ໂວວີນາມລາວ ສົ່ງນັກກີລາທີມຊາດຮ່ວມຊີງຂັນອາຊຽນ

183 10 ສ.ຫ. 2018 ວົງຈອນກີລາ
ໂວວີນາມລາວ ສົ່ງນັກກີລາທີມຊາດຮ່ວມຊີງຂັນອາຊຽນ

    ສະ­ຫະ­ພັນ​ກີ­ລາ​ໂວ​ວີ​ນາມ​ແຫ່ງ​ຊາດ​ລາວ ແຈ້ງ​ໃຫ້​ຊາບ​ວ່າ: ສະ­ຫະ­ພັນ​ກີ­ລາ​ໂວ​ວີ​ນາມ​ແຫ່ງ​ຊາດ​ລາວ ສົ່ງ​ຄູ​ເຝິກ 1 ຄົນ ແລະ ນັກ­ກີ­ລາ​ໂວ​ວີ​ນາມ​ທີມ​ຊາດ​ລາວ 3 ຄົນ ຍິງ 2 ຄົນ ເຂົ້າ​ຮ່ວມ​ໃນ​ລາຍ­ການ​ໂວ​ວີ​ນາມ ຊີງ​ຂັນ​ອາ​ຊຽນ ຄັ້ງ​ທີ 5 ທີ່​ປະ­ເທດ​ມຽນ​ມາ ຮັບ​ກຽດ​ເປັນ​ເຈົ້າ­ພາບ​ຈັດ​ຂຶ້ນ​ວັນ​ທີ 7-12 ສິງ­ຫາ 2018.

    ສຳ­ລັບ​ນັກ­ກີ­ລາ​ໂວ​ວີ​ນາມ​ທີມ​ຊາດ​ລາວ 3 ຄົນ ປະ­ກອບ​ມີ: ທ້າວ ໄພ­ລັດ ທຳ​ມະ​ວົງ­ສາ ເຈົ້າ​ຂອງ​ຫຼຽນ​ຄຳ​ຊີ­ເກມ 2 ສະ­ໄໝ​ຊ້ອນ ໃນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 26 ປີ 2011 ທີ່​ປະ­ເທດ​ອິນ​ໂດ​ເນ​ເຊຍ ແລະ ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 27 ປີ 2013 ທີ່​ມຽນ​ມາ ຈະ​ລົງ​ແຂ່ງ​ປະ­ເພດ​ຕໍ່­ສູ້​ປ້ອງ​ກັນ​ຕົວ​ຮຸ່ນ​ນ້ຳ­ໜັກ 60 ກິ​ໂລ ແລະ ປະ­ເພດ​ຟ້ອນ​ປະ­ກອບ​ອາ­ວຸດ​ໄມ​ກະ­ທາ ນາງ ພິກ​ສະ­ໄໝ ອິນ​ສຸ​ມັງ ຈະ​ລົງ​ແຂ່ງ​ປະ­ເພດ​ຟ້ອນ​ປະ­ກອບ​ອາ­ວຸດ​ດາບ​ຄູ່ ແລະ ນາງ ມາ­ລາ ຈັນ­ທະ​ລັກ​ສາ ຈະ​ລົງ​ແຂ່ງ​ປະ­ເພດ​ຕໍ່­ສູ້​ຮຸ່ນ​ນ້ຳ­ໜັກ 48 ກິ​ໂລ ສ່ວນ​ອີກ​ປະ­ເພດ​ຟ້ອນ 2 ລາຍ­ການ ຄື: ປະ­ກອບ​ອາ­ວຸດ​ດາບ​ຄູ່ ແລະ ມື​ເປົ່າ​ທ່າ​ມັງ­ກອນ​ປະ­ສານ​ທ່າ​ເສືອ ນຳ​ໂດຍ​ອາ­ຈານ ວຽງ​ສຸກ ຮັ່ງ​ເງິນ ຫົວ­ໜ້າ​ຄູ​ເຝິກ​ໂວ​ວີ​ນາມ​ທີມ​ຊາດ​ລາວ ເຊິ່ງ​ຄະ­ນະ​ຊຸດ​ນີ້​ໄດ້​ອອກ​ເດີນ­ທາງ​ໄປ​ຮ່ວມ​ແຂ່ງ­ຂັນ​ໃນ​ວັນ​ທີ 7 ສິງ­ຫາ 2018.

    ລາຍ­ການ​ນີ້ ຈະ​ມີ​ການ​ແຂ່ງ­ຂັນ​ທັງ​ໝົດ 35 ລາຍ­ການ ລວມ​ປະ­ເພດ​ຟ້ອນ ແລະ ປະ­ເພດ​ຕໍ່­ສູ້​ປ້ອງ​ກັນ​ຕົວ ມີ​ນັກ­ກີ­ລາ​ຈາກ 8 ປະ­ເທດ​ໃນ​ຂົງ­ເຂດ​ອາ​ຊຽນ​ເຂົ້າ​ຮ່ວມ​ປະ­ກອບ​ມີ ຕີ​ມໍ​ເລ​ສ​ເຕ ກຳ­ປູ­ເຈຍ ອິນ​ໂດ​ເນ​ເຊຍ ລາວ ຟີ​ລິບ​ປິນ ໄທ ຫວຽດ­ນາມ ແລະ ມຽນ​ມາ​ເຈົ້າ­ພາບ.

ຂ່າວທີ່ກ່ຽວຂ້ອງ