ຂ່າວຫຼ້າສຸດ

ເລີ່ມເບີກຈ່າຍຄ່າຊົດເຊີຍສິ່ງກີດຂວາງ ການສ້າງເສັ້ນທາງລົດໄຟ ລາວ-ຈີນ

385 08 ສ.ຫ. 2018 ຂ່າວໜ້າ​ໜຶ່ງ

    ໂຄງ­ການ​ກໍ່­ສ້າງ​ທາງ​ລົດ­ໄຟ​ແຕ່​ຊາຍ​ແດນ​ລາວ-ຈີນ ເຖິງ​ສະ­ຖາ­ນີ​ຂົນ­ສົ່ງ​ໂດຍ­ສານ​ນະ­ຄອນ­ຫຼວງ​ວຽງ​ຈັນ​ມີ​ຄວາມ​ຍາວ 409 ກິ​ໂລ ໃນ​ນີ້ ແລວ​ທາງ​ລົດ­ໄຟ​ໄດ້​ຜ່ານ 5 ແຂວງ ຄື: ແຂວງ​ຫຼວງ​ນ້ຳ​ທາ ກວມ​ເອົາ 16,9 ກິ​ໂລ ອຸ­ດົມ​ໄຊ 126,6 ກິ​ໂລ ຫຼວງ​ພະ​ບາງ 80 ກິ​ໂລ ວຽງ​ຈັນ 145,5 ກິ​ໂລ ແລະ ນະ­ຄອນ­ຫຼວງ​ວຽງ​ຈັນ 40 ກິ​ໂລ ໄລ­ຍະ​ເວ­ລາ​ການ​ກໍ່­ສ້າງ​ແມ່ນ 5 ປີ ໂດຍ​ເລີ່ມ​ກໍ່­ສ້າງ​ວັນ​ທີ 1 ມັງ­ກອນ 2017 ແລະ ຄາດ​ວ່າ​ຈະ​ສຳ­ເລັດ​ໃນ​ວັນ​ທີ 2 ທັນ­ວາ 2021.

    ອີງ​ຕາມ​ການ​ໃຫ້​ຂໍ້​ມູນ​ຂອງ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ​ໃຫ້​ຮູ້​ວ່າ: ພາຍ­ຫຼັງ​ທີ່​ຄູ່​ມື​ການ​ເບີກ​ຈ່າຍ​ຄ່າ​ຊົດ​ເຊີຍ​ໄດ້​ຖືກ​ຮັບ­ຮອງ​ຢ່າງ​ເປັນ​ທາງ​ການ​ໃນ​ວັນ​ທີ 11 ມີ­ນາ 2018 ແລະ ລາ­ຄາ​ຫົວ­ໜ່ວຍ​ສຳ­ລັບ​ການ​ຊົດ​ເຊີຍ​ສິ່ງ​ກີດ­ຂວາງ​ຂອງ​ນະ­ຄອນ­ຫຼວງ​ວຽງ​ຈັນ ແລະ ທັງ 4 ແຂວງ​ທີ່​ມີ​ໂຄງ­ການ​ຜ່ານ ໄດ້​ມີ​ການ​ຮັບ­ຮອງ​ຈາກ​ສະ­ພາ​ທ້ອງ­ຖິ່ນ​ຢ່າງ​ເປັນ​ທາງ​ການ​ແລ້ວ ບໍ­ລິ­ສັດ​ທາງ​ລົດ­ໄຟ​ລາວ-ຈີນ ໄດ້​ສົມ­ທົບ​ກັບ​ຄະ­ນະ​ຄຸ້ມ​ຄອງ​ໂຄງ­ການ ຫ້ອງ­ການ​ປະ­ສານ​ງານ​ໂຄງ­ການ ຄະ­ນະ​ກຳ­ມະ­ການ​ໄກ່​ເກ່ຍ​ນະ­ຄອນ­ຫຼວງ ແຂວງ ແລະ ເມືອງ ບໍ­ລິ­ສັດ​ຜູ້​ຮັບ​ເໝົາ​ໄດ້​ດຳ­ເນີນ​ການ​ລົງ​ກວດ­ກາ​ຕົວ​ຈິງ ພ້ອມ​ສ້າງ​ເອ­ກະ­ສານ​ຢັ້ງ­ຢືນ​ຜົນ​ກະ­ທົບ ຈາກ​ການ​ກໍ່­ສ້າງ​ໂຄງ­ການ ເຊິ່ງ​ສາ­ມາດ​ສ້າງ​ເອ­ກະ­ສານ​ຢັ້ງ­ຢືນ​ການ​ເບີກ​ຈ່າຍ​ຄ່າ​ຊົດ​ເຊີຍ​ທີ່​ພັກ​ອາ­ໄສ ພ້ອມ​ຕອນ​ດິນ ງວດ​ທີ 1 ໄດ້​ສຳ­ເລັດ​ຢູ່ 3 ແຂວງ ມູນ​ຄ່າ 56,51 ຕື້​ກີບ ໃນ​ນີ້ ແຂວງ​ຫຼວງ​ນ້ຳ​ທາ ຈຳ­ນວນ 41 ຄອບ­ຄົວ ມູນ​ຄ່າ 28,5 ຕື້​ກີບ  ອຸ­ດົມ​ໄຊ ຈຳ­ນວນ 13 ຄອບ­ຄົວ ແລະ ໂຮງ­ຮຽນ​ມັດ­ທະ­ຍົມ 1 ແຫ່ງ ມູນ​ຄ່າ 20,34 ຕື້​ກີບ ແລະ ແຂວງ​ວຽງ​ຈັນ ຈຳ­ນວນ 22 ຄອບ­ຄົວ ມູນ​ຄ່າ 7,6 ຕື້​ກີບ ຈຳ­ນວນ​ເງິນ​ມູນ​ຄ່າ​ດັ່ງ­ກ່າວ ບໍ­ລິ­ສັດ​ທາງ​ລົດ­ໄຟ​ລາວ-ຈີນ ໄດ້​ໂອນ​ເຂົ້າ​ບັນ­ຊີ​ຂອງ​ຄະ­ນະ​ກຳ­ມະ­ການ​ໄກ່​ເກ່ຍ​ຂອງ​ແຂວງ​ແລ້ວ​ວັນ​ທີ 25 ກໍ­ລະ­ກົດ 2018 ຂັ້ນ​ຕອນ​ຕໍ່​ໄປ​ຄະ­ນະ​ກຳ­ມະ­ການ​ໄກ່​ເກ່ຍ​ແຂວງ​ຈະ​ໄດ້​ດຳ­ເນີນ​ການ​ເບີກ​ຈ່າຍ​ຄ່າ​ຊົດ​ເຊີຍ​ໃຫ້​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ຕາມ​ມູນ​ຄ່າ​ເງິນ​ທີ່​ໄດ້​ຕົກ­ລົງ​ຮັບ­ຮອງ​ນຳ​ກັນ ໂດຍ​ຜ່ານ​ບັນ­ຊີ​ທະ­ນາ­ຄານ​ຂອງ​ຜູ້​ທີ່​ຖືກ​ຜົນ​ກະ­ທົບ ຫຼື ຮັບ​ເປັນ​ເງິນ­ສົດ ສ່ວນ​ການ​ເບີກ​ຈ່າຍ​ຄ່າ​ຊົດ​ເຊີຍ​ຈຳ­ນວນ​ທີ່​ຍັງ​ເຫຼືອ​ນັ້ນ​ແມ່ນ​ຂຶ້ນ​ກັບ​ຄວາມ​ພ້ອມ​ຂອງ​ຄວາມ​ສຳ­ເລັດ​ການ​ສ້າງ​ເອ­ກະ­ສານ​ຢັ້ງ­ຢືນ​ຜົກ​ກະ­ທົບ​ເພື່ອ​ການ​ເບີກ​ຈ່າຍ​ຄ່າ​ຊົດ​ເຊີຍ ຖ້າ​ຫາກ​ບ້ານ​ໃດ ເມືອງ​ໃດ ແຂວງ​ໃດ ສ້າງ​ເອ­ກະ­ສານ​ດັ່ງ­ກ່າວ​ສຳ­ເລັດ​ຮຽບ​ຮ້ອຍ​ແລ້ວ​ກໍ່​ຈະ​ໄດ້​ດຳ­ເນີນ​ການ​ເບີກ​ຈ່າຍ​ຄ່າ​ຊົດ​ເຊີຍ​ໃຫ້​ເປັນ​ລຳ­ດັບ​ຕໍ່ໆ​ໄປ ຕາມ​ບັນ­ຊີ​ບຸ­ລິ­ມະ­ສິດ​ຂອງ​ແຂວງ ຈົນ​ກວ່າ​ການ​ເບີກ​ຈ່າຍ​ຄ່າ​ຊົດ​ເຊີຍ​ຈະ​ສຳ­ເລັດ​ເສັດ​ສິ້ນ​ໂດຍ​ສົມ­ບູນ.

ຂ່າວທີ່ກ່ຽວຂ້ອງ