ຂ່າວຫຼ້າສຸດ

ສື່ມວນຊົນລາວ ນັບມື້ເຕີບໃຫຍ່ຂະຫຍາຍຕົວເທື່ອລະກ້າວ

247 10 ສ.ຫ. 2018 ຂ່າວໜ້າ​ໜຶ່ງ
ສື່ມວນຊົນລາວ ນັບມື້ເຕີບໃຫຍ່ຂະຫຍາຍຕົວເທື່ອລະກ້າວ

    ວັນ​ທີ 8 ສິງ­ຫາ 2018 ທ່ານ ປິ່ນ​ປາດ​ຖະ​ໜາ ພັນ­ທະ​ມາ­ລີ ຫົວ­ໜ້າ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ​ໃນ​ໂອ­ກາດ​ວັນ​ສ້າງ­ຕັ້ງ​ສື່​ມວນ​ຊົນ​ລາວ ຄົບ­ຮອບ 68 ປີ (13/8/1950-13/8/2018) ວ່າ: ຜ່ານ​ເສັ້ນ­ທາງ​ອັນ​ຍືດ​ເຍື້ອ​ຍາວ​ນານ​ແຫ່ງ​ການ​ສ້າງ­ສາ ແລະ ພັດ­ທະ­ນາ​ສື່​ມວນ​ຊົນ​ລາວ​ໄດ້​ມີ​ການ​ເຕີບ​ໃຫຍ່​ຂະ­ຫຍາຍ­ຕົວ ແລະ ຫັນ​ໄປ​ສູ່​ຄວາມ​ທັນ​ສະ­ໄໝ​ເທື່ອ​ລະ​ກ້າວ ທັງ​ສື່​ສິ່ງ​ພິມ ແລະ ສື່​ເອ​ເລັກ​ໂຕຣ​ນິກ  ເຊິ່ງ​ໄດ້​ກາຍ­ເປັນ​ກະ­ບອກ​ສຽງ​ສຳ­ຄັນ​ຂອງ ພັກ-ລັດ ແລະ ສັງ­ຄົມ

     ມາ​ຮອດ​ປັດ­ຈຸ­ບັນ ມີ​ສື່​ສິ່ງ​ພິມ ແລະ ວາ­ລະ­ສານ​ເກີດ​ຂຶ້ນ​ທັງ​ໝົດ 144 ສະ­ບັບ ໃນ​ນັ້ນ ມີ​ໜັງ­ສື­ພິມ 29 ສະ­ບັບ ສະ­ເພາະ​ລາຍ​ວັນ 11 ສະ­ບັບ ວິ­ທະ­ຍຸ​ກະ­ຈາຍ­ສຽງ 63 ສະ­ຖາ­ນີ ໃນ​ນັ້ນ ສູນ​ກາງ 11 ສະ­ຖາ­ນີ ແລະ ທ້ອງ­ຖິ່ນ 52 ສະ­ຖາ­ນີ ກະ­ຈາຍ​ສູ່​ພາກ​ພື້ນ​ດິນ​ກວມ 95% ໂທລະ­ພາບ 37 ສະ­ຖາ­ນີ ໃນ​ນັ້ນ ສູນ​ກາງ 9 ສະ­ຖາ­ນີ ແລະ ທ້ອງ­ຖິ່ນ 28 ສະ­ຖາ­ນີ ສາ­ມາດ​ກະ­ຈາຍ​ຜ່ານ​ດາວ​ທຽມ​ກວມ 100% ແລະ ຜ່ານ​ມາ​ສັງ­ເກດ​ເຫັນ​ໄດ້​ວ່າ​ສື່​ມວນ​ຊົນ​ລາວ​ໄດ້​ປະ­ກອບ­ສ່ວນ​ຢ່າງ​ຕັ້ງ­ໜ້າ​ເຂົ້າ​ໃນ​ການ​ໂຄ­ສະ­ນາ​ເຜີຍ­ແຜ່​ແນວ­ທາງ​ນະ­ໂຍ­ບາຍ​ຂອງ​ພັກ-ລັດ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ຊາດ ໂດຍ​ສະ­ເພາະ ປີ 2018 ສື່​ມວນ​ຊົນ​ໄດ້​ສຸມ​ໃສ່​ໂຄ­ສະ­ນາ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ X ຂອງ​ພັກ​ເຄິ່ງ​ສະ­ໄໝ ການ​ຈັດ​ກິດ­ຈະ­ກຳ​ເປີດ​ປີ​ທ່ອງ​ທ່ຽວ​ລາວ 2018 ທັງ​ຢູ່​ພາຍ​ໃນ ແລະ ຕ່າງ­ປະ­ເທດ ພິ­ເສດ​ແມ່ນ​ການ​ສະ­ເຫຼີມ­ສະ­ຫຼອງ​ສຽງ​ແຄນ​ເຊື້ອ​ຊາດ​ລາວ​ເປັນ​ມໍ­ລະ­ດົກ​ໂລກ ອັນ​ໄດ້​ເຮັດ​ໃຫ້​ທົ່ວ​ໂລກ​ຮັບ​ຮູ້​ຊື່​ສຽງ ແລະ ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ລາວ.

     ທ່ານ​ຫົວ­ໜ້າ​ກົມ​ສື່​ມວນ​ຊົນ ຍັງ​ກ່າວ​ຕື່ມ​ວ່າ: ປັດ­ຈຸ­ບັນ​ສື່​ມວນ​ຊົນ​ພາກ​ພື້ນ ແລະ ໃນ​ໂລກ​ມີ​ການ​ຂະ­ຫຍາຍ­ຕົວ​ຢ່າງ​ວ່ອງ­ໄວ ໃນ​ການ​ເຊື່ອມ​ຕົວ​ເຂົ້າ​ສູ່​ລະ­ບົບ​ທັນ​ສະ­ໄໝ ເຊິ່ງ​ເປັນ​ການ​ຊຸກ­ຍູ້​ໃຫ້​ສື່​ມວນ​ຊົນ​ລາວ​ຕ້ອງ​ໄດ້​ບຸກ​ບືນ ແລະ ປັບ­ປຸງ​ຕົນ​ເອງ​ໃຫ້​ທັນ​ສະ­ໄໝ​ກັບ​ຍຸກ​ເຕັກ​ໂນ​ໂລ​ຊີ ພ້ອມ​ນັ້ນ ການ​ພັດ​ທະ ນາ​ບຸ​ຄະ­ລາ​ກອນ​ໃນ​ທຸກ​ດ້ານ​ກໍ່​ຕ້ອງ​ໃຫ້​ມີ​ຄວາມ​ຮູ້ ຄວາມ​ສາ­ມາດ ເອົາ­ໃຈ­ໃສ່​ພັດ­ທະ­ນາ​ພື້ນ­ຖານ​ໂຄງ​ລ່າງ ຕອບ​ສະ­ໜອງ​ວັດ­ຖຸ​ອຸ­ປະ­ກອນ​ຮັບ​ໃຊ້​ໜ້າ­ທີ່​ວຽກ​ງານ​ຂອງ​ສື່​ໃຫ້​ມີ​ຄຸ­ນະ­ພາບ​ດີ​ຂຶ້ນ ແລະ ສາ­ມາດ​ຮອງ​ຮັບ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ວຽກ​ງານ​ໃນ​ໄລ­ຍະ​ໃໝ່ ພິ­ເສດ ຈະ​ຕ້ອງ​ເພີ່ມ​ທະ­ວີ​ນຳ­ພາ​ແນວ​ຄິດ-ການ­ເມືອງ​ໃຫ້​ຜູ້​ເຮັດ​ວຽກ​ງານ​ສື່​ໃຫ້​ໜັກ​ແໜ້ນ ຖ້າ​ບໍ່​ກໍ່​ຈະ​ນຳ​ໃຊ້​ໄປ​ໃນ​ທາງ​ທີ່​ຜິດ ແລະ ບໍ່​ມີ​ປະ​ສິດ­ທິ​ຜົນ ພ້ອມ​ກັນ​ນັ້ນ ກໍ່​ຕ້ອງ​ເຊີດ​ຊູ​ຄວາມ​ຮັບ­ຜິດ­ຊອບ​ທາງ​ດ້ານ​ການ­ເມືອງ​ໃຫ້​ສູງ ແລະ ຢຶດ​ໝັ້ນ​ຕາມ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ ແລະ ສ້າງ​ຕົນ​ເອງ​ໃຫ້​ເປັນ​ເວ­ທີ​ສະ­ແດງ​ຄວາມ​ຄິດ​ເຫັນ ແລະ ສ່ອງ​ແສງ​ສັງ­ຄົມ​ຮັບ​ຮູ້ ແລະ ເຂົ້າ­ໃຈ​ບັນ­ຫາ​ຕ່າງໆ​ໄດ້​ຢ່າງ​ຖືກ­ຕ້ອງ.

ຂ່າວທີ່ກ່ຽວຂ້ອງ