ຂ່າວຫຼ້າສຸດ

ສະຖານີຜະລິດແນວພັນປານ້ຳຫຸມ ຜະລິດລູກປາໄດ້ລ້ານໂຕຕໍ່ເດືອນ

129 13 ສ.ຫ. 2018 ຂ່າວໜ້າ​ໜຶ່ງ
ສະຖານີຜະລິດແນວພັນປານ້ຳຫຸມ ຜະລິດລູກປາໄດ້ລ້ານໂຕຕໍ່ເດືອນ

    ສະ­ຖາ­ນີ​ຜະ­ລິດ​ແນວ​ພັນ​ປາ​ນ້ຳ​ຫຸມ ເປັນ​ໂຄງ­ການ​ຮ່ວມ​ມື​ລະ­ຫວ່າງ​ລັດ­ຖະ­ບານ​ລາວ ແລະ ລັດ­ຖະ­ບານ​ຮົງ​ກາ­ລີ ຈັດ​ຕັ້ງ​ປະ­ຕິ­ບັດ​ໂດຍ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ  ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ວິ­ຊາ​ການ​ຈາກ​ບໍ­ລິ­ສັດ ພັດ­ທະ­ນາ​ການ​ປະ­ມົງ ຈຳ­ກັດ (ຕາງ­ໜ້າ​ໃຫ້​ລັດ­ຖະ­ບານ​ຮົງ​ກາ­ລີ) ເພື່ອ​ຜະ­ລິດ​ລູກ​ປາ​ສະ­ໜອງ​ໃຫ້​ຊາວ​ກະ­ສິ­ກອນ​ໄດ້​ພຽງ­ພໍ​ຕາມ​ຄວາມ​ຕ້ອງ­ການ ທັງ​ເປັນ​ການ​ຫຼຸດ­ຜ່ອນ​ການ​ນຳ​ເຂົ້າ​ລູກ​ປາ​ຈາກ​ຕ່າງ­ປະ­ເທດ.

    ທ່ານ ແຟ​ເຣນ​ເລ​ວໍ​ອິ ຜູ້​ຈັດ­ການ​ທົ່ວ​ໄປ​ບໍ­ລິ­ສັດ ພັດ­ທະ­ນາ​ການ​ປະ­ມົງ ຈຳ­ກັດ ໄດ້​ໃຫ້​ສຳ­ພາດ ວັນ​ທີ 8 ສິງ­ຫາ 2018 ວ່າ: ສະ­ຖາ­ນີ​ຜະ­ລິດ​ແນວ​ພັນ​ປາ​ນ້ຳ​ຫຸມ ມີ​ສະ­ຖານ­ທີ່​ຕັ້ງ​ຢູ່​ບ້ານ​ນ້ຳ​ຫຸມ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ໂຄງ­ການ​ໄດ້​ຜະ­ລິດ​ລູກ​ປາ ໂດຍ​ສະ­ເພາະ ລູກ​ປາ​ນິນ ໃນ 2 ສາຍ​ພັນ ຄື: ສາຍ​ພັນ​ຈຳ​ໂບ້ ແລະ ສາຍ​ພັນ​ຈິນ​ລະ­ດາ  ເພື່ອ​ສະ­ໜອງ​ໃຫ້​ຊາວ​ກະ­ສິ­ກອນ​ໄດ້​ໄປ​ລ້ຽງ​ເປັນ​ສິນ­ຄ້າ ໂຄງ­ການ​ນີ້​ໄດ້​ຈັດ​ຕັ້ງ​ມາ​ແຕ່​ປີ 2014 ໃນ​ເນື້ອ­ທີ່ 5,5 ເຮັກ­ຕາ ປັດ­ຈຸ­ບັນ​ມີ​ທັງ​ໝົດ 13 ໜອງ ມີ​ພໍ່​ແມ່​ພັນ​ປາ​ທັງ​ໝົດ 2 ໂຕນ ສະ­ເລ່ຍ​ເດືອນ​ໜຶ່ງ​ສາ­ມາດ​ຜະ­ລິດ​ລູກ​ປາ​ສະ­ໜອງ​ໃຫ້​ຊາວ​ກະ­ສິ­ກອນ​ໄດ້​ປະ­ມານ 1 ລ້ານ​ໂຕ​ຕໍ່​ເດືອນ ຈຳ­ໜ່າຍ​ໃນ​ລາ­ຄາ 110-130 ກີບ​ຕໍ່​ໂຕ ຖ້າ​ຊື້​ຈຳ­ນວນ​ຫຼາຍ​ທາງ​ບໍ­ລິ­ສັດ​ບໍ­ລິ­ການ​ສົ່ງ​ເຖິງ​ທີ່​ໂດຍ​ບໍ່​ເສຍ​ຄ່າ ສະ­ເພາະ​ພາຍ​ໃນ​ຂອບ​ເຂດ​ນະ­ຄອນ­ຫຼວງ​ວຽງ​ຈັນ ແລະ ແຂວງ​ໃກ້​ຄຽງ ເຊິ່ງ​ການ​ຜະ­ລິດ​ລູກ​ປາ​ມາ​ຮອດ​ປັດ­ຈຸ­ບັນ​ສາ­ມາດ​ສະ­ໜອງ​ໃຫ້​ຊາວ​ກະ­ສິ­ກອນ​ໄດ້​ພຽງ­ພໍ ນອກ­ຈາກ 2 ສາຍ​ພັນ​ນີ້​ແລ້ວ ທາງ​ບໍ­ລິ­ສັດ​ຍັງ​ໄດ້​ຜະ­ລິດ​ລູກ​ປາ­ໄນ​ຮົງ​ກາ­ລີ​ຈຳ­ນວນ​ໜຶ່ງ​ຕື່ມ​ອີກ ເພື່ອ​ໃຫ້​ຊາວ​ກະ­ສິ­ກອນ​ໄດ້​ໄປ​ລ້ຽງ ໂດຍ​ລວມ​ແລ້ວ​ໂຄງ­ການ​ນີ້​ສາ­ມາດ​ສ້າງ​ລາຍ​ຮັບ​ໄດ້​ຈາກ​ການ​ຂາຍ​ລູກ​ປາ​ປະ­ມານ 80-150 ລ້ານ​ກີບ​ຕໍ່​ເດືອນ.

    ທ່ານ ແຟ​ເຣນ​ເລ​ວໍ​ອິ ຍັງ​ໃຫ້​ຮູ້​ຕື່ມ​ວ່າ: ສຳ­ລັບ​ທິດ​ທາງ​ແຜນ­ການ​ໃນ­ຕໍ່­ໜ້າ​ບໍ­ລິ­ສັດ​ຈະ​ໄດ້​ແປງ​ປາ​ໝັນ​ແລ້ວ​ລົງ​ກະ­ຊັງ​ໃນ​ນ້ຳ​ງື່ມ ແລະ ຂະ­ຫຍາຍ​ແນວ​ພັນ​ເພີ່ມ ເປັນ­ຕົ້ນ ແນວ​ພັນ​ປາ­ປາກ ປາ​ນວນ​ຈັນ ແລະ ປາ­ໄນ ເພື່ອ​ເພີ່ມ​ທາງ​ເລືອກ​ໃຫ້​ແກ່​ຊາວ​ກະ­ສິ­ກອນ​ໄດ້​ເລືອກ​ຊື້​ແນວ​ພັນ​ປາ​ຕາມ​ທີ່​ຕົນ​ເອງ​ຕ້ອງ­ການ ເພື່ອ​ໄປ​ລ້ຽງ​ຮັບ​ໃຊ້​ຄອບ­ຄົວ ແລະ ເປັນ​ສິນ­ຄ້າ.

ຂ່າວທີ່ກ່ຽວຂ້ອງ