ຂ່າວຫຼ້າສຸດ

ຊີ້ແຈງກໍລະນີນັກກີລາໄປຂຶ້ນເວທີຕີມວຍອາຊີບ ຢູ່ປະເທດໄທ

303 09 ສ.ຫ. 2018 ວົງຈອນກີລາ
ຊີ້ແຈງກໍລະນີນັກກີລາໄປຂຶ້ນເວທີຕີມວຍອາຊີບ ຢູ່ປະເທດໄທ

    ສະ­ຫະ­ພັນ​ກີ­ລາ​ມວຍ​ແຫ່ງ​ຊາດ​ລາວ ຊີ້​ແຈງ​ກໍ­ລະ­ນີ​ຂອງ​ນັກ­ກີ­ລາ​ມວຍ​ລາວ ໄປ​ເຝິກ­ແອບ ແລະ ຂຶ້ນ​ເວ­ທີ​ຕີ­ມວຍ​ອາ­ຊີບ​ຢູ່​ປະ­ເທດ​ໄທ ​ທີ່​ສັງ­ຄົມ​ຍັງ​ບໍ່​ທັນ​ຮັບ​ຮູ້​ຂໍ້​ມູນ​ຄວາມ​ເປັນ​ມາ ສະ­ຫະ­ພັນ​ມວຍ​ລາວ​ມີ​ສ່ວນ​ຮ່ວມ​ນຳ ຫຼື ບໍ່ ເຊິ່ງ​ການ​ແຂ່ງ­ຂັນ​ບາງ​ຄັ້ງ​ກໍ່​ນຳ​ຊື່​ສຽງ​ມາ​ໃຫ້​ປະ­ເທດ​ຊາດ ແຕ່​ຫຼາຍ​ຄັ້ງ​ເຫັນ​ວ່າ​ນັກ­ກີ­ລາ​ມວຍ​ທີ່​ມາ​ຈາກ​ລາວ ເຝິກ­ຊ້ອມ​ຍັງ​ບໍ່​ໄດ້​ເຄິ່ງ​ໜຶ່ງ​ຂອງ​ມາດ­ຕະ­ຖານ​ມວຍ​ອາ­ຊີບ ​ກໍ່​ຂຶ້ນ​ເວ­ທີ​ແຂ່ງ­ຂັນ ​ເຮັດ​ໃຫ້​ຊື່​ສຽງ​ນັກ​ມວຍ​ຈາກ​ລາວ ​ໃນ​ພາບ​ລວມ​ເສື່ອມ​ເສຍ​ໄປ​ຕາມ​ກັນ.

    ຫຼ້າ​ສຸດ ທ່ານ ສາຍ​ສະ​ໜອນ ໄຊ​ຍະ​ສອນ ປະ­ທານ​ສະ­ຫະ­ພັນ​ກີ­ລາ​ມວຍ​ແຫ່ງ​ຊາດ​ລາວ ໄດ້​ອອກ​ມາ​ຊີ້​ແຈງ​ຕໍ່​ສື່​ມວນ​ຊົນ​ກໍ­ລະ­ນີ​ດັ່ງ­ກ່າວ​ ໃນ​ວັນ​ທີ 6 ສິງຫາ 2018 ວ່າ: ຜ່ານ​ມາ​ເຄີຍ​ມີ​ນັກ­ກີ­ລາ​ມວຍ​ລາວ​ໄປ​ເຝິກ­ແອບ ແລະ ຂຶ້ນ​ເວ­ທີ​ຕີ­ມວຍ​ອາ­ຊີບ​ຢູ່​ປະ­ເທດ​ໄທ ແຕ່​ພວກ​ເຮົາ​ກໍ່​ບໍ່​ມີ​ສ່ວນ​ກ່ຽວ­ຂ້ອງ ເນື່ອງ​ຈາກ​ນັກ​ມວຍ​ທີ່​ໄປ​ແຂ່ງ­ຂັນ​ທີ່​ປະ­ເທດ​ໄທ ​ບໍ່​ໄດ້​ມາ​ຜ່ານ​ການ​ຢັ້ງ­ຢືນ​ຈາກສະ­ຫະ­ພັນ​ພວກ​ເຮົາ​ແຕ່​ຢ່າງ­ໃດ ​ມີ​ພຽງ​ແຕ່ 4 ສະ­ໂມ­ສອນ ຄື: ສະ­ໂມ­ສອນ​ໂຊກ​ໄຊ ສະ­ໂມ­ສອນ​ຂວັນ​ໃຈ​ສີ​ໂຄດ ສະ­ໂມ­ສອນ​ນົບ​ພະ​ລິດ ແລະ ສະ­ໂມ­ສອນ​ທອງຄຳ​ ເທົ່າ​ນັ້ນ ​ທີ່​ຂຶ້ນ​ກັບ​ຄວາມ​ຮັບຜິດ​ຊອບ​ຂອງ​ສະ­ຫະ­ພັນ​ມວຍ​ແຫ່ງ​ຊາດ​ລາວ.

    ແນວ­ໃດ​ກໍ່​ຕາມ ສະ­ຫະ­ພັນ​ມວຍ​ແຫ່ງ​ຊາດ​ລາວ ​ຈະ​ໄດ້​ອອກ​ແຈ້ງ​ການ​ເຖິງ​ບັນ­ດາ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ​ກໍ່​ຄື​ສະ­ຫະ­ພັນ​ກີ­ລາ​ມວຍ​ແຕ່​ລະ​ແຂວງ ແລະ ນະ­ຄອນ­ຫຼວງ ຫ້າມ​ສົ່ງ​ນັກ­ກີ­ລາ​ມວຍ​ໄປ​ເຝິກແອບ ແລະ ຂຶ້ນ​ເວ­ທີ​ຕີ­ມວຍ​ອາຊີບ​ຢູ່​ປະ­ເທດ​ໄທ ຖ້າ​ບໍ່​ໄດ້​ຮັບ​ອະນຸ​ຍາດ​ຈາກ​ສະ­ຫະ­ພັນ​ມວຍ​ແຫ່ງ​ຊາດ​ລາວ ຖ້າ​ຫາກ​ພາກ­ສ່ວນ​ໃດ​ບໍ່​ປະ­ຕິ­ບັດ​ຕາມ​ແຈ້ງ​ການ​ສະບັບ​ນີ້​ ສະ­ຫະ­ພັນ​ມວຍ​ແຫ່ງ​ຊາດ​ລາວ ຈະ​ມີ​ມາດ​ຕະ­ການ​ລົງ­ໂທດ​ຕາ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ