ນະຄອນຫຼວງ ຈັດສົ່ງເຄື່ອງໄປຊ່ວຍເຫຼືອຜູ້ປະສົບໄພນ້ຳຖ້ວມຢູ່ 3 ແຂວງ

168 07 ສ.ຫ. 2018 ຂ່າວໜ້າ​ໜຶ່ງ

    ສູນ​ຮັບ​ບໍລິຈາກ​ຫ້ອງ​ວ່າການ​ນະຄອນຫຼວງ​ວຽງ​ຈັນ ເປັນ​ສູນ​ໜຶ່ງ​ທີ່​ມີ​ຫຼາຍ​ພາກສ່ວນ ທັງ​ພາກ​ລັດ ແລະ ຫົວໜ່ວຍ​ທຸລະ​ກິດ​ຕ່າງໆ ທັງ​ພາຍ​ໃນ ແລະ ຕ່າງປະເທດ ພ້ອມ​ດ້ວຍ​ນິຕິບຸກຄົນ ກໍ່​ຄື ຊາວ​ນະຄອນ ຫຼວງ​ວຽງ​ຈັນ ໄດ້​ນຳ​ເອົາ​ວັດຖຸ​ປັດ​ໄຈ ເຄື່ອງ​ບໍລິໂພກ-ອຸປະໂພກ ແລະ ເງິນສົດ​ຈຳນວນ​ຫຼວງຫຼາຍ​ມາ​ມອບ​ໃຫ້​ຄະນະ​ຮັບຜິດຊອບ​ຂັ້ນ​ນະຄອນຫຼວງ​ວຽງ​ຈັນ ເພື່ອ​ໄປ​ຊ່ວຍເຫຼືອ​ປະຊາຊົນ​ຜູ້​ປະສົບ​ໄພ​ນ້ຳ​ຖ້ວມ​ຢູ່​ຫຼາຍ​ແຂວງ​ທົ່ວ​ປະເທດ ໂດຍ​ສະເພາະ ກໍ່​ແມ່ນ​ຢູ່​ເມືອງ​ສະໜາມ​ໄຊ ແຂວງ​ອັດ​ຕະ​ປື ທີ່​ໄດ້​ຮັບ​ຜົນ​ກະທົບ​ຈາກ​ໄພພິບັດ​ນ້ຳ​ຖ້ວມ​ຮ້າຍ​ແຮງ​ກວ່າ​ໝູ່.

    ພາຍຫຼັງ​ທີ່​ລະດົມ​ໄດ້​ຈາກ​ສັງຄົມ​ມາ​ທ້ອນໂຮມ​ໄວ້​ຢູ່​ຫ້ອງ​ວ່າການ​ນະຄອນຫຼວງ​ວຽງ​ຈັນ ເປັນ​ຈຳນວນ​ຫຼວງ​ແລ້ວ ທາງ​ຄະນະ​ຮັບຜິດຊອບ​ກໍ່​ໄດ້​ຈັດ​ສົ່ງ​ໄປ​ຍັງ​ແຂວງ​ຕ່າງໆ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ປີ 2018 ສະເພາະ​ຈັດ​ສົ່ງ​ໄປ​ເມືອງ​ສະໜາມ​ໄຊ ແຂວງ​ອັດ​ຕະ​ປື ມາ​ຮອດ​ວັນ​ທີ 2 ສິງຫາ 2018 ມີ​ທັງ​ໝົດ 3 ງວດ​ແລ້ວ  ໂດຍ​ໄດ້​ຈັດ​ສົ່ງ​ໄປ​ຫຼາຍ​ຄັນ​ລົດ​ເຊ​ອາ​ຂອງ​ທະຫານ ແລະ ເງິນສົດ​ຫຼາຍ​ຮ້ອຍ​ລ້ານ​ກີບ ນອກ ຈາກ​ນີ້ ຍັງ​ໄດ້​ຈັດ​ສົ່ງ​ເຄື່ອງ​ອຸປະໂພກ-ບໍລິໂພກ ລວມ​ມູນ​ຄ່າ​ທັງ​ໝົດ 90 ລ້ານ​ກີບ ພ້ອມ​ເງິນສົດ 10 ລ້ານ​ກີບ ໄປ​ໃຫ້​ແຂວງ​ຄຳ​ມ່ວນ ແລະ ເຄື່ອງ​ອຸປະໂພກ-ບໍລິໂພກ ຈຳນວນ 2 ຄັນ​ລົດ​ເຊ​ອາ​ຂອງ​ທະຫານ​ໄປ​ຊ່ວຍ​ແຂວງ​ອຸດົມ​ໄຊ ເພື່ອ​ເປັນ​ການ​ບັນເທົາ​ທຸກ​ເບື້ອງ​ຕົ້ນ ສ່ວນ​ເຄື່ອງ​ອຸປະໂພກ-ບໍລິໂພກ ແລະ ເງິນ ສົດ​ທີ່​ຍັງ​ເຫຼືອ​ນັ້ນ ນະຄອນຫຼວງ​ວຽງ​ຈັນ​ຈະ​ສືບຕໍ່​ທະຍອຍ​ສົ່ງ​ໄປ​ມອບ​ໃຫ້​ປະຊາຊົນ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ຢູ່​ແຕ່​ລະ​ແຂວງ.

ຂ່າວທີ່ກ່ຽວຂ້ອງ