ສ້າງທ່ວງທ່າທີ່ດີໃຫ້ແກ່ການຮ່ວມມືອາຊຽນບວກສາມ

    ວັນ​ທີ 4 ສິງຫາ 2018 ທີ່​ສິງກະໂປ ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີ​ກະຊວງ​ການ​ຕ່າງປະເທດ​ໄດ້​ສືບຕໍ່​ນຳພາ​ຄະນະ​ຜູ້​ແທນ​ລາວ​ ເຂົ້າ​ຮ່ວມ​ກອງ​ປະຊຸມ​ລັດຖະມົນຕີ​ຕ່າງປະເທດ​ອາ​ຊຽນ​ບວກ​ສາມ ຄັ້ງ​ທີ 19 ກອງ​ປະຊຸມ​ລັດຖະມົນຕີ​ຕ່າງປະເທດ​ຂອງ​ກອງ​ປະຊຸມ​ສຸດ​ຍອດ​ອາຊີ​ຕາເວັນ​ອອກ (ອີ​ເອ​ເອ​​ສ) ຄັ້ງ​ທີ 8 ແລະ ກອງ​ປະຊຸມ​ເວທີ​ພາກ​ພື້ນ​ອາ​ຊຽນ (ເອ​ອາ​ເອບ) ຄັ້ງ​ທີ 25.

    ກອງ​ປະຊຸມ​ລັດຖະມົນຕີ​ຕ່າງປະເທດ​ອາ​ຊຽນ​ບວກ​ສາມ ຄັ້ງ​ທີ 19 ໄດ້​ຢ້ຳ​ຄືນ​ບົດບາດ​ຄວາມ​ສຳຄັນ​ຂອງ​ຂອບ​ການ​ຮ່ວມ​ມື​ອາ​ຊຽນ​ບວກ​ສາມ​ ໃນ​ການ​ເປັນ​ກຳລັງ​ຂັບ​ເຄື່ອນ​ຫຼັກ​ເພື່ອ​ກ້າວ​ໄປ​ສູ່​ເປົ້າ​ໝາຍ​ໄລຍະ​ຍາວ​ ຂອງ​ການ​ສ້າງ​ປະຊາ​ຄົມ​ອາຊີ​ຕາເວັນ​ອອກ​ທີ່​ມີ​ອາ​ຊຽນ​ເປັນໃຈ​ກາງ ກອງ​ປະຊຸມ​ໄດ້​ສະແດງ​ຄວາມ​ຍິນ​ດີ​ຕໍ່​ຜົນສຳເລັດ​ຂອງ​ກອງ​ປະຊຸມ​ສຸດ​ຍອດ​ສາມ​ຝ່າຍ ລະຫວ່າງ ​ສປ ຈີນ ຍີ່ປຸ່ນ ແລະ ສ ເກົາຫຼີ ຄັ້ງ​ທີ 7 ໃນ​ເດືອນ​ພຶດສະພາ 2018 ທີ່​ຍີ່ປຸ່ນ ເຊິ່ງ​ໄດ້​ປະ ກອບ​ສ່ວນ​ສ້າງ​ທ່ວງ​ທ່າ​ທີ່​ດີ​ໃຫ້​ແກ່​ການ​ຮ່ວມ​ມື​ອາ​ຊຽນ​ບວກ​ສາມ ກອງ​ປະຊຸມ​ສະແດງ​ຄວາມ​ເພິ່ງ​ພໍໃຈ​ຕໍ່​ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ແຜນ​ວຽກ​ການ​ຮ່ວມ​ມື​ອາ​ຊຽນ​ບວກ​ສາມ​ສຳລັບ 2018-2020 ແລະ ບັນດາ​ຂໍ້​ສະເໜີ​ແນະ​ຂອງ​ໜ່ວຍ​ງານ​ວິໄສ​ທັດ​ອາຊີ​ຕາເວັນ​ອອກ II (EAVG II) ໃນ​ໄລຍະ​ໜຶ່ງ​ປີຜ່ານມາ ເຊິ່ງ​ກວມ​ເອົາ​ຫຼາຍ​ຂົງເຂດ ເຊັ່ນ: ການ​ຮ່ວມ​ມື​ດ້ານ​ເສດຖະກິດ ແລະ ການ​ເງິນ ການ​ເສື່ອມ​ຈອດ ຄວາມ​ໝັ້ນຄົງ​ດ້ານ​ສະບຽງ​ອາຫານ ການ​ຮັດ​ແຄບ​ຄວາມ​ແຕກ​ໂຕນ​ການ​ສຶກ​ສາ ສາ​ທາ ໄພພິບັດ​ທຳ​ມະ​ຊາດ ການ​ຕ້ານ​ອາ​ຊະ​ກຳ​ຂ້າມ​ຊາດ ແລະ ອື່ນໆ ກອງ​ປະຊຸມ​ໄດ້​ແລກປ່ຽນ​ຄວາມ​ຄິດ​ເຫັນ​ກ່ຽວ​ກັບ​ບັນຫາ​ພາກ​ພື້ນ ແລະ ສາກົນ​ທີ່​ມີ​ຄວາມ​ສົນໃຈ​ຮ່ວມ​ກັນ ເຊັ່ນ: ຄວາມ​ສຳຄັນ​ຂອງ​ການ​ຄ້າ​ຫຼາຍ​ຝ່າຍ​ແບບ​ເສລີ ແລະ ເປີດ​ກວ້າງ​ໃນ​ທ່າມກາງ​ມາດ​ຕະການ​ປົກ​ປ້ອງ​ຕະຫຼາດ​ພາຍ​ໃນ​ຂອງ​ບາງ​ປະເທດ ກອງ​ປະຊຸມ​ເຫັນ​ດີ​ເພີ່ມ​ທະວີ​ການ​ຮ່ວມ​ມື​ດ້ານ​ເສດຖະກິດ ລວມ​ທັງ​ການ​ສ້າງ​ຄວາມ​ສາມາດ​ເພື່ອ​ຮັບ​ມື​ກັບ​ຜົນ​ກະທົບ​ຂອງ​ການ​ປະຕິວັດ​ດ້ານ​ອຸດສາຫະກຳ ແລະ ການ​ພັດທະນາ​ເສດຖະກິດ​ດີ​ຈີ​ຕອນ ແລະ ເຄືອ​ຄ່າຍ​ຕົວ​ເມືອງ​ທັນ​ສະໄໝ ແລະ ຕົວ​ເມືອງ​ວັດ ທະນະ​ທຳ ອັນ​ສຳຄັນ​ກອງ​ປະຊຸມ​ໄດ້​ເນັ້ນ​ຄວາມ​ສຳຄັນ​ຂອງ​ການ​ສົ່ງເສີມ​ລະບົບ​ການ​ຄ້າ​ສາກົນ​ທີ່​ເປີດ​ກວ້າງ ແລະ ເສລີ​ແລະ ຢ້ຳ​ຄືນ​ຄວາມ​ໝາຍ​ໝັ້ນ​ໃນ​ການ​ເຮັດ​ວຽກ​ຮ່ວມ​ກັນ ເພື່ອ​ເລັ່ງ​ລັດ​ການ​ເຈລະຈາ​ສັນຍາ​ຄູ່​ຮ່ວມ​ທາງ​ເສດຖະກິດ​ແບບ​ຮອບດ້ານ​ລະດັບ​ພາກ​ພື້ນ (RCEP) ໃຫ້​ສຳເລັດ​ພາຍ​ໃນ​ທ້າຍ​ປີ 2018.

    ພ້ອມ​ນັ້ນ ທ່ານ ສະເຫຼີມ​ໄຊ ກົມ​ມະ​ສິດ ຍັງ​ໄດ້​ສະແດງ​ຄວາມ​ຂອບໃຈ​ຕໍ່​ການ​ຊ່ວຍເຫຼືອ​ຂອງ​ບັນດາ​ປະເທດ​ເພື່ອນ​ມິດ ແລະ ອົງການ​ຮ່ວມ​ມື​ຕ່າງໆ​ໃນ​ການ​ກູ້​ໄພ ແລະ ບັນເທົາ​ທຸກ​ໄພ​ນ້ຳ​ຖ້ວມ​ໃນ​ຄັ້ງ​ນີ້ ກອງ​ປະຊຸມ​ຍັງ​ໄດ້​ຮັບຮອງ​ເອົາ​ບັນດາ​ກິດຈະກຳ​ຂອງ ARF ທີ່​ຈະ​ຈັດ​ຕັ້ງ​ປະຕິບັດ​ສົກ​ປີ 2018-2019 ຖະແຫຼງການ​ເວທີ​ພາກ​ພື້ນ​ອາ​ຊຽນ​ວ່າ​ດ້ວຍ​ການ​ຮ່ວມ​ມື​ດ້ານ​ການ​ຄຸ້ມ​ຄອງ​ໄພພິບັດ ກອງ​ປະຊຸມ​ໄດ້​ຮັບຮອງ​ການ​ເປັນ​ປະທານ​ຮ່ວມ​ຂອງ​ລາວ ຈີນ ແລະ ກາ​ນາ​ດາ ໃນ​ການ​ເປັນ​ປະທານ​ຮ່ວມ​ກອງ​ປະຊຸມ​ເວທີ​ພາກ​ພື້ນ​ອາ​ຊຽນ​ກ່ຽວ​ກັບ​ການ​ບັນເທົາ​ທຸກ​ໄພພິບັດ (ARF ISM on Disaster Relief) ສຳລັບ ຊຸມ​ປີ​ຕໍ່ໜ້າ ພ້ອມ​ດຽວ​ກັນ​ກອງ​ປະຊຸມ​ຍັງ​ໄດ້​ຢ້ຳ​ຄືນ​ຄວາມ​ສຳຄັນ​ຂອງ​ຫຼັກການ​ໃນ​ການ​ປຶກສາ​ຫາລື ແລະ ຖື​ເອົາ​ການ​ຕົກລົງ​ດ້ວຍ​ຄວາມ​ເປັນ​ເອກະສັນ ແລະ ດຳເນີນ​ໄປ​ໃນ​ຈັງຫວະ​ທີ່​ທຸກ​ຝ່າຍ​ມີ​ຄວາມ​ສະບາຍ​ໃຈ ສຳລັບ​ການ​ຮ່ວມ​ມື​ໃນ​ຂອບ​ເວທີ​ພາກ​ພື້ນ​ອາ​ຊຽນ​ໃນ​ອະນາຄົດ.