ຂ່າວຫຼ້າສຸດ

ທົ່ວປະເທດ ມີຜູ້ເສຍຊີວິດຍ້ອນພະຍາດໄຂ້ຍຸງລາຍ 13 ຄົນ

186 07 ສ.ຫ. 2018 ຂ່າວໜ້າ​ໜຶ່ງ

    ໄຂ້ຍຸງ​ລາຍ ຫຼື ໄຂ້ເລືອດອອກ ເປັນ​ພະຍາດ​ໜຶ່ງ​ທີ່​ທຸກ​ຄົນ​ຄວນ​ເອົາໃຈໃສ່​ເບິ່ງແຍງ​ສຸຂະພາບ​ຂອງ​ຕົນ​ເອງ​ໂດຍ​ປ້ອງ​ກັນ​ບໍ່​ໃຫ້​ຍຸງ​ລາຍ​ມາ​ກັດ ກໍ່​ຄື ການ​ເອົາໃຈໃສ່​ຄວບ​ຄຸມ ແລະ ຕັດ​ວົງ​ຈອນ​ໜອນ​ນ້ຳ​ຍຸງ​ລາຍ​ໄປ​ຄຽງ​ຄູ່​ກັບ​ການ​ປະຕິບັດ​ຫຼັກການ 5 ປ ທີ່​ກະຊວງ​ສາທາລະນະ​ສຸ​ກວາງ​ອອກ.  

    ທ່ານ ຈັນທະ​ໄລ ໄຊ​ຍະ​ວົງ ຫົວໜ້າ​ຂະແໜງ​ຄວບ​ຄຸມພະ​ຍາດ​ຕິດຕໍ່ ພະ​ແນກ​ສາທາລະນະ​ສຸກ​ນະຄອນຫຼວງ​ວຽງ​ຈັນ ໄດ້​ໃຫ້​ຮູ້​ວ່າ: ນັບ​ແຕ່​ວັນ​ທີ 30 ທັນວາ 2017 ຫາ ວັນ​ທີ 1 ສິງຫາ 2018 ທົ່ວ​ປະເທດ​ມີ​ກໍລະນີ​ສະ​ສົມ​ຈາກ​ພະຍາດ​ໄຂ້ຍຸງ​ລາຍ​ທັງ​ໝົດ 3.230 ກໍລະນີ  ແລະ ເສຍ​ຊີວິດ​ແລ້ວ 13 ກໍ ລະ​ນີ ໃນ​ນັ້ນ ແຂວງ​ອັດ​ຕະ​ປື ແລະ ແຂວງ​ຈຳປາ​ສັກ ແຂວງ​ລະ 2 ກໍລະນີ ແຂວງ​ສະຫວັນ​ນະ​ເຂດ 6 ກໍລະນີ ແຂວງ​ສາລະ​ວັນ ໄຊ​ຍະ​ບູ​ລີ ແຂວງ​ອຸດົມ​ໄຊ ແຂວງ​ລະ 1 ກໍລະນີ .

    ສຳລັບ​ນະຄອນຫຼວງ​ວຽງ​ຈັນ​ໄດ້​ມີ​ກໍລະນີ​ສະ​ສົມ 353 ກໍລະນີ ໃນ​ນັ້ນ ເມືອງ​ໄຊ​ທານີ 134 ກໍລະນີ ໄຊ​ເຊດ​ຖາ 53 ກໍລະນີ ສີ​ໂຄດ​ຕະບອງ 41 ກໍລະນີ ຫາດ​ຊາຍ​ຟອງ 32 ກໍລະນີ ຈັນທະ​ບູ​ລີ 29 ກໍລະນີ ນາ​ຊາຍ​ທອງ 26 ກໍລະນີ ສີ​ສັດຕະ​ນາກ 24 ກໍລະນີ ປາກ​ງື່ມ 12 ກໍລະນີ ແລະ ເມືອງ​ສັງ​ທອງ 2 ກໍລະນີ ຕໍ່​ກັບ​ກໍລະນີ​ທີ່​ເກີດ​ຂຶ້ນ​ໃໝ່ ຖ້າ​ພົບ​ເຫັນ​ຂະແໜງ​ຄວບ​ຄຸມພະ​ຍາດ​ຕິດຕໍ່ ໄດ້​ໃຫ້​ພະນັກງານ​ວິຊາ​ການ​ລົງ​ໄປ​ແນະນຳ​ໃຫ້ ​ອສບ ບ້ານ​ເປັນ​ເຈົ້າ​ການ​ປຸກລະດົມ​ປະຊາຊົນ​ສ້າງ​ຂະ​ບວນ​ການ​ທຳລາຍ​ແຫຼ່ງ​ເພາະ​ພັນ​ຍຸງ​ລາຍ ອະນາໄມ ຂວ້ຳ​ກະໂປະ​ກະ​ປ໋ອງ ແລະ ພາຊະນະ​ຕ່າງໆ​ເພື່ອ​ຕັດ​ວົງ​ຈອນ​ໜອນ​ນ້ຳ​ຍຸງ​ລາຍ ໄປ​ຄຽງ​ຄູ່​ກັບ​ການ​ປະຕິບັດ​ຫຼັກການ 5 ປ ພາຍຫຼັງ​ຈັດ​ຕັ້ງ​ປະຕິບັດ​ແລ້ວ ຖ້າ​ຄອບຄົວ​ໃດ​ຫາກ​ຍັງ​ກວດ​ພົບ   ໜອນ​ນ້ຳ​ໃນ​ບໍລິເວນ​ອ້ອມ​ເຮືອນ​ແມ່ນ​ໄດ້​ກ່າວ​ເຕືອນ ແລະ ຖ້າ​ບໍ່​ຈັດ​ຕັ້ງ​ປະຕິບັດ ກໍ່​ຄື ທຳລາຍ​ຈະ​ຖືກ​ປັບ  ໃໝ​ຕາມ​ລະບຽບ​ການ ການຈັດຕັ້ງ​ປະຕິບັດ​ລະບຽບ​ດັ່ງກ່າວ​ນີ້ ກໍ່​ເປັນ​ຫ່ວງ​ເປັນ​ໃຍ​ຕໍ່​ສຸຂະພາບ​ຂອງ​ປະຊາຊົນ ສະນັ້ນ ຈຶ່ງ​ຮຽກຮ້ອງ​ໃຫ້​ທຸກ​ຄົນ​ຢ່າ​ເບິ່ງ​ຂ້າມ​ໃນ​ການ​ເບິ່ງແຍງ​ສຸຂະພາບ​ຂອງ​ຕົນ​ເອງ ໂດຍ​ການ​ເອົາໃຈໃສ່​ຕ້ານ ແລະ ສະກັດ​ກັ້ນ​ບໍ່​ໃຫ້​ພະຍາດ​ນີ້​ເກີດ​ຂຶ້ນ​ຢູ່​ໃນ​ສະມາຊິກ​ຄອບຄົວ​ຕົນ​ເອງ.

ຂ່າວທີ່ກ່ຽວຂ້ອງ