສິງ­ຫາ-ເດືອນ​ກັນ­ຍາ 2018 ດັ່ງ­ນັ້ນ ຈຶ່ງ​ແຈ້ງ​ມາ​ເພື່ອ​ຊາບ​ໃຫ້​ບັນ­ດາ​ເມືອງ ບ້ານ ແລະ ປະ­ຊາ­ຊົນ​ທີ່​ອາ­ໄສ​ຢູ່​ຕາມ​ແຄມ​ແມ່­ນ້ຳ​ງື່ມ​ທີ່​ເຮັດ​ທຸ­ລະ​ກິດ ທຳ​ການ​ຜະ­ລິດ ກະ­ສິ­ກຳ ແລະ ກິດ­ຈະ­ກຳ​ອື່ນໆ​ຢູ່​ໃນ​ພື້ນ​ທີ່​ຮາບ​ຕ່ຳ​ທີ່​ນ້ຳ​ອາດ​ຈະ​ຖ້ວມ ຈົ່ງ​ພາ­ກັນ​ເອົາ­ໃຈ­ໃສ່​ເກັບ​ມ້ຽນ ຮັກ­ສາ ແລະ ຄຸ້ມ​ຄອງ​ເຮືອນ​ຊານ ຊົນ­ລະ­ປະ­ທານ ເຮືອນ​ແພ ຮ້ານ​ອາ­ຫານ ກະ­ຊັງ​ປາ ສັດ­ລ້ຽງ ວັດ­ຖຸ-ສິ່ງ​ຂອງ ແລະ ອື່ນໆ ໃຫ້​ມີ​ຄວາມ​ປອດ​ໄພ​ດ້ວຍ.

ຂ່າວທີ່ກ່ຽວຂ້ອງ