ຕີນ່າ ພໍໃຈຜົນງານ 2 ຫຼຽນຄຳ ດອກປີກໄກ່ທົ່ວປະເທດ

66 10 ສ.ຫ. 2018 ວົງຈອນກີລາ
ຕີນ່າ ພໍໃຈຜົນງານ 2 ຫຼຽນຄຳ ດອກປີກໄກ່ທົ່ວປະເທດ

    ພາຍຫຼັງ​ສຳເລັດ​ການ​ແຂ່ງຂັນ​ກີລາ​ດອກ​ປີກ​ໄກ່​ທົ່ວ​ປະເທດ ຄັ້ງ​ທີ 18 ຊີງ​ຂັນ​ປະທານ​ສະພາ​ແຫ່ງ​ຊາດ ປະຈຳ​ປີ 2018 ຈັດ​ຂຶ້ນ​ວັນ​ທີ 1-5 ສິງຫາ 2018 ທີ່​ສູນ​ກີລາ​ບຶງ​ຂະ​ຫຍອງ ມີ​ການ​ແຂ່ງຂັນ 12 ລາຍການ ມີ​ນັກກີລາ​ທົ່ວ​ປະເທດ​ເຂົ້າ​ຮ່ວມ 320 ຄົນ ຈາກ 27 ພາກສ່ວນ ໃນນັ້ນ​ມີ 8 ແຂວງ ຜ່ານ​ການ​ແຂ່ງຂັນ ໂດຍ​ແມ່ນ​ສະໂມສອນ​ເຄ​ທີ ສາມາດ​ຄອງ​ເຈົ້າ​ຫຼຽນ​ຄຳ ສະໄໝ​ທີ 4 ຕິດຕໍ່​ກັນ ຫຼັງ​ກວາດ 3 ຫຼຽນ​ຄຳ 4 ຫຼຽນ​ເງິນ ແລະ 2 ຫຼຽນ​ທອງ ສ່ວນ​ອັນ​ທີ 2 ຕົກ​ເປັນ​ຂອງ​ສະໂມສອນ​ມັນ​ທາຕຸ​ລາດ ຍາດ​ໄດ້ 3 ຫຼຽນ​ຄຳ 2 ຫຼຽນ​ເງິນ ແລະ 7 ຫຼຽນ​ທອງ ທີ 3 ແຂວງ​ຄຳ​ມ່ວນ ຍາດ​ໄດ້ 3 ຫຼຽນ​ຄຳ ແລະ ທີ 4 ສະໂມສອນ​ໄກ່ຕີ​ນ່າ​ຍາດ​ໄດ້ 2 ຫຼຽນ​ຄຳ.

    ທ່ານ ພັນ​ຄຳ ອຸໄທ​ທານີ ຫົວໜ້າ​ຄູ​ເຝີກ​ສະໂມສອນ​ດອກ​ປີກ​ໄກ່ ຕີ​ນ່າ ໃຫ້​ສຳພາດ​ວ່າ: ການ​ແຂ່ງຂັນ​ດອກ​ປີກ​ໄກ່​ລາຍການ​ເບຍ​ລາວ​ໂອ​ເພັນ ຄັ້ງ​ທີ 18 ຊີງ​ຂັນ​ປະທານ​ສະພາ​ແຫ່ງ​ຊາດ ປະຈຳ​ປີ 2018 ຄັ້ງ​ນີ້ ສະໂມສອນ​ຕີ​ນ່າ​ໄດ້​ສົ່ງ​ນັກກີລາ​ໃນ​ຮຸ່ນ​ເຍົາວະ​ຊົນ​ເຂົ້າ​ຮ່ວມ​ແຂ່ງຂັນ​ທັງ​ໝົດ 7 ຄົນ ຍິງ 1 ຄົນ ແລະ ສາມາດ​ຍາດ​ມາ​ໄດ້ 2 ຫຼຽນ​ຄຳ ຈາກ​ນາງ ພຸດ​ສະຫວັນ ດາວ​ປະສິດ ລາຍການ​ດ່ຽວ​ເຍົາວະ​ຊົນ​ຍິງ ຮຸ່ນ​ອາຍຸ​ບໍ່​ເກີນ 14 ປີ ແລະ ດ່ຽວ​ເຍົາວະ​ຊົນ​ຍິງ ຮຸ່ນ​ອາຍຸ​ບໍ່​ເກີນ 17 ປີ ຕໍ່​ຜົນງານ​ດັ່ງກ່າວ ​ສາມາດ​ຕີ​ລາຄາ​ໄດ້​ສູງ​ນັກກີລາ​ພວກ​ເຮົາ​ ປະສົບ​ຜົນສຳເລັດ​ໄດ້​ລື່ນ​ຄາດໝາຍ ໃນຕໍ່ໜ້າ​ສະໂມສອນ​ໄດ້​ມີ​ການ​ວາງ​ແຜນ​ພັດທະນາ​ນັກກີລາ​ຢ່າງ​ຕໍ່​ເນື່ອງ ໂດຍ​ຈະ​ເຝິກແອບ​ນັກກີລາ​ມື​ໃໝ່​ໃຫ້​ມີ​ຄຸ​ນະພາບ​ສູງ ສົ່ງເສີມ​ຜູ້​ທີ່​ມີ​ຜົນງານ​ໄດ້​ເຄື່ອນ​ໄຫວ​ເຝິກຊ້ອມ ແລະ ທົດ​ສອບ​ຄວາມ​ສາມາດ​ນຳ​ບັນດາ​ສະໂມສອນ​ຕ່າງໆ​ທັງ​ພາຍ​ໃນ ແລະ ຕ່າງປະເທດ ແລະ ເຂົ້າ​ຮ່ວມ​ແຂ່ງຂັນ​ໃຫ້​ຫຼາຍ​ກວ່າ​ເກົ່າ.

ຂ່າວທີ່ກ່ຽວຂ້ອງ