ຂ່າວຫຼ້າສຸດ

ເທຄວັນໂດລາວ ຍາດໄດ້ 3 ຫຼຽນຄຳ ຫວຽດນາມ ໂອເພັນ

240 07 ສ.ຫ. 2018 ວົງຈອນກີລາ
ເທຄວັນໂດລາວ ຍາດໄດ້ 3 ຫຼຽນຄຳ ຫວຽດນາມ ໂອເພັນ

    ອີງ​ຕາມ​ຂໍ້​ມູນ​ຈາກ​ສະ­ຫະພັນ​ເທ​ຄວັນ​ໂດ​ແຫ່ງ​ຊາດ​ລາວ ໄດ້​ແຈ້ງ​ໃຫ້​ຮູ້​ວ່າ: ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ລາວ ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ເທ​ຄວັນ​ໂດ ລາຍ­ການ ຫວຽດ­ນາມ ໂອ​ເພັນ 2018 ທີ່​ນະ­ຄອນ​ດາ​ນັງ ສສ ຫວຽດ­ນາມ ເປັນ​ເຈົ້າ­ພາບ ລະ­ຫວ່າງ​ວັນ​ທີ 28-29 ກໍ​ລະກົດ ຜ່ານ​ມາ ທັງ​ໝົດ 9 ຄົນ ຍິງ 3 ຄົນ ຢ່າງ­ໃດ​ກໍ່​ຕາມ ກ່ອນ​ໜ້າ​ນີ້​ບໍ່​ດົນ ນັກ­ກີ­ລາ​ເທ​ຄວັນ​ໂດ​ທີມ​ຊາດ​ລາວ 2 ຄົນ ປະ­ເພດ​ຟ້ອນ​ປຸ່ມ​ເຊ້ ສາ­ມາດ​ຄວ້າ 1 ຫຼຽນ ຄຳ 1 ຫຼຽນ​ທອງ ລາຍ­ການ​ນາໆຊາດ Jeju World Taekwondo Hanmadang 2018 ທີ່ ສ ເກົາ­ຫຼີ ໃນ​ທ້າຍ​ອາ­ທິດ​ຜ່ານ​ມາ ເຊິ່ງ​ຫຼຽນ​ຄຳແມ່ນ​ໄດ້​ຈາກ​ນາງ ກິ​ດາ​ວອນ ພິ­ລາ​ວົງ ແລະ ຫຼຽນ​ທອງ ໄດ້​ຈາກ​ທ້າວ ສຸກ​ທະ­ວີ ປັນຍາ​ສິດ.

    ສຳ­ລັບ​ຜົນ­ງານ​ໃນ​ການ​ແຂ່ງຂັນ ຫວຽດ­ນາມ ໂອ​ເພັນ 2018 ຄັ້ງ​ນີ້ ແມ່ນ​ໄດ້​ຈາກ​ປະ­ເພດ​ຕໍ່­ສູ້​ປ້ອງ​ກັນ​ຕົວ 3 ຫຼຽນ​ຄຳ ທ້າວ ສອນ​ໄຊ ມັງ​ເຄືອ ຮຸ່ນ​ນ້ຳ­ໜັກ 74 ກິ​ໂລ ທ້າວ ສິດ­ທິ­ກອນ ສໍ​ພາບ​ມີ​ໄຊ ຮຸ່ນ​ນ້ຳ­ໜັກ 68 ກິ​ໂລ ແລະ ທ້າວ ພູ​ນາ​ທອນ ສຸກ​ສະ­ຫວັນ ຮຸ່ນ​ນ້ຳ­ໜັກ 63 ກິ​ໂລ 4 ຫຼຽນ​ເງິນ ໄດ້​ຈາກ ທ້າວ ສົມ​ສະ­ນຸກ ພົມ​ມະ​ວັນ ຮຸ່ນ​ນ້ຳ­ໜັກ 74 ກິ​ໂລ ທ້າວ ພັດ­ທະ­ນາ ໄຊ​ຍະ​ກຸມ­ມານ ຮຸ່ນ​ນ້ຳ­ໜັກ 63 ກິ​ໂລ ນາງ ສອນ​ສະ­ຫວັນ ສີ​ລິ​ມະ­ໂນ​ທຳ ຮຸ່ນ​ນ້ຳ­ໜັກ 68 ກິ​ໂລ ແລະ ນາງ ອາ​ລິ​ສາ ປັນ­ຍາ​ສິ​ຣິ ຮຸ່ນ​ນ້ຳ­ໜັກ 53 ກິ​ໂລ ສ່ວນ 1 ຫຼຽນ​ທອງ​ໄດ້​ຈາກນາງ ທິ­ດາ​ສະ­ຫວັນ ສົດ​ທະ​ຈິດ ຮຸ່ນ​ນ້ຳ­ໜັກ 68 ກິ​ໂລ.

    ຫຼັງ​ຈາກ​ນີ້ ນັກ­ກີ­ລາ​ເທ​ຄວັນ​ໂດ​ທິມ​ຊາດ​ລາວ ຈຳ­ນວນ 6 ຄົນ ຍິງ 2 ຄົນ ຈະ​ໄດ້​ກຽມ​ຄວາມ​ພ້ອມ​ອອກ​ເດີນ­ທາງ​ໃນ​ວັນ​ທີ 15 ສິງ­ຫາ 2018 ນີ້ ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ ຄັ້ງ​ທີ 18 ທີ່​ນະ­ຄອນ­ຫຼວງ​ຈາ​ກາ​ຕາ ແລະ ເມືອງ​ປາ​ເລັມ​ບັງ ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ລະ­ຫວ່າງ​ວັນ​ທີ 18 ສິງ­ຫາ ຫາ 2 ກັນ­ຍາ 2018.

ຂ່າວທີ່ກ່ຽວຂ້ອງ