ຂ່າວຫຼ້າສຸດ

ແຈ້ງຜົນກະທົບນ້ຳຖ້ວມຢູ່ເມືອງສະໜາມໄຊ ຕໍ່ອົງການຈັດຕັ້ງສາກົນ

316 08 ສ.ຫ. 2018 ຂ່າວໜ້າ​ໜຶ່ງ
ແຈ້ງຜົນກະທົບນ້ຳຖ້ວມຢູ່ເມືອງສະໜາມໄຊ ຕໍ່ອົງການຈັດຕັ້ງສາກົນ

    ວັນ​ທີ 7 ສິງ­ຫາ 2018 ທີ່​ສູນ ICTC ນະ­ຄອນ­ຫຼວງ​ວຽງ​ຈັນ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ​ຖະ ມົນ­ຕີ​ກະ­ຊວງ​ການ​ຕ່າງ­ປະ­ເທດ ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ ກະ­ຊວງ​ພະ­ລັງ­ງານ ແລະ ບໍ່​ແຮ່ ທ່ານ​ນາງ ໃບ​ຄຳ ຂັດ­ຕິ­ຍະ ຮອງ​ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ແລະ ທ່ານ ເນົາ ບຸດ­ຕາ ຫົວ­ໜ້າ​ຫ້ອງ­ການ​ກະ­ຊວງ​ສາ­ທາ­ລະ­ນະ​ສຸກ ໄດ້​ຖະ­ແຫຼງ​ຂ່າວ​ລາຍ​ງານ​ສະ­ພາບ​ກ່ຽວ​ກັບ​ຜົນ​ກະ­ທົບ​ຈາກ​ໄພ­ພິ­ບັດ​ນ້ຳ​ຖ້ວມ​ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ຕໍ່​ບັນ­ດາ​ທູ­ຕາ­ນຸ­ທູດ ອົງ​ການ­ຈັດ­ຕັ້ງ​ສາ­ກົນ ປະ­ຈຳ​ລາວ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ສະ­ເຫຼີມ​ໄຊ ກົມ​ມະ​ສິດ ໄດ້​ກ່າວ​ວ່າ: ໃນ​ວັນ​ທີ 23 ກໍ­ລະ­ກົດ 2018 ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໄດ້​ເກີດ​ອຸ­ບັດ​ຕິ​ເຫດ​ຈາກ​ສັນ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ ເຮັດ​ໃຫ້​ເກີດ​ໄພ­ພິ­ບັດ​ນ້ຳ​ຖ້ວມ​ເຮັດ​ໃຫ້​ປະ­ຊາ­ຊົນ​ຢູ່​ເມືອງ​ສະ­ໜາມ​ໄຊ 7 ພັນ​ກວ່າ​ຄົນ​ໄດ້​ຮັບ​ຜົນ​ກະ­ທົບ ເຮືອນ​ຊານ​ບ້ານ​ຊ່ອງ​ຂອງ​ປະ­ຊາ­ຊົນ​ພັດ​ໄຫຼ​ໄປ​ກັບ​ນ້ຳ ແລະ ມີ​ຜູ້​ສູນ­ຫາຍ 131 ຄົນ ພົບ​ສົບ​ຜູ້​ເສຍ​ຊີ­ວິດ​ແລ້ວ 34 ຄົນ ປັດ­ຈຸ­ບັນ​ໄດ້​ເລັ່ງ​ສ້າງ​ທີ່​ພັກ­ຊົ່ວ­ຄາວ​ໃຫ້​ປະ­ຊາ­ຊົນ ໂດຍ​ໄດ້​ກຳ­ນົດ​ເອົາ​ຢູ່​ຈຸດ​ໂຮງ­ຮຽນ​ປະ­ຖົມ​ບ້ານ​ຫາດ​ຍາວ ບ້ານ​ຕະ​ມໍ​ຢອດ ບ້ານ​ດົງ​ບາກ ແລະ ບ້ານ​ດອນ​ບົກ.

    ພາຍ­ຫຼັງ​ເກີດ​ເຫດ ລັດ­ຖະ­ບານ​ໄດ້​ປະ­ກາດ​ໃຫ້​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເປັນ​ເຂດ​ໄພ­ພິ­ບັດ​ແຫ່ງ​ຊາດ ແລະ ໄດ້​ສ້າງ­ຕັ້ງ​ຄະ­ນະ​ກຳ­ມະ­ການ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ເພື່ອ​ວາງ​ແຜນ​ຊ່ວຍ­ເຫຼືອ​ຜູ້​ປະ­ສົບ​ໄພ ພ້ອມ​ນີ້ ໄດ້​ມີ​ການ​ຊ່ວຍ­ເຫຼືອ​ທັງ​ພາຍ​ໃນ ແລະ ຕ່າງ­ປະ­ເທດ ເປັນ­ຕົ້ນ ແມ່ນ​ສະ­ບຽງ​ອາ­ຫານ ອຸ­ປະ­ກອນ​ການ​ແພດ ແລະ ການ​ຊ່ວຍ­ເຫຼືອ​ຄົ້ນ​ຫາ​ຜູ້​ປະ­ສົບ​ໄພ ເຊິ່ງ​ພາຍ­ຫຼັງ​ລະ­ດັບ​ນ້ຳ​ຫຼຸດ​ລົງ​ຕ້ອງ​ໄດ້​ສືບ­ຕໍ່​ຄົ້ນ​ຫາ​ຜູ້​ສູນ­ຫາຍ​ຈຳ­ນວນ 100 ກວ່າ​ຄົນ​ທີ່​ຍັງ​ເຫຼືອ ເລັ່ງ​ປັບ­ປຸງ​ຟື້ນ​ຟູ​ພື້ນ­ຖານ​ໂຄງ​ລ່າງ​ທີ່​ໄດ້​ຮັບ​ຜົນ​ກະ­ທົບ ເປັນ­ຕົ້ນ ແມ່ນ​ຖະ­ໜົນ​ຫົນ­ທາງ ຂົວ​ຂ້າມ​ແມ່­ນ້ຳ ເພື່ອ​ອຳ​ນວນ​ຄວາມ​ສະ­ດວກ​ໃນ​ການ​ຊ່ວຍ­ເຫຼືອ​ປະ­ຊາ­ຊົນ​ຜູ້​ປະ­ສົບ​ໄພ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ເຂົາ­ເຈົ້າ ຈົນ​ພວກ​ເຂົາ​ສາ­ມາດ​ໃຊ້​ຊີ­ວິດ​ໄດ້​ຢ່າງ​ເປັນ​ປົກ­ກະ­ຕິ ພ້ອມ​ນີ້ ໄດ້​ມີ​ການ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ເອົາ­ໃຈ­ໃສ່​ຕໍ່​ການ​ເບິ່ງ­ແຍງ​ຊ່ວຍ­ເຫຼືອ​ຄອບ­ຄົວ​ທີ່​ມີ​ຜູ້​ເສຍ​ຊີ­ວິດ ບາດ­ເຈັບ ເດັກ​ກຳ­ພ້າ-ກຳ­ພອຍ ແລະ ຄົນ​ພິ­ການ​ສຸ­ຂະ­ພາບ​ບໍ່​ແຂງ­ແຮງ​ຢ່າງ​ໃກ້­ຊິດ ແລະ ທົ່ວ​ເຖິງ ພ້ອມ​ນີ້ ກໍ່​ຮຽກ­ຮ້ອງ​ມາ​ຍັງ​ອົງ​ການ­ຈັດ­ຕັ້ງ​ສາ­ກົນ ແລະ ປະ­ເທດ​ຕ່າງໆ​ຈົ່ງ​ສືບ­ຕໍ່​ໃຫ້­ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ທີ່​ຍັງ​ມີ​ຄວາມ​ຕ້ອງ­ການ​ຫຼາຍ​ຢ່າງ ເພື່ອ​ມາ​ຟື້ນ​ຟູ​ຊີ­ວິດ​ການ​ເປັນ​ຢູ່​ໃຫ້​ກັບ​ສູ່​ສະ­ພາບ​ປົກ­ກະ­ຕິ​ໂດຍ​ໄວ.

    ຈາກ​ນັ້ນ ຕອນ​ທ້າຍ​ພິ­ທີ​ຍັງ​ໄດ້​ເປີດ​ໂອ­ກາດ​ໃຫ້​ຜູ້​ເຂົ້າ​ຮ່ວມ​ທີ່​ມີ​ຄວາມ​ສົນ­ໃຈ​ບາງ​ບັນ­ຫາ​ໄດ້​ສົນ­ທະ­ນາ​ຖາມ-ຕອບ​ກ່ຽວ​ກັບ​ໂຄງ­ການ​ສ້າງ​ເຂື່ອນ​ໄຟ­ຟ້າ​ຢູ່​ພາຍ​ໃນ​ລາວ ວຽກ​ງານ​ສຸ­ຂະ­ພາບ ແລະ ວຽກ​ງານ​ກ່ຽວ­ຂ້ອງ​ອື່ນໆ​ຕື່ມ​ອີກ​ຈຳ­ນວນ​ໜຶ່ງ ຈາກ​ນັ້ນ ພາກ­ສ່ວນ​ກ່ຽວ­ຂ້ອງ​ກໍ່​ໄດ້​ໃຫ້​ຄວາມ​ກະ­ຈ່າງ​ແຈ້ງ​ຕໍ່​ບັນ­ຫາ​ດັ່ງ­ກ່າວ ເພື່ອ​ໃຫ້​ທູ­ຕາ­ນຸ­ທູດ ແລະ ອົງ​ການ­ຈັດ­ຕັ້ງ​ສາ­ກົນ ກໍ່​ຄື ຜູ້​ເຂົ້າ​ຮ່ວມ​ໄດ້​ມີ​ຄວາມ​ເຂົ້າ­ໃຈ​ຢ່າງ​ເລິກ­ເຊິ່ງ​ຕໍ່​ໄພ­ພິ­ບັດ​ທີ່​ເກີດ​ຂຶ້ນ​ຢ່າງ​ຮ້າຍ​ແຮງ​ຄັ້ງ​ນີ້ ສ່ວນ​ສາ­ເຫດ​ທີ່​ເຮັດ​ໃຫ້​ສັນ​ເຂື່ອນ​ແຕກ​ແມ່ນ​ຢູ່​ໃນ​ໄລ­ຍະ​ສຳ​ຫຼວດ​ເກັບ​ກຳ​ຂໍ້​ມູນ​ເພື່ອ​ຊອກ​ຫາ​ສາ­ເຫດ ຕໍ່​ກັບ​ໂຄງ­ການ​ກໍ່­ສ້າງ​ເຂື່ອນ​ແຫ່ງ​ຕ່າງໆ​ທີ່​ກຳ­ລັງ​ຢູ່​ໃນ​ໄລ­ຍະ​ກໍ່­ສ້າງ​ມາ​ຮອດ​ປັດ­ຈຸ­ບັນ​ແມ່ນ​ໄດ້​ຖືກ​ໂຈະ​ຈົນ​ກວ່າ​ຊ່ຽວ­ຊານ​ທີ່​ມີ​ປະ­ສົບ​ການ​ດ້ານ​ນີ້​ຈາກ​ຕ່າງ­ປະ­ເທດ​ມາ​ກວດ​ຜ່ານ ຈຶ່ງ​ຈະ​ອະ­ນຸ­ຍາດ​ໃຫ້​ສືບ­ຕໍ່​ດຳ­ເນີນ​ການ​ກໍ່­ສ້າງ​ຕໍ່​ໄປ ທັງ​ນີ້ ກໍ່​ເພື່ອ​ບໍ່​ໃຫ້​ເຫດ­ການ​ແບບ​ນີ້​ເກີດ​ຂຶ້ນ​ອີກ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ