ຂ່າວຫຼ້າສຸດ

ຄອລ ທົບທວນວຽກງານທີ່ພົ້ນເດັ່ນ 6 ເດືອນຕົ້ນປີ

267 06 ສ.ຫ. 2018 ວົງຈອນກີລາ
ຄອລ ທົບທວນວຽກງານທີ່ພົ້ນເດັ່ນ 6 ເດືອນຕົ້ນປີ

    ກອງ​ປະຊຸມ​ສາມັນ ​ເພື່ອທົບ​ທວນ​ຄືນວຽກ​ງານ​ທີ່​ພົ້ນ​ເດັ່ນ 6 ເດືອນຕົ້ນປີ ແລະ ທິດທາງແຜນ ການທ້າຍປີ 2018 ຂອງຄະນະ​ກໍາມະການ​ໂອ​ແລມປິກ​ແຫ່ງ​ຊາດ​ລາວ (ຄອລ) ຈັດຂຶ້ນ​ວັນ​ທີ 3 ສິງຫາ 2018 ​ເປັນ​ປະທານ​ຂອງ​ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກສາ​ທິການ ​ແລະ ກີລາ (ສສກ) ທັງ​ເປັນ​ທານ​ປະທານ ຄອລ ມີ​ທ່ານ ບົວ​ລານ ສິລິ​ປັນຍາ ຮອງ​ລັດຖະ ມົນຕີ ສສກ ຮອງ​ປະທານ ຄອລ ພ້ອມ​ດ້ວຍ​​ຄະນະ​ບໍລິຫານ​ງານ ຄອລ ຄະນະ​ບໍລິ​ຫານ​ສະຫະພັນ​ກີລາ​ແຫ່ງ​ຊາດ​ແຕ່ລະ​ປະ​ເພດ​ກີລາ ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

      ​​​ ທ່ານ ສົມ​ພູ ພົງສາ ຜູ້​ຊ່ວຍ​ລັດຖະມົນຕີ ກະຊວງ ສສກ ທັງ​ເປັນ​ຮອງ​ປະທານ ​ແລະ ​ເລຂາທິການ ຄອລ ໄດ້ສະຫຼຸບ​ການ​ເຄື່ອນ​ໄຫວ​ວຽກ​ງານ​ທີ່​ພົ້ນ​ເດັ່ນ​ແຕ່​ລະ​ດ້ານໃນ​ໄລຍະ 6 ​ເດືອນ​ຕົ້ນ​ປີໂດຍ​ສະ​ເພາະດ້ານການນໍາພາ ດ້ານການຈັດຕັ້ງ ແລະ ນິຕິກໍາ ວຽກບໍລິຫານການຄຸ້ມຄອງປະສານງານພາຍໃນ ​ແລະ ວຽກງານພັດທະນາບຸກຄະລາກອນ ແລະ ເຂົ້າຮ່ວມແຂ່ງຂັນງານ​ຕ່າງໆ ວຽກງານກິດຈະກຳ ແລະ ຂະບວນການສົ່ງເສີມຄຸນຄ່າໂອແລມປິກ ວຽກງານປະສານງານ ແລະ ຮ່ວມມືກັບຕ່າງປະເທດການເຄື່ອນໄຫວຂອງຄະນະອະນຸກຳມະການຝ່າຍຕ່າງໆ ແລະ ກອງທຶນສົ່ງເສີມກີລາສູ່ໂອແລມປິກ

   ໂອກາດ​ນີ້ ທ່ານລັດຖະມົນຕີ ກ່າວ​ວ່າ: ການ​ພັດທະນາ​ກີລາ-ກາ​ຍະ​ກຳ ​ກໍ​ຕ້ອງ​ຄຽງ​ຄູ່​ກັບ​ການ​ພັດທະ ນາ​ເສດຖະກິດ-ສັງຄົມ​​ແຕ່ລະ​​ໄລຍະ ປັດຈຸບັນ​ສະພາບ​ເສດຖະກິດ​ມີ​ອັນ​ຫຍຸ້ງ​ຍາກຈຳກັດ​ແຕ່​ການ​ພັດ ທະນາ​ກີລາ​ລາວ​ຕ້ອງ​ກ້າວ​ເດີນ​ຕໍ່​ໄປ​ທັງ​ຢູ່​ພາຍ​ໃນ​ປະ​ເທດ ​ແລະ ​ອອກ​ສູ່​ຕ່າງປະ​ເທດ ​ຕະຫຼອດ​ຮອດ​ການ​ຮ່ວມ​ມື ​ແລະ ການ​ຊ່ວຍ​ເຫຼືອ​ດ້ານ​ການ​ກີລາ ດັ່ງ​ນັ້ນຜູ້ເຂົ້າຮ່ວມກອງ​ປະຊຸມໄດ້​ປະກອບ​ຄຳ​ເຫັນ ​ແລະ ​ແລກປ່ຽນ​ບົດຮຽນ​ໃນ​ຫົວ​ຂໍ້​ຕ່າງໆ​ທັງ​ອັນ​ລວມ ​ແລະ ອັນ​ສະ​ເພາະ​ເພື່ອ​ເປັນ​ຮູບ​ແບບ​ວິທີ​ການ​ໃຫ້​ສາມາດ​ໄປ​ປັບປຸງ ​ແລະ ພັດທະນາ​ແຕ່ລະ​ວຽກ​ໃຫ້​ດີ​ຂຶ້ນ​ຕາມ​ລຳດັບ ​ເພື່ອ​ຮ່ວມ​ກັນ​ພັດທະນາ​ວົງ​ການ​ກີລາ​ລາວ​ໃຫ້​ກ້າວໜ້າ ​ແລະ ຍືນ​ຍົງ​ໃນ​ຕໍ່​ໜ້າ.

ຂ່າວທີ່ກ່ຽວຂ້ອງ