ປູກຕົ້ນຈຳປາໃຫ້ມີອັດຕາປົກຄຸມສີຂຽວ

136 08 ສ.ຫ. 2018 ຂ່າວໜ້າ​ໜຶ່ງ
ປູກຕົ້ນຈຳປາໃຫ້ມີອັດຕາປົກຄຸມສີຂຽວ

    ເພື່ອ​ຄຳ­ນັບ​ຮັບ​ຕ້ອນ​ວັນ​ສຳ­ຄັນ​ຕ່າງໆ​ຂອງ​ຊາດ ແລະ ຈັດ​ຕັ້ງ​ປະ­ຕິ­ບັດ​ການ​ພັດ­ທະ­ນາ​ເມືອງ​ໄຊ​ເຊດ​ຖາ​ໃຫ້​ເປັນ​ເມືອງ​ໜ້າ​ຢູ່ ພ້ອມ​ທັງ​ຈັດ​ຕັ້ງ​ປະ­ຕິ­ບັດ​ຄຳ​ຂວັນ 6 ສ ທີ່​ນະ­ຄອນ­ຫຼວງ​ວາງ​ອອກ ໂດຍ​ສະ­ເພາະ ແມ່ນ ສ ສີ­ຂຽວ ເຮັດ​ໃຫ້​ມີ​ອັດ­ຕາ​ການ​ປົກ​ຄຸມ​ສີ­ຂຽວ 70% ໃນ​ປີ 2020.

    ວັນ​ທີ 4 ສິງ­ຫາ 2018 ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ໄຊ​ເຊດ​ຖາ​ຮ່ວມ​ກັບ​ອົງ­ການ​ພຸດ​ທະ​ສາ­ສະ­ໜາ​ສຳ­ພັນ​ເມືອງ​ໄຊ​ເຊດ​ຖາ (ອພສ) ແນວ​ລາວ​ສ້າງ​ຊາດ ພະ​ແນກ​ກະ­ສິ­ກຳ ແລະ ປ່າ­ໄມ້  ນະ­ຄອນ ຫຼວງ​ວຽງ​ຈັນ ສ້າງ​ຂະ​ບວນ​ການ​ປູກ​ຕົ້ນ​ຈຳ­ປາ​ລາວ​ຢູ່​ເສັ້ນ­ທາງ 450 ປີ ເປັນ​ກຽດ​ເຂົ້າ​ຮ່ວມ​ຂອງ​ພະ​ອາ­ຈານ ວັນ​ຄຳ ວົງ­ສາ​ສຸ­ລິນ ປະ­ທານ​ອົງ­ການ​ພຸດ​ທະ​ສາ­ສະ­ໜາ​ສຳ­ພັນ ເມືອງ​ໄຊ​ເຊດ​ຖາ ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ທ່ານ ພຸດ​ທະ​ພອນ ໂຄດ​ປັນ­ຍາ ຮອງ​ເຈົ້າ­ເມືອງ​ໄຊ​ເຊດ​ຖາ ພ້ອມ​ດ້ວຍ​ນາຍ­ບ້ານ ແລະ ພະ­ນັກ­ງານ.

    ທ່ານ ພຸດ​ທະ​ພອນ ໂຄດ​ປັນ­ຍາ ກ່າວ​ວ່າ: ຕົ້ນ­ໄມ້​ທີ່​ນຳ​ມາ​ປູກ​ໃນ​ຄັ້ງ​ນີ້ ມີ​ຕົ້ນ​ຈຳ­ປາ​ລາວ​ຈຳ­ນວນ 600 ກວ່າ​ຕົ້ນ ຄັ້ງ​ນີ້​ເປັນ​ຄັ້ງ​ທຳ​ອິດ ແລະ ຈະ​ສືບ­ຕໍ່​ປູກ​ໃຫ້​ໄດ້ 2.297 ຕົ້ນ ໃນ​ນີ້ ຕົ້ນ​ຈຳ­ປາ​ລາວ​ຈຳ­ນວນ 1.918 ຕົ້ນ ຕົ້ນ​ຫຳ​ງົວ 379 ຕົ້ນ ເຊິ່ງ​ຈະ​ປູກ​ໃສ່​ຄູ​ກາງ­ຂອງ​ເສັ້ນ­ທາງ 450 ປີ ນັບ​ແຕ່​ຊາຍ​ແດນ​ເມືອງ​ໄຊ​ທາ­ນີ ຫາ​ເມືອງ​ຫາດ​ຊາຍ​ຟອງ ໄລ­ຍະ 19 ກິ­ໂລ­ແມັດ ຈະ​ໃຫ້​ສຳ­ເລັດ​ໃນ​ທ້າຍ​ເດືອນ​ສິງ­ຫາ ບັນ­ດາ​ຕົ້ນ​ຈຳ­ປາ​ດັ່ງ­ກ່າວ​ແມ່ນ​ໄດ້​ຈາກ​ການ​ປະ­ກອບ­ສ່ວນ​ຂອງ ອພສ ເມືອງ ບ້ານ ຈຳ­ນວນ 48 ບ້ານ  ແລະ ພະ­ນັກ­ງານ ພາຍ­ຫຼັງ​ປູກ​ສຳ­ເລັດ​ແລ້ວ​ຈະ​ມອບ​ໃຫ້​ບ້ານ​ທີ່­ຢູ່​ໃກ້​ຄຽງ ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ໄຊ​ເຊດ​ຖາ ແລະ ພາກ­ສ່ວນ​ກ່ຽວ­ຂ້ອງ​ເປັນ​ຜູ້​ບົວ­ລະ­ບັດ​ຮັກ­ສາ.

ຂ່າວທີ່ກ່ຽວຂ້ອງ