ຮຽນ ແລະ ງານ

140 06 ສ.ຫ. 2018 ນານາສາລະ

    ໄລ­ຍະ​ນີ້​ ບ້ານ​ເຮົາ​ມີ​ຂ່າວ​ທີ່​ສັງ­ຄົມ​ໃຫ້​ຄວາມສົນ­ໃຈ​ກັນ​ຫຼາຍ ຄື​ເລື່ອງ​ການ​ຮຽນ​ຕໍ່​ຂອງ​ລູກ​ຫຼານ ແລະ ການ​ສະ­ແຫວງ­ຫາ​ວຽກ​ເຮັດ​ຂອງ​ຜູ້​ຮຽນ​ຈົບມະ­ຫາ­ວິ­ທະ­ຍາ­ໄລ ມັນ​ຈຶ່ງ​ກາຍ­ເປັນ​ສອງ​ປະ­ເດັນ​ທີ່ຜູກ​ພັນ​ກັນ​ຕັ້ງ­ແຕ່​ເລີ່ມ​ຕົ້ນ​ຮຽນ​ພຸ້ນ​ລະ ຖ້າ​ຈະ​ໃຫ້ເວົ້າ​ແບບ​ບໍ່​ເກງ​ໃຈ​ກໍ່​ແມ່ນ​ມັນ​ມາ​ຈາກ​ການ​ເລີ່ມຕົ້ນ​ຮຽນ​ມາ​ແຕ່​ປະ­ຖົມ-ມັດ­ທະ­ຍົມ ຈົນ​ເສັງ​ເຂົ້າ​ມະຫາ​ວິ­ທະ­ຍາ­ໄລ​ພຸ້ນ​ວ່າ ຕົນ​ເອງ​ໄດ້​ກຽມ​ຕົວ​ມາ​ດີພຽງ​ໃດ ? ພໍ່​ແມ່ ຫຼື ຜູ້​ປົກ­ຄອງເອົາ­ໃຈ­ໃສ່​ສົ່ງ­ເສີມພຽງ​ໃດ ? ຜູ້​ບໍ­ລິ­ຫານ​ການ​ສຶກ​ສາ​ເຫັນ​ຄວາມ​ສຳຄັນ​ຂອງ​ບັນ­ຫາ​ນີ້​ພຽງ​ໃດ ຫຼື ວ່າ​ຮູ້ແຕ່​ແກ້​ບໍ່​ໄດ້.

    ສອງ​ປະ­ເດັນ​ທີ່​ຊັດ​ເຈນ​ຄື: ເລື່ອງ​ຂອງ​ທິດ​ທາງການ​ຮຽນ​ຕໍ່​ວິ­ຊາ​ຊີບ ຫຼື ມະ­ຫາ­ວິ­ທະ­ຍາ­ໄລ​ທີ່​ຜູ້​ຮຽນຈົບ ມ7 ຍັງ​ກະ​ເວ​ກະ​ວ່າງ​ບໍ່​ໝັ້ນ​ໃຈ​ວ່າ​ຊິ​ເອົາ​ຈັ່ງ​ໃດດີ ເພາະ​ຢ່າ​ລືມ​ວ່າຄ່າ​ນິ­ຍົມ​ບາງ​ອັນ​ມັນ​ແຊກເຂົ້າ​ມາ​ກາງ​ໃຈ​ຫຼາຍ​ຄົນ​ແລ້ວ​ວ່າ ຢາກ​ຮຽນ​ເສດຖະ​ສາດ ຢາກ​ຮຽນ​ທະ­ນາ­ຄານ ຈົບ​ມາ​ຈະ​ໄດ້​ມີ​ວຽກເຮັດ ເງິນ​ດີ ແຕ່ງ​ໂຕ​ເທ້ ! ເຖິງ​ແມ່ນ​ວ່າ​ຈະ​ໃຊ້​ຫຼາຍວິ­ທີ​ເພື່ອ​ໃຫ້​ໄດ້​ເຂົ້າ​ຮຽນເສຍ​ເງິນ​ຄຳ​ແນ່​ກໍ່​ບໍ່​ເປັນຫຍັງ ? ນີ້​ທັດ­ສະ­ນະ​ໜຶ່ງ​ສຳ­ລັບ​ຜູ້​ມີ​ກຳ­ລັງ​ເສດ​ຖະກິດ ພວກ​ມັກ​ແລ້ວ​ເສັງ​ເຂົ້າ​ບໍ່​ໄດ້​ກໍ່​ແມ່ນ​ອີກ​ພວກໜຶ່ງ ພວກ​ເສັງ​ເຂົ້າ​ໄດ້​ແຕ່​ບໍ່​ມັກ​ກໍ່​ຈຳ­ເປັນ​ຕ້ອງ​ຮຽນ ນີ້​ກໍ່​ແມ່ນ​ອີກ​ປະ­ເພດ​ໜຶ່ງ​ທີ່​ຕ້ອງ​ຈຳ​ໃຈ​ຮຽນ ເພາະກວ່າ​ຊິ​ເສັງ​ໄດ້ບໍ່​ແມ່ນ​ເລື່ອງ​ງ່າຍ ຢ່າ​ລືມ​ວ່າ ບາງຄົນ​ທີ່​ມີ​ຕົ້ນ​ທຶນ​ເສດ­ຖະ­ກິດ ແລະ ສັງ­ຄົມ​ສູງ ສະແດງ​ທັດ­ສະ­ນະ​ຮຽນ​ຫຍັງ​ກໍ່​ໄດ້ ແນວ​ຕົ້ນ​ທຶນ​ຄົນເຮົາ​ຕ່າງ​ກັນ ຕ້ອງ​ເຂົ້າ­ໃຈ​ຈຸດ​ຢືນ​ຕ່າງ​ກັນ​ນໍ!.

    ພວກ​ທີ​ສອງ ຮຽນ​ຈົບ​ແລ້ວ​ຊອກ​ວຽກ​ເຮັດ ຢ່າລືມ​ວ່າ​ສຳ­ລັບ​ພາກ​ລັດ ປີ​ໜຶ່ງ​ມີ​ພະ­ນັກ­ງານ​ບຳນານ​ຈັກ​ຄົນ ບາງ​ກະ­ຊວງບາງ​ອົງ­ການ ກໍ່​ມີ​ໂຄ​ຕ້າໃນ​ໃຈ​ຢູ່​ແລ້ວ​ວ່າ ຖ້າ​ຜູ້​ນັ້ນ​ບຳ­ນານກໍ່​ຈະ​ມີ​ສາຍ​ໂລຫິດ ຫຼື ສາຍ​ຊັບ​ເຂົ້າ​ແທນ ດັ່ງ­ນັ້ນ ຜູ້​ທີ່​ຮຽນ​ຈົບ​ຈະມາ​ເສັງ​ເຂົ້າ​ລັດ­ຖະ­ກອນ ​ຈຶ່ງ​ມີ​ປາ­ກົດ­ການ​ຄ້າງ​ອ່າງຍ່າງ ເຫຼືອ​ບໍ່​ພໍ ເພາະ​ໂຄ​ຕ້າ​ລັດ­ຖະ­ກອນ​ມີ​ໜ້ອຍ ຜູ້ຈະ​ມາ​ເສັງ​ເຂົ້າ​ມີ​ຫຼາຍ ປາ­ກົດ­ການ​ແບບ​ນີ້​ເຮົາ​ຈະປະ­ຕິ­ເສດ​ລະ­ບົບ​ການ​ແຂ່ງ­ຂັນ​ໄດ້​ແນວ­ໃດ ? ຜູ້​ຂຽນຢາກ​ຂໍ​ຝາກ​ໃຫ້​ກຳ­ລັງ​ໃຈ​ສຳ­ລັບ​ຜູ້​ທີ່​ກຳ­ລັງ​ເສັງ​ເຂົ້າຮຽນ ຫຼື ກຳ­ລັງ​ຫາ​ວຽກ​ເຮັດ​ນັ້ນ ເວ­ລາ​ຮຽນ​ຕ້ອງ ຕັ້ງ­ໃຈ​ຮຽນ​ໃຫ້​ດີ​ທີ່​ສຸດ ຕັ້ງ­ໃຈ​ຫາ​ຄວາມ​ຮູ້ ອ່ານໜັງ­ສື​ໃຫ້​ມີ​ຄວາມ​ຮູ້ ຈຶ່ງ​ບໍ່​ແມ່ນ​ຮຽນ​ຫຼິ້ນໆ ກິນ​ເບຍ ປົນ​ທ່ຽວ.

    ສັງ​ລວມ​ວ່າ: ທັງ​ຮຽນ​ຕໍ່ ຫຼື ຫາ​ວຽກ​ເຮັດ ມັນ​ໄດ້ກາຍ­ເປັນ​ປາ­ກົດ­ການ​ທີ່​ຫຼາຍ​ຝ່າຍ​ກ່ຽວ­ຂ້ອງ​ທົບທວນ­ຄືນ ສັງ­ຄົມ​ກຳ­ລັງ​ຍ່າງ​ຕາມ​ຄ່າ​ນິ­ຍົມ​ສ້າງ​ກັນມາ​ໃຫ້​ລ້ຳ​ລວຍ ເປັນ​ເຈົ້າ​ຄົນ​ນາຍ​ຄົນ ເວ­ລາ​ອວຍພອນ​ຜູກ​ແຂນ​ນັ້ນ​ມັນ​ຝັງ​ໃນ​ຈິດ​ສຳ­ນຶກ ຫວັງ​ວ່າມັນ​ຊິ​ບໍ່​ກາຍ­ເປັນ​ບັນ­ຫາ​ງົວ​ພັນ​ຫຼັກ​ກ້ຽວ​ໄປ​ວຽນ­ມາ ຫຼື ບາງ​ຄົນ​ຜັດ​ບອກ​ຕໍ່​ກັນ​ວ່າຮຽນ​ນັ້ນ​ເທ້ ຮຽນບ່ອນ​ນີ້​ແລ້ວ​ລວຍ ສະ​ຖາ​ບັນ​ການ​ສຶກ​ສາ​ບໍ່​ຄວນ​ຖືເບົາ​ປັດ​ຊະ​ຍາ​ການ​ສຶກ​ສາຢ່າ​ສ້າງ​ໃຫ້​ຄົນ​ຫຼົງທາງ.

ຂ່າວທີ່ກ່ຽວຂ້ອງ