ຂ່າວຫຼ້າສຸດ

ສຳເລັດກໍ່ສ້າງພາກຂະຫຍາຍ ອາຄານຜູ້ໂດຍສານ ສະໜາມບິນສາກົນວັດໄຕ

281 10 ສ.ຫ. 2018 ຂ່າວໜ້າ​ໜຶ່ງ
ສຳເລັດກໍ່ສ້າງພາກຂະຫຍາຍ ອາຄານຜູ້ໂດຍສານ ສະໜາມບິນສາກົນວັດໄຕ

    ພິ­ທີ​ມອບ-ຮັບ​ໂຄງ­ການ​ພາກ​ຂະ­ຫຍາຍ​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 9 ສິງ­ຫາ 2018 ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ຄາ​ຊູ​ຢູ​ກິ ນາ​ກາ​ເນະ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ຍີ່­ປຸ່ນ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແລະ ພະ ນັກ​ງານ-ວິ­ຊາ​ການ​ສອງ​ຝ່າຍ​ເຂົ້າ​ຮ່ວມ.

    ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ກ່າວ​ວ່າ: ໂຄງ­ການ​ພາກ​ຂະ­ຫຍາຍ​ອາ­ຄານ​ຜູ້­ໂດຍ­ສານ​ສະ­ໜາມ​ບິນ​ສາ­ກົນ​ວັດ​ໄຕ ໂດຍ​ທຶນ​ກູ້​ຢືມ​ດອກ​ເບ້ຍ​ຜ່ອນ­ຜັນ​ຈາກ​ລັດ­ຖະ­ບານ​ຍີ່­ປຸ່ນ ມູນ​ຄ່າ 9.017 ຕື້​ເຢັນ ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ປີ 2014 ເປັນ­ຕົ້ນ​ມາ ປະ­ກອບ​ມີ­ໜ້າ​ວຽກ ຄື: ຂະ­ຫຍາຍ​ອາ­ຄານ​ຜູ້­ໂດຍ­ສານ​ສາ­ກົນ ຂະ­ຫຍາຍ​ເນື້ອ­ທີ່ 13.539 ຕາ​ແມັດ ປັບ­ປຸງ​ໃໝ່ 3.311 ຕາ​ແມັດ ອາ­ຄານ​ຜູ້­ໂດຍ­ສານ​ພາຍ​ໃນ​ກໍ່­ສ້າງ 7.229 ຕາ​ແມັດ ສິ່ງ​ອຳ­ນວຍ​ຄວາມ​ສະ­ດວກ​ຊົ່ວ­ຄາວ ສຳ­ລັບ​ອາ­ຄານ​ຜູ້­ໂດຍ­ສານ​ພາຍ​ໃນ 1.000 ຕາ​ແມັດ ຫ້ອງ​ບຳ­ລຸງ​ຮັກ­ສາ​ກໍ່­ສ້າງ 449 ຕາ​ແມັດ ພ້ອມ​ກັບ​ລະ­ບົບ​ນ້ຳ​ປະ­ປາ ໄຟ­ຟ້າ ນ້ຳ​ເປື້ອນ ທາງ​ແລ່ນ​ເຄື່ອງ​ບິນ​ອອກ​ດ່ວນ ຖະ­ໜົນ ບ່ອນ​ຈອດ​ລົດ ເຂດ​ໃຫ້​ບໍ­ລິ­ການ ແລະ ທາງ​ສຳ­ລັບ​ຂົນ­ສົ່ງ​ອຸ­ປະ­ກອນ​ສະ­ໜັບ­ສະ­ໜູນ.

    ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ດັ່ງ­ກ່າວ ແນ­ໃສ່​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ​ໃນ​ວຽກ​ງານ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໂດຍ​ສະ­ເພາະ ການ​ເພີ່ມ​ຂຶ້ນ​ຂອງ​ຈຳ­ນວນ​ຜູ້­ໂດຍ­ສານ​ທັງ​ພາຍ​ໃນ ແລະ ຕ່າງ­ປະ­ເທດ​ທີ່​ນັບ​ມື້​ສູງ​ຂຶ້ນ ເຊິ່ງ​ໃນ​ປີ 2017 ອາ­ຄານ​ສະ­ໜາມ​ບິນ​ສາ­ກົນ​ວັດ​ໄຕ​ໄດ້​ຮອງ​ຮັບ​ຜູ້­ໂດຍ­ສານ​ທັງ​ໝົດ 2.144.000 ເທື່ອ​ຄົນ ໃນ​ນັ້ນ ໂດຍ­ສານ​ຕ່າງ­ປະ­ເທດ 1,38 ລ້ານ​ເທື່ອ​ຄົນ ແລະ ຄາດ​ວ່າ​ໃນ​ປີ 2023 ຜູ້­ໂດຍ­ສານ​ຕ່າງ­ປະ­ເທດ​ຈະ​ເພີ່ມ​ຂຶ້ນ​ເປັນ 1,5 ລ້ານ​ເທື່ອ​ຄົນ.

    ໂອ­ກາດ​ນີ້ ພິ­ທີ​ຍັງ​ໄດ້​ເຊັນ​ຕໍ່​ສັນ­ຍາ​ການ​ດຳ­ເນີນ​ງານ​ພາຍ​ໃນ​ສະ­ໜາມ​ບິນ ລະ­ຫວ່າງ ບໍ­ລິ­ສັດ​ຂອງ​ຍີ່­ປຸ່ນ ແລະ ກອງ​ຄຸ້ມ​ຄອງ​ສະ­ໜາມ​ບິນ​ສາ­ກົນ​ວັດ​ໄຕ​ຕື່ມ​ອີກ ເພື່ອ​ແນ­ໃສ່​ຍົກ​ລະ­ດັບ​ການ​ບໍ­ລິ­ການ​ພາຍ​ໃນ​ສະ­ໜາມ​ບິນ​ສາ­ກົນ​ວັດ​ໄຕ​ໃຫ້​ນັບ​ມື້​ທຽບ​ເທົ່າ​ສາ­ກົນ​ເປັນ​ກ້າວໆ.

ຂ່າວທີ່ກ່ຽວຂ້ອງ