ຂ່າວຫຼ້າສຸດ

ເຕະບານສາຍ ກ 2018 ຈະເປີດສາກທ້າຍເດືອນນີ້

190 06 ສ.ຫ. 2018 ວົງຈອນກີລາ
ເຕະບານສາຍ ກ 2018 ຈະເປີດສາກທ້າຍເດືອນນີ້

    ອີງ​ຕາມ​ຂໍ້​ມູນ​ຈາກ​ສະ­ຫະພັນ​ກີ­ລາ​ບານ­ເຕະ​ແຫ່ງ​ຊາດ​ລາວ (ສຕລ) ແຈ້ງ​ໃນ​ວັນ​ທີ 31 ກໍ­ລະ­ກົດ​ຜ່ານ​ມາ​ວ່າ: ການແຂ່ງ­ຂັນ​ເຕະ­ບານ​ລະ­ດັບ​ສາຍ ກ ປະ­ຈຳ​ປີ 2018 ກຽມ​ຈະ​ເປີດ​ສາກ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 25 ສິງ­ຫາ​ນີ້ ສະ­ນັ້ນ​ ທາງ ສຕລ ຈຶ່ງ​ຂໍ​ແຈ້ງ​ການ​ເຖິງບັນ­ດາ​ສະ­ໂມ­ສອນ ລະ­ດັບ​ສາຍ ກ ທີ່​ໄດ້​ຍື່ນ​ເອ­ກະ­ສານ​ສະ­ໝັກ​ເຂົ້າ​ຮ່ວມ​ການ​ແຂ່ງ­ຂັນ​ພາຍໃນ​ວັນ​ທີ 5 ເມ­ສາ 2018 ໃຫ້​ຊາບ​ທົ່ວ​ເຖິງ​ກັນ​ວ່າ ເພື່ອ​ເປັນ​ການ​ພັດ­ທະ­ນາ​ກີ­ລາ​ເຕະ­ບານ​ໃຫ້​ມີ​ການ­ເຄື່ອນ­ໄຫວ​ຢ່າງ​ເປັນ​ປົກ­ກະ­ຕິ ແລະ ຕໍ່​ເນື່ອງ ພ້ອມ​ທັງ​ປະ­ຕິ­ບັດ​ຕາມ​ການ​ແຂ່ງ­ຂັນ​ປະ­ຈຳ​ປີ 2018 ໃຫ້​ທັນ​ກັບ​ເວ­ລາ ສຕລ ຈະ​ໄດ້​ເປີດ​ການ​ແຂ່ງ­ຂັນ​ເຕະ­ບານ​ສາຍ ກ ໂດຍ​ຈະ​ເປີດ​ການ​ແຂ່ງ­ຂັນ​ພາຍ​ໃນ​ວັນ​ທີ 25 ສິງ­ຫາ 2018.

    ສ່ວນ​ຂໍ້​ມູນ​ທີ່​ເປັນ​ເອ­ກະ­ສານ​ຕ່າງໆ​ຂອງ​ການ​ແຂ່ງ­ຂັນ​ດັ່ງກ່າວ ​ໃຫ້​ຕົວ​ແທນ​ຂອງ​ສະ​ໂມສອນ​ມາ​ພົວ­ພັນ​ເອົາ​ນຳ​ພະ​ແນກ​ຈັດ­ການ​ແຂ່ງ­ຂັນ ສຕລ ໂດຍ​ມີລາຍ​ລະ­ອຽດ​ດັ່ງ­ນີ້ ສາ­ມາດ​ພົວພັນ​ເອົາ​ຮ່າງ​ເອ­ກະ­ສານ​ລົງ​ທະບຽນ​ ນຳ​ພະ​ແນກ​ຈັດ­ການ​ແຂ່ງຂັນ​ໄດ້​ນັບ​ແຕ່​ວັນ​ທີ 6 ສິງ­ຫາ 2018 ເປັນ­ຕົ້ນ​ໄປ​ຈົນ​ຮອດ​ມື້​ສິ້ນສຸດ​ການ​ລົງ­ທະ­ບຽນ ໄລ­ຍະ​ການລົງ­ທະ­ບຽນ​ຄະ­ນະ​ນຳ ແລະ ນັກກີ­ລາ​ຂອງ​ທີມ​ໃຫ້​ສົ່ງ​ເຖິງ​ພະແນກ​ຈັດ­ການ​ແຂ່ງ­ຂັນ ​ພາຍ​ໃນວັນ​ທີ 6-17 ສິງ­ຫາ 2018 ສະໂມ​ສອນ​ທີ່​ບໍ່​ສາ­ມາດ​ຍື່ນ​ເອ­ກະສານ​ລົງ­ທະ­ບຽນ​ຄະ­ນະ​ນຳ ແລະ ນັກ­ກີ­ລາ​ຂອງ​ຕົນ​ເອງ​ສຳເລັດ​ພາຍ​ໃນ​ວັນ​ທີ 17 ສິງ­ຫາ 2018 ແມ່ນ​ຖື​ວ່າ​ສະ­ຫຼະ​ສິດ ແລະ ບໍ່​ສາ­ມາດ​ເຂົ້າ​ຮ່ວມ​ການ​ແຂ່ງ­ຂັນ​ໄດ້ ສຕລ ຂໍ​ສະ­ຫງວນ​ສິດ​ໃນການ​ເລື່ອນ ຫຼື ປ່ຽນ­ແປງ​ມື້​ເປີດການ​ແຂ່ງ­ຂັນ​ຕາມ​ເຫດ­ຜົນ​ທີ່ເໝາະ​ສົມ ແລະ ຄວາມ​ຈຳ­ເປັນຕົວ​ຈິງ​ ໂດຍ​ບໍ່​ຜ່ານ​ການ​ພິ​ຈາ­ລະນາ​ຈາກ​ສະ­ໂມ­ສອນ.

    ສຳ­ລັບ​ການ​ແຂ່ງ­ຂັນ​ເຕະ­ບານ​ສາຍ ກ ປະ­ຈຳ​ປີ 2018 ໃນ​ເບື້ອງ​ຕົ້ນ​ແມ່ນ​ມີ​ທີມ​ແຈ້ງ​ເຈດ​ຈຳ­ນົງ​ເຂົ້າ​ຮ່ວມ​ທັງ​ໝົດ 16 ທີມ ແຕ່​ພາຍ­ຫຼັງ​ມີ​ການ​ເລື່ອນ​ການ​ແຂ່ງ­ຂັນ​ອອກ​ມາ​ຫຼາຍ​ເດືອນ ແລະ ມີ​ຂໍ້​ກຳ­ນົດ​ວ່າ​ນັກ­ກີ­ລາ​ທີ່​ຈະ​ເຂົ້າ​ຮ່ວມ​ແຂ່ງ­ຂັນ​ລະ­ດັບ​ນີ້ ຕ້ອງ​ມີ​ອາ­ຍຸ 18 ປີ ຂຶ້ນ​ໄປ ຫຼື ເກີດ​ປີ 2000 ສະ­ນັ້ນ ອາດ​ເຮັດ​ໃຫ້​ມີ​ບາງ​ທີມ​ຖອນ​ຕົວ ແລະ ອາດ​ມີ​ທີມ​ໃໝ່​ເຂົ້າ​ມາ​ແທນ.

ຂ່າວທີ່ກ່ຽວຂ້ອງ