ຂ່າວຫຼ້າສຸດ

ເກີດ​ເຫດການ​ລອບ​ສັງຫານ​ຜູ້ນຳ​ເວ​ເນ​ຊູ​ເອ​ລາ

202 07 ສ.ຫ. 2018 ຂ່າວຕ່າງປະເທດ
ເກີດ​ເຫດການ​ລອບ​ສັງຫານ​ຜູ້ນຳ​ເວ​ເນ​ຊູ​ເອ​ລາ

    ຕາມ​ຂ່າວ​ຕ່າງ​ປະ​ເດ ໃນ​ເວລາ​ທີ່​ປະທານາທິບໍດີ​ເວ​ເນ​ຊູ​ເອ​ລາ ນີ​ໂກ​ລາ​​ສ ມາ​ດູ​ໂຣ ພວມ​ກ່າວ ປາ​ໄສ​ຢູ່​ໃນ​ພິທີ​ສະເຫຼີມສະຫຼອງ​ວັນ​ສ້າງຕັ້ງ​ກອງ​ກຳລັງ​ປ້ອງ​ກັນ​ແຫ່ງ​ຊາດ​ເວ​ເນ​ຊູ​ເອ​ລາ ຄົບຮອບ 81 ປີ ຊຶ່ງ​ຈັດ​ຂຶ້ນ​ໃນ​ຕອນ​ບ່າຍ​ຂອງ​ວັນ​ທີ 4 ສິງຫາ​ນີ້ (ຕາມ​ເວລາ​ໃນ​ທ້ອງຖິ່ນ) ກໍ​ມີ​ອຸປະກອນ​ການບິນ ແບບ​ບໍ່​ມີ​ຄົນ​ຂັບ ຈຳນວນ 2 ລຳ ທີ່​ຕິດ​ຕັ້ງ​ວັດຖຸ​ລະເບີດ ໄດ້​ຖືກ​ກະ​ຕຸ້ນ​ໃຫ້​ເຄື່ອນ​ໄຫວ ແລະ​ ເກີດ​ລະເບີດ​ຂຶ້ນ ເປັນ​ເຫດ​ໃຫ້​ທະຫານ​ໄດ້​ຮັບ​ບາດເຈັບ 7 ຄົນ.

    ປະທານາທິບໍດີ ມາ​ດູ​ໂຣ ພ້ອມ​ດ້ວຍ​ການ​ນຳ​ຄົນ​ອື່ນໆ​ຂອງ​ເວ​ເນ​ຊູ​ເອ​ລາ ທີ່​ມີໜ້າ​ຢູ່​ໃນ ພິທີ​ດັ່ງກ່າວ ໄດ້​ຮັບ​ການ​ອົບ​ພະ​ຍົບ​ອອກ​ໄປ​ຢ່າງ​ປອດ​ໄພ. ຫຼັງ​ຈາກ​ນັ້ນ​ບໍ່​ພໍ​ເທົ່າໃດ​ຊົ່ວໂມງ ປະທານາທິບໍດີ ມາ​ດູ​ໂຣ ໄດ້​ກ່າວ​ຜ່ານ​ທາງ​ໂທລະພາບ ໂດຍ​ໄດ້​ກ່າວ​ຫາ​ວ່າ​ກົນອຸບາຍ ລອບ​ສັງຫານ​ທີ່​ເກີດ​ຂຶ້ນ​ນັ້ນ ເປັນ​ການ​ດຳເນີນ​ການ​ໂດຍ​ບັນດາ​ອົງການ​ຝ່າຍ​ຂວາ​ຢູ່​ພາຍ​ໃນ​ປະເທດ ແລະ ​ຢູ່​ເບື້ອງ​ຫຼັງ​ກໍ​ແມ່ນ​ກຸ່ມ​ຂົວ​ຈັດ​ຂອງ​ໂກ​ລົມ​ບີ ເພື່ອ​ຫວັງ​ເຮັດ​ໃຫ້​ເກີດ​ຄວາມ​ບໍ່​ສະຫງົບ​ຢູ່​ໃນ ເວ​ເນ​ຊູ​ເອ​ລາ. ໃນ​ຂະນະ​ດຽວ​ກັນ ປະທານາທິບໍດີ ມາ​ດູ​ໂຣ ກໍ​ແຈ້ງ​ໃຫ້​ຮູ້​ວ່າ​ອົງການ​ຮັກສາ ຄວາມ​ສະຫງົບ​ຂອງ​ເວ​ເນ​ຊູ​ເອ​ລາ ໄດ້​ຈັບ​ກຸມ​ເປົ້າ​ໝາຍ​ຈຳນວນ​ໜຶ່ງ ທີ່​ເຂົ້າ​ຮ່ວມ​ໃນ​ເຫດການ ລອບ​ສັງຫານ​ຫຼົ້ມ​ເຫຼວ ທີ່​ມຸ່ງ​ໃສ່​ຕົວ​ທ່ານ​ເອງ​ໃນ​ເທື່ອ​ນີ້ ແລະ​ ວ່າ​ເປົ້າ​ໝາຍ​ອື່ນໆ​ທີ່​ຍັງ​ເຫຼືອ ກໍ​ພວມ​ສືບຕໍ່​ຖືກ​ຕາມ​ລ່າ.

    ທາງ​ດ້ານ​ທ່ານ ໂຈກ ໂຣດ​ຣີ​ເກ​​ສ ລັດຖະມົນຕີ​ຖະແຫຼງ​ຂ່າວ​ຂອງ​ເວ​ເນ​ຊູ​ເອ​ລາ ໄດ້​ກ່າວ​ໃນ​ວັນ​ທີ 5 ສິງຫາ​ນີ້​ວ່າ  ພວກ​ທີ່ຢູ່​ເບື້ອ​ຫຼັງ​ກົນ​ອຸ​ບາບ​ລອບ​ສັງຫານ​ປະທານາທິບໍດີ ມາ​ດູ​ໂຣ ໄດ້​ກະກຽມ​ໃຫ້​ແກ່​ແຜນການ​ນີ້ ຢ່າງ​ໜ້ອຍ​ໃນ​ເວລາ 6 ເດືອນ. ກອງ​ກຳລັງ​ຮັກສາ​ຄວາມ​ສະຫງົບ ຂອງ​ເວ​ເນ​ຊູ​ເອ​ລາ ໄດ້​ຍິງ​ເຮືອບິນ​ແບບ​ບໍ່​ມີ​ຄົນ​ຂັບ​ທີ່​ຕິດ​ຕັ້ງ​ວັດຖຸ​ລະເບີດ ທີ່​ຖືກ​ໃຊ້​ເພື່ອ​ລອບ​ສັງຫານ ປະທານາທິບໍດີ​ມາ​ດູ​ໂຣ ນັ້ນ​ຕົກ​ຈຳນວນ 3 ລຳ. ໃນ​ຂະນະ​ດຽວ​ກັນ ເຈົ້າ​ໜ້າທີ່​ຮັກສາ​ຄວາມ​ສະຫງົບ ກໍ​ຈັບ​ກຸມ​ຜູ້​ກໍ່​ເຫດ​ໄດ້​ຈຳນວນ​ໜຶ່ງ​ຢູ່​ໃນ​ທີ່​ເກີດ​ເຫດ ຊຶ່ງ​ໃນ​ເວລາ​ນີ້​ພວກ​ເຂົາ​ພວມ​ໃຫ້​ຂໍ້​ມູນ ກ່ຽວ​ກັບ ກົນອຸບາຍ​ລອບ​ສັງຫານ ທີ່​ໄດ້​ກະກຽມ​ມາ​ເປັນ​ເວລາ​ຢ່າງ​ໜ້ອຍ 6 ເດືອນ​ນັ້ນ.

 

ຂ່າວທີ່ກ່ຽວຂ້ອງ