ສະວິດ ສະຫຼອງວັນຊາດ ຄົບຮອບ 727 ປີ

    ໃນ​ວັນ​ທີ 7 ສິງ­ຫາ 2018 ທີ່​ໂຮງ­ແຮມ​ເສດ​ຖາ​ປາ​ລາ​ສ ນະ­ຄອນ­ຫຼວງ​ວຽງ​ຈັນ ເອກ​ອັກ​ຄະ​ລັດ​ສະ​ທູດ​ສະ​ວິດ ປະ­ຈຳ​ລາວ ເຊິ່ງ​ມີ​ສຳ­ນັກ­ງານ​ຕັ້ງ​ຢູ່​ບາງ­ກອກ ປະ­ເທດ​ໄທ ຈັດ​ງານ​ລ້ຽງ​ສະ­ເຫຼີມ­ສະ­ຫຼອງ​ວັນ­ຊາດ ຄົບ­ຮອບ 727 ປີ (01/08/1291-01/08/2018) ໂດຍ​ມີ​ທ່ານ ອີ​ໂວ ຊີ​ເບີ ເອກ​ອັກ​ຄະ​ລັດ​ສະ​ທູດ​ສະ​ວິດ ປະ­ຈຳ​ລາວ ທ່ານ ທີມ ແອນ​ເດີ​ລິນ ຫົວ­ໜ້າ​ອົງ­ການ​ສະ​ວິດ ເພື່ອ​ການ​ພັດ­ທະ­ນາ ແລະ ການ​ຮ່ວມ​ມື​ປະ­ຈຳ​ພາກ​ພື້ນ ມີ​ບັນ­ດາ​ທ່ານ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ທູ­ຕາ­ນຸ­ທູດ ຕາງ­ໜ້າ​ຈາກ​ສຳ­ນັກ­ງານ​ອົງ­ການ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ລາວ-ສະ​ວິດ ມີ​ສາຍ​ພົວ­ພັນ​ຮ່ວມ​ມື​ກັນ​ມາ​ດົນ​ນານ​ແລ້ວ ໂດຍ​ສະ­ເພາະ​ໃນ​ການ​ຮ່ວມ​ມື​ຊ່ວຍ­ເຫຼືອ​ວຽກ​ງານ​ມະນຸດ​ສະ​ທຳ ຜ່ານ​ອົງ­ການ​ສະ​ວິດ ເພື່ອ​ການ​ພັດ­ທະ­ນາ ແລະ ການ​ຮ່ວມ​ມື​ປະ­ຈຳ​ລາວ ເລີ່ມ​ມີ​ບົດ­ບາດ​ໃນ​ການ​ຮ່ວມ​ມື​ຊ່ວຍ­ເຫຼືອ​ມາ​ແຕ່ 2006 ໂດຍ​ສະ­ເພາະ ​ໂຄງ­ການ​ຄ້ຳ­ປະ­ກັນ​ທາງ​ດ້ານ​ສະ­ບຽງ​ອາ­ຫານ ແລະ ເສີມ​ສ້າງ​ລາຍ​ຮັບ​ໃຫ້​ຊຸມ​ຊົນ ສະ­ໜັບ­ສະ­ໜູນ​ລາວ​ເຂົ້າ​ເປັນ​ສະ­ມາ­ຊິກ​ອາ​ຊຽນ ນອກ​ນັ້ນ​ກໍ່​ຍັງ​ໃຫ້​​ການ​ສະ­ໜັບ­ສະ­ໜູນ​ທຶນ​ກູ້​ຢືມ​ບໍ່​ມີ​ດອກ​ເບ້ຍ ​ເຂົ້າ​ໃນ​ການ​ພັດ­ທະ­ນາ​ການ​ສຶກ​ສາ ສາ​ທາ ແລະ ວຽກ​ງານ​ຂະ­ແໜງ­ການ​ອື່ນໆ ມາ​ເຖິງ​ປັດ­ຈຸ­ບັນ ທາງ​ອົງ­ການ​ໄດ້​ໃຫ້­ການ​ຊ່ວຍ­ເຫຼືອ ສປປ ລາວ ຫຼາຍ​ກວ່າ 120 ລ້ານ​ໂດ​ລາ​ສະ­ຫະ­ລັດ ແຕ່​ລະ​ປີ​ສະ­ເລ່ຍປະ­ມານ 20 ລ້ານ​ໂດ​ລາ ແລະ ຫຼ້າ​ສຸດ ໃຫ້­ການ​ຊ່ວຍ­ເຫຼືອ​ວຽກ​ງານ​ມະ­ນຸດ­ສະ­ທຳ​ຜ່ານ​ອົງ­ການ​ກາ­ແດງ​ສາ­ກົນ ມູນ​ຄ່າ 2 ຕື້​ກວ່າ​ກີບ ປະ­ມານ 300.000 ໂດ​ລາ ເພື່ອ​ຊ່ວຍ­ເຫຼືອ​ຜູ້​ປະ­ສົບ​ໄພ​ໃນ ສປປ ລາວ.

    ທ່ານ ອີ​ໂວ ຊີ​ເບີ ກ່າວ​ວ່າ: ບົນ​ພື້ນ­ຖານ​ມິດ­ຕະ­ພາບ ແລະ ການ​ຮ່ວມ​ມືທີ່​ມີ​ມູນ­ເຊື້ອ​ອັນ​ດີ ລັດ­ຖະ­ບານ​ສະ​ວິດ​ພ້ອມ​ໃຫ້­ການ​ສະ­ໜັບ­ສະ­ໜູນ ສປປ ລາວ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຍົກ​ສູງ​ຄຸ­ນະ­ພາບ​ຊີ­ວິດ ເພື່ອຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ ແລະ ສະ­ຖາ­ນະ​ພາບ​ປະ­ເທດ​ດ້ອຍ​ພັດ­ທະ­ນາ​ໃນ​ອະ­ນາ­ຄົດ​ອັນ​ໃກ້​ນີ້.