​ສປຊ ເປີດ​ທາງ​ເຄື່ອນ​ໄຫວ​ຊ່ວຍເຫຼືອ​ມະນຸດສະທຳ​ໃຫ້​ແກ່ ​ສປປ ເກົາຫຼີ

134 08 ສ.ຫ. 2018 ຂ່າວຕ່າງປະເທດ
​ສປຊ ເປີດ​ທາງ​ເຄື່ອນ​ໄຫວ​ຊ່ວຍເຫຼືອ​ມະນຸດສະທຳ​ໃຫ້​ແກ່ ​ສປປ ເກົາຫຼີ

   ຫຼັງ​ຈາກ​ທີ່​ໄດ້​ເຈລະຈາ​ເປັນ​ເວລາ​ຫຼາຍ​ອາທິດ ມາ​ໃນ​ວັນ​ທີ 6 ສິງຫາ​ນີ້ ສະພາ​ຄວາມ​ໝັ້ນຄົງ ຂອງ​ສະຫະ​ປະຊາ​ຊາດ (​ສປຊ) ກໍ​ໄດ້​ຮັບຮອງ​ແຜນການ ທີ່​ນຳ​ສະເໜີ​ໂດຍ ສ ອາ​ເມ​ຣິ​ກາ ຊຶ່ງ​ຕາມ​ນັ້ນແລ້ວ ກໍ​ແມ່ນ​ເປີດ​ທາງ​ໃຫ້​ແກ່​ການ​ຊ່ວຍເຫຼືອ​ມະນຸດສະທຳ ໃຫ້​ແກ່ ​ສປປ ເກົາຫຼີ.

    ມະຕິ​ຕ່າງໆ​ຂອງ ​ສປຊ ຊີ້​ແຈງ​ວ່າ ບັນດາ​ຄຳ​ສັ່ງ​ປິດ​ລ້ອມ ບໍ່​ຄວນ​ກະທົບ​ຕໍ່​ການເຄື່ອນໄຫວ ຊ່ວຍເຫຼືອ​ມະນຸດສະທຳ ແຕ່​ວ່າ​ທີ່​ຜ່ານ​ມາ ບັນດາ​ອົງການ​ໃຫ້​ຄວາມ​ຊ່ວຍເຫຼືອ ຕັ້ງ​ບັນຫາ​ອອກ​ມາ​ວ່າ ບັນດາ​ມາດ​ຕະການ​ຈຳກັດ​ທີ່​ເຂັ້ມ​ງວດ ຕໍ່​ການເຄື່ອນໄຫວ​ທາງ​ດ້ານ​ການ​ຄ້າ ແລະ ​ທະນາຄານ ພວມ​ເຮັດ​ໃຫ້​ເກີດ​ສິ່ງ​ກີດຂວາງ ເປັນ​ການ​ກີດ​ກັນ​ເຂົາເຈົ້າ ໃນ​ການ​ໃຫ້​ຄວາມ​ຊ່ວຍເຫຼືອ​ສິ່ງ​ຂອງ ທີ່​ຈຳເປັນ​ໃຫ້​ແກ່ ​ສປປ ເກົາຫຼີ.

    ດັ່ງນັ້ນ ເມື່ອ​ເດືອນ​ທີ່​ຜ່ານ​ມາ ສ ອາ​ເມ​ຣິ​ກາ ຈຶ່ງ​ໄດ້​ນຳ​ສະເໜີ​ການ​ແນະນຳ​ໃໝ່ ເພື່ອ​ອະນຸຍາດ ໃຫ້​ແກ່​ບັນດາ​ອົງການ​ຊ່ວຍເຫຼືອ ແລະ​ບັນດາ​ອົງການ​ຂອງ ​ສປຊ ສາມາດ​ໄດ້​ຮັບ​ໃບ​ອະນຸຍາດ​ຍົກເວັ້ນ ຈາກ​ຄະນະ​ກຳມະການ​ຕິດຕາມ​ກວດກາ​ການ​ປະຕິບັດ​ຄຳ​ສັ່ງ​ປິດ​ລ້ອມ ຂອງ​ສະພາ​ຄວາມ​ໝັ້ນຄົງ ​ສປຊ. ມາ​ຮອດ​ວັນ​ທີ 6 ສິງຫາ​ນີ້ ການ​ນຳ​ສະເໜີ​ຂອງ ສ ອາ​ເມ​ຣິ​ກາ ກໍ​ໄດ້​ຮັບ​ການ​ຮັບຮອງ ຈາກ​ສະພາ​ຄວາມ​ໝັ້ນຄົງ ​ສປຊ.

    ບັນດາ​ເຈົ້າ​ໜ້າທີ່​ຂອງ ​ສປຊ ໃຫ້​ຮູ້​ວ່າ ເກືອບ​ເຄິ່ງ​ໜຶ່ງ (10 ລ້ານ​ຄົນ) ຂອງ​ປະຊາກອນ​ໃນ ​ສປປ ເກົາຫຼີ ພວມ​ປະ​ເຊີນ​ກັບ​ການ​ຂາດ​ໂພ​ສະ​ນາ​ການ ຫຼື​ຂາ​ດາດ​ບຳລຸງ​ຮ່າງກາຍ.

 

ຂ່າວທີ່ກ່ຽວຂ້ອງ