ຖົງ​ຢາງ​ພວມ​ຄ່ອຍ​ຫາຍ​ໄປ​ຈາກ​ບັນດາ​ຮ້ານ​ຊັບ​ພະ​ສິນຄ້າ​ໃຫຍ່​ໃນ​ອັງກິດ

284 06 ສ.ຫ. 2018 ຂ່າວຕ່າງປະເທດ
ຖົງ​ຢາງ​ພວມ​ຄ່ອຍ​ຫາຍ​ໄປ​ຈາກ​ບັນດາ​ຮ້ານ​ຊັບ​ພະ​ສິນຄ້າ​ໃຫຍ່​ໃນ​ອັງກິດ

    ປະລິມານ​ການ​ໃຊ້​ຖົງ​ຢາງ ໄດ້​ຫຼຸດ​ລົງ​ເຖິງ 86% ຢູ່​ໃນ​ຮ້ານ​ສັບພະ​ສິນຄ້າ​ໃຫຍ່​ອັນ​ດັບ​ຕົ້ນ 7 ແຫ່ງ ໃນ​ອັງກິດ ນັບ​ຕັ້ງແຕ່​ເວລາ​ທີ່​ລັດຖະບານ​ອັງກິດ ນຳ​ໃຊ້​ຂໍ້​ກຳນົດ​ເກັບ​ຄ່າ​ທຳນຽມ 5 ເພນ​​ສ (ເທົ່າ​ກັບ 0,07 ໂດ​ລາ​ສະຫະລັດ)/ຖົງ ເມື່ອ​ກ່ອນ​ໜ້າ​ນີ້ 3 ປີ.

   ກົມ​ສິ່ງແວດລ້ອມ ອາຫານ ແລະ​ຊົນນະບົດ​ຂອງ​ອັງກິດ (Defra) ໄດ້​ນຳ​ຕົວ​ເລກ​ອອກ​ມາ​ເປີດເຜີຍ​ເມື່ອ​ວັນ​​ີ 27 ກໍ​ລະ​ກົດ​​ ທີ່​ຜ່ານ​ມາ ໃຫ້​ຮູ້​ວ່າ ລາຍ​ຮັບ​ຈາກ​ຖົງ​ຢາງ ສືບຕໍ່​ຫຼຸດ​ລົງ​ເລື້ອຍໆ.

    ຜູ້​ບໍລິໂພກ​ຢູ່​ໃນ​ຮ້ານ​ສັບພະ​ສິນຄ້າ​ໃຫຍ່ 7 ແຫ່ງ​ໃນ​ອັງກິດ ຊີ​​ື້​ຖົງ​ຢາງ​ໜ້ອຍ​ກວ່າ 1/4 ເມື່ອ​ທຽບໃສ່​ໄລຍະ​ປີ 2016-2017 ໝາຍ​ຄວາມ​ວ່າ​ຫຼຸດ​ລົງ​ເກືອບ 300 ລ້ານ​ຖົງ.

    ໂຄສົກ​ຂອງ Defra ໃຫ້​ຮູ້​ວ່າ ສິ່ງ​ດັ່ງກ່າວ ມີ​ຄວາມ​ໝາຍວ່າ ໃນ​ເວລາ​ນີ້​ຊາວ​ອັງກິດ​ແຕ່ລະຄົນ ໃຊ້​ຖົງ​ຢາງ​ພຽງ​ທີ່ 19 ຖົງ ທຽບໃສ່​ລະດັບ 140 ຖົງ/ຄົນ ໃນ​ເວລາ​ທີ່​​ລັດຖະບານ​ອັງກິດ ນຳ​ໃຊ້​ລະດັບ​ຄ່າ​ທຳນຽມ​ດັ່ງກ່າວ ໃນ​ປີ 2015.

    ໃນ​ຂະນະ​ດຽວ​ກັນ ທ່ານ ໄມ​ເຄິນ ກອບ ລັດຖະມົນຕີ​ສິ່ງແວດລ້ອມ​ຂອງ​ອັງກິດ ຢືນຢັນ​ວ່າ “ບັນດາ​ຕົວ​ເລກ​ດັ່ງກ່າວ ເປັນ​ການ​ຊີ້​ໃຫ້​ເຫັນ​ວ່າ ພວກ​ເຮົາ​ສາມາດ​ຮ່ວມ​ມື​ກັນ ປະກອບສ່ວນ​ເຂົ້າ​ໃນ​ການ​ອະນຸລັກ​ສິ່ງແວດລ້ອມ​ຄື​ແນວໃດ ພຽງ​ແຕ່​ການ​ກໍ່ໃຫ້ເກີດ​ການ​ປ່ຽນແປງ​ທີ່​ງ່າຍດາຍ ໃນ​ການ​ດຳລົງ​ຊີວິດ​ໃນ​ແຕ່​ລະ​ວັນ.”

    ບັນດາ​ນັກ​ວິ​​ທະ​ຍາ​ສາດ​ຂອງ​ອັງກິດ​ເວົ້າ​ວ່າ ປະລິມານ​ຖົງ​ຢາງ​ທີ່​ຖິ້ມ​ລົງ​ໄປ​ໃນ​ທະເລ  ຈະ​ເພີ່ມ​ຂຶ້ນ​ທົບ 3 ເທົ່າ​ຕົວ​ພາຍ​ໃນ​ຮອບ​ເວລາ 1 ທົດ​ສະ​ວັດ ຖ້າວ່າ​ພວກ​ເຮົາ​ບໍ່​ຄວບ​ຄຸມ​ການ​ເທ​ຂີ້​ເຫຍື້ອ​ລົງ​ສູ່​​ທະ​ເລ​ໄດ້. ໃນ​ແຕ່​ລະ​ປີ ມີ​ນົກ 1 ລ້ານ​ໂຕ ແລະ ​ສັດທະ​ເລ 100.000 ກວ່າ​ໂຕ ຕາຍ​ໄປ​ຍ້ອນ​ກິນ ຫຼື​ບໍ່​ກໍ​ຕິດ​ກັບ​ຂີ້​ເຫຍື້ອ​ປະເພດ​ຢາງ.

    ເມື່ອ​ບໍ່​ດົນ​ມາ​ນີ້ ລັດຖະບານ​ອັງກິດ ໄດ້​ປະກາດ​ມາດ​ຕະການ​ຕ່າງໆ ເພື່ອ​ປັດ​ເປົ່າ​ຂີ້​ເຫຍື້ອ​ປະເພດ​ຢາງ​ທີ່​ສາມາດ​ຫຼີກເວັ້ນ​ໄດ້ ໃນ​ນັ້ນ​ມີ​ຄຳ​ສັ່ງ​ຫ້າມ​ເມັດ​ຢາງ​ຂະໜາດ​ນ້ອຍ ແລະ​ນຳ​ສະເໜີ​ແກ່ຍາວ​ການ​ເກັບ​ຄ່າ​ທຳນຽມ​ແບບ​ບັງຄັບ​ທີ່ 5 ເພນ​​ສ ສຳລັບ​ຖົງ​ຢາງ ກໍ​ຄື​ນຳ​ໃຊ້​ຫ້າງ​ຮ້ານ​ທີ່​ບໍ່​ນຳ​ໃຊ້​ຖົງ​ຢາງ ຢູ່​ໃນ​ຮ້ານ​ສັບພະ​ສິນຄ້າ​ຕ່າງໆ.

 

ຂ່າວທີ່ກ່ຽວຂ້ອງ