ຣັດ​ເຊຍ​ນຳ​ໃຊ້​ລະດັບ​ພາສີ​ໃໝ່​ເພື່ອ​ຕອບ​ໂຕ້​ການ​ປິດ​ລ້ອມ​ຂອງ ສ ອາ​ເມ​ຣິ​ກາ

134 07 ສ.ຫ. 2018 ຂ່າວຕ່າງປະເທດ
ຣັດ​ເຊຍ​ນຳ​ໃຊ້​ລະດັບ​ພາສີ​ໃໝ່​ເພື່ອ​ຕອບ​ໂຕ້​ການ​ປິດ​ລ້ອມ​ຂອງ ສ ອາ​ເມ​ຣິ​ກາ

    ຣັດ​ເຊຍ ເລີ່ມ​ປະຕິບັດ​ລະດັບ​ພາສີ​ໃໝ່ ຕໍ່​ສິນຄ້າ​ຫຼາຍ​ລາຍການ ທີ່​ນຳ​ເຂົ້າ​ມາ​ຈາກ  ສ ອາ​ເມ​ຣິ​ກາ ນັບ​ແຕ່​ວັນ​ທີ 5 ສິງຫາ​ນີ້​ເປັນຕົ້ນ​ໄປ ຊຶ່ງ​ນັບ​ວ່າ​ເປັນ​ມາດ​ຕະການ​ຕອບ​ໂຕ້​ຕໍ່​ລະດັບ​ພາສີ ທີ່ ສ ອາ​ເມ​ຣິ​ກາ ປະຕິບັດ​ຕໍ່​ເຫຼັກ​ກ້າ ແລະ​ອາ​ລູ​ມີ​ນຽມ​ຂອງ​ຣັດ​ເຊຍ. ໃນ​ນັ້ນ ພາສີ​ນຳ​ເຂົ້າ​ສຳລັບ ພາຫະນະ​ການ​ຂົນສົ່ງ​ຈຳນວນ​ໜຶ່ງ ຕະຫຼອດ​ຮອດ​ເຄື່ອງ​ຈັກ​ກໍ່ສ້າງ​ທາງບົກ ອຸປະກອນ​ນ້ຳມັນ-ແກ​​ັສ ເຄື່ອງມື​ການ​ປຸງ​ແຕ່​ເຫຼັກ​ກ້າ ແລະ ​ເຈາະ​ຫີນ ສາຍ​ໃຍ​ແກ້ວ ແມ່ນ​ເພີ່ມ​ຈາກ 25% ຂຶ້ນ​ເປັນ 40%.

    ຈາກ​ຄວາມ​ເສຍ​ຫາຍ​ທີ່​ເກີດ​ຂຶ້ນ​ຈາກ​ພາສີ​ຂອງ ສ ອາ​ເມ​ຣິ​ກາ ຄາດ​ວ່າ​ມີ​ທີ່​ປະມານ  537,6 ລ້ານ​ໂດ​ລາ​ສະຫະລັດ​ນັ້ນ ມາ​ບັດ​ນີ້ ລະດັບ​ພາສີ​ເພີ່ມ​ເຕີມ ຊຶ່ງ​ຣັດ​ເຊຍ ປະຕິບັດ​ຕໍ່​ສິນຄ້າ​ຂອງ ສ ອາ​ເມ​ຣິ​ກາ ຈະ​ຊ່ວຍ​ໃຫ້​ຣັດ​ເຊຍ​ທົດ​ແທນ​ຄືນ​ໄດ້ 87,6 ລ້ານ​ໂດ​ລາ​ສະຫະລັດ ພາຍ​ໃນ​ປີ​ນີ້. ສ່ວນ​ທີ່​ຍັງ​ເຫຼືອ​ອີກ 450 ລ້ານ​ໂດ​ລາ​ສະຫະລັດ ແມ່ນ​ຈະ​ໄດ້​ຮັບ​ການ​ທົດ​ແທນ​ຄືນ ພາຍ​ໃນ​ສາມ​ປີ​ຖັດ​ໄປ.

    ທ່ານ ມາກ​ຊິມ ໂອ​ເຣ​​ສ​ກິນ ລັດຖະມົນຕີ​ພັດທະນາ​ເສດຖະກິດ​ຂອງ​ຣັດ​ເຊຍ ເວົ້າ​ວ່າ ການ​ດຳເນີນ​ການ​ດັ່ງກ່າວ​ຂອງ​ຣັດ​ເຊຍ ແມ່ນ​ແທດເໝາະ​ກັບ​ການ​ກຳນົດ​ຂອງ ອົງການ​ການ​ຄ້າ​ໂລກ (WTO). ປັດຈຸບັນ​ນີ້ ການ​ນຳ​ເຂົ້າ​ສິນຄ້າ​ຂອງ​ຣັດ​ເຊຍ ຈາກ ສ ອາ​ເມ​ຣິ​ກາ ບັນລຸ​ມູນ​ຄ່າ 3,16 ຕື້ ໂດ​ລາ​ສະຫະລັດ/ປີ.

 

ຂ່າວທີ່ກ່ຽວຂ້ອງ