ຂ່າວຫຼ້າສຸດ

ຊຸກເຊື່ອງຢາບ້າໄວ້ຢູ່ຜ້າອັດປາກ ແຕ່ກໍໄປບໍ່ລອກ

266 09 ສ.ຫ. 2018 ຂ່າວໜ້າ​ໜຶ່ງ

   ເມື່ອ​ບໍ່​ດົນ​ຜ່ານ​ມາ​ນີ້ ​ເຈົ້າ​ໜ້າ­ທີ່​ຕຳ­ຫຼວດ​ຈາ­ລະ​ຈອນ​ນະ­ຄອນ­ຫຼວງ​ວຽງ​ຈັນ ໄດ້​ລັດ​ກວດ​ຄົ້ນ​ລົດ­ຈັກ​ໄວ​ລຸ້ນ​ຄົນ​ໜຶ່ງ ​ຢູ່​ສາມ​ແຍກ​ບ້ານ​ໄຊ​ມຸງ­ຄຸນ ເມືອງ​ນາ​ຊາຍ​ທອງ ພົບ​ຢາ​ບ້າ​ຈຳ­ນວນ 50 ເມັດ ທີ່​ຊຸກ­ເຊື່ອງ​ໄວ້​ຢູ່​ຜ້າ​ອັດ​ປາກ ຈຶ່ງ​ໄດ້​ຈັບ​ຕົວ​ຜູ້­ກ່ຽວ ​ສົ່ງ​ໃຫ້​ເຈົ້າ​ໜ້າ­ທີ່​ຕຳ­ຫຼວດ​ວິ­ຊາ​ສະ­ເພາະ ​ດຳ­ເນີນ​ການ​ສອບ​ສວນ.

   ເຈົ້າ​ໜ້າ­ທີ່​ພະ​ແນກ​ຕຳ­ຫຼວດ​ສະ­ກັດ​ກັ້ນ ແລະ ຕ້ານ​ຢາ​ເສບ​ຕິດ ນວ ໃຫ້​ຮູ້​ວ່າ: ຜູ້​ຖືກ​ຫາ​ຊື່​ທ້າວ ກູ້​ຢ່າງ ອາ­ຍຸ 35 ປີ ຢູ່​ບ້ານ​ແຈ້ງ​ສະ­ຫວ່າງ ເມືອງ​ນາ​ຊາຍ​ທອງ ຜູ້­ກ່ຽວ​ໄດ້​ຮັບ​ສາ­ລະ­ພາບ​ວ່າ​ຢາ​ບ້າ​ຈຳ­ນວນ 50 ເມັດ​ເປັນ​ຂອງ​ຜູ້­ກ່ຽວ​ແທ້ ເຊິ່ງ​ໃນ​ວັນ​ທີ 4 ມິ­ຖຸ­ນາ 2018 ໄດ້​ໄປ​ຊື້​ຢາ​ບ້າ​ນຳ​ທ້າວ ຈ່ອຍ ອາ­ຍຸ​ປະ­ມານ 39 ປີ ຢູ່​ຮ້ານ​ເກມ​ແຫ່ງ​ໜຶ່ງ ​ເຂດ​ບ້ານ​ເມືອງ​ນາ​ຊາຍ​ທອງ ແຕ່​ທ້າວ ​ຈ່ອຍ​ ບໍ່​ມີ​ຢາ​ບ້າ​ໃຫ້ ຈຶ່ງ​ນັດ​ໃຫ້​ໄປ​ລໍ­ຖ້າ​ຮັບ​ຢາ​ບ້າ​ຢູ່​ເສັ້ນ­ທາງ​ເຂດ​ບ້ານ​ໜອງ​ບອນ ເມືອງ​ໂພນ​ໂຮງ ແຂວງ​ວຽງ​ຈັນ.

   ຈາກ​ນັ້ນ​ ຜູ້­ກ່ຽວ​ໄດ້​ຂີ່​ລົດ­ຈັກ​ຮອນ​ດ້າ​ເວບ 100 ໄປ​ລໍ­ຖ້າ​ຢູ່​ຈຸດ​ນັດ​ໝາຍ​ພໍ​ໄປ​ຮອດ​ທ້າວ ຈ່ອຍ ໄດ້​ເອົາ​ຢາ​ບ້າ 50 ເມັດ​ມາ​ໃຫ້​ ແລ້ວ​ຜູ້­ກ່ຽວ​ເອົາ​ຢາ​ບ້າ​ຈຳ­ນວນ​ນີ້ ​ຊຸກ­ເຊື່ອງ​ໄວ້​ຢູ່​ໃນ​ຜ້າ​ອັດ​ປາກ ​ແລ້ວ​ຂັບ​ຂີ່​ລົດ­ຈັກ​ມຸ່ງ​ໜ້າ​ກັບ​ບ້ານ ​ພໍ​ຂັບ​ຂີ່​ໄປ​ຮອດ​ສາມ​ແຍກ​ບ້ານ​ໄຊ​ມຸງ­ຄຸນ ໄດ້​ມີ​ເຈົ້າ​ໜ້າ­ທີ່​ຕຳ­ຫຼວດ​ຈະ​ລະ​ຈອນ​ຢູ່​ປ້ອມ​ດັ່ງ­ກ່າວ​ ໄດ້​ລັດ​ກວດ​ເອ­ກະ­ສານ​ລົດ​ໃນ​ລະ­ຫວ່າງ​ນັ້ນ ​ໄດ້​ເອົາ​ຜ້າ​ອັດ​ປາກ​ອອກ​ຈາກ​ປາກ ​ແລ້ວ​ຢາ​ບ້າ​ຈຳ­ນວນ​ດັ່ງ­ກ່າວ​ໄດ້​ຕົກ­ລົງ​ດິນ ເມື່ອ​ເຈົ້າ​ໜ້າ­ທີ່​ແນມ​ເຫັນ ແລະ ຮູ້​ວ່າ​ນັ້ນ​ແມ່ນ​ຢາ​ບ້າ ​ຈຶ່ງ​ໄດ້​ຈັບ​ຕົວ​ຜູ້­ກ່ຽວ​ສົ່ງ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ສືບ­ຕໍ່​ດຳ­ເນີນ​ຄະ­ດີ.

ຂ່າວທີ່ກ່ຽວຂ້ອງ