ຂ່າວຫຼ້າສຸດ

ອີ​ຣານ ຊ້ອມ​ຮົບ​ຂະໜາດ​ໃຫຍ່

106 06 ສ.ຫ. 2018 ຂ່າວຕ່າງປະເທດ
ອີ​ຣານ ຊ້ອມ​ຮົບ​ຂະໜາດ​ໃຫຍ່

      ແຫຼ່ງ​ຂ່າວ​ຈາກ​ເຂດ​ຕາເວັນ​ອອກ​ກາງ ໃຫ້​ຮູ້​ວ່າ ເມື່ອ​ວັນ​ທີ 2 ສິງຫາ​ທີ່​ຜ່ານ​ມາ ອີ​ຣານ​ໄດ້​ດຳເນີນ​ການ​ຊ້ອມ​ຮົບ​ຂະໜາດ​ໃຫຍ່ ຢູ່​ໃນ​ເຂດ​ຊ່ອງ​ແຄບ​ທະເລ​ຮໍ​ມຸ​​ສ (Hormuz) ໂດຍ​ມີ​ກຳປັ່ນ​ສູ້​ຮົບ​ເຂົ້າ​ຮ່ວມ 50 ກວ່າ ລຳ. ການ​ຊ້ອມ​ຮົບ​ເທື່ອ​ນີ້ ແກ່ຍາວ​ເປັນ​ເວລາ​ຫຼາຍ​ຊົ່ວໂມງ ໂດຍ​ເປັນ​ການ ມຸ່ງ​ສູ່​ຍຸດ​ໂທ​ບາຍ​ໂຈມ​ຕີ​ດ້ວຍ​ຈຳນວນ​ຫຼາຍ ສາມາດ​ປິດ​ລ້ອມ​ເສັ້ນທາງ​ທາງນ້ຳ​ອັນ​ເປັນ​ຕາຍ ທີ່​ແລ່ນ ຜ່ານ​ຊ່ອງ​ແຄບ​ຮໍ​ມຸ​​ສ ຖ້າ​ຫາ​ກວ່າ​ໄດ້​ຮັບ​ການ​ຜັນ​ຂະຫຍາຍ​ໃນ​ພາກ​ຕົວ​ຈິງ.

    ໃນ​ຄວາມ​ເປັນ​ຈິງ​ແລ້ວ ເຫັນ​ວ່າ​ປະມານ 10% ຂອງ​ປະລິມານ​ນ້ຳມັນ​ດິນ​ຂອງ​ໂລກ ແມ່ນ​ຂົນສົ່ງ​ຜ່ານ​ຊ່ອງ​ແຄບ​ທະເລ​ຮໍ​ມຸ​​ສ.

    ບັນດາ​ເຈົ້າ​ໜ້າທີ່ ສ ອາ​ເມ​ຣິ​ກາ ເວົ້າ​ວ່າ ເຖິງ​ວ່າ​ອີ​ຣານ​ດຳເນີນ​ການ​ຊ້ອມ​ຮົບ​ກໍ​ຕາມ ແຕ່​ກໍ​ບໍ່​ໄດ້​ເປັນ​ໄພ​ຄຸກ​ຄາມ​ຕໍ່​ກອງ​ກຳລັງ​ຂອງ ສ ອາ​ເມ​ຣິ​ກາ ແຕ່​ຢ່າງໃດ. ປັດຈຸບັນ​ນີ້ ກຳປັ່ນ​ຂັບ​ໄລ່ USS The Sullivans ພ້ອມ​ດ້ວຍ​ກຳປັ່ນ​ສູ້​ຮົບ​ຂອງ​ອັງກິດ ແລະ​ຝຣັ່ງ​ອີກ​ຈຳນວນ​ໜຶ່ງ ພວມ​ປະກົດ ຕົວ​ຢູ່​ໃນ​ເຂດ​ອ່າວ​ເປີ​ເຊຍ. ນອກຈາກ​ນັ້ນແລ້ວ ກຳປັ່ນ​ລາດຕະເວນ​ຂອງ ສ ອາ​ເມ​ຣິ​ກາ ອີກ 10  ລຳ ກໍ​ພວມ​ປະຈຳການ​ຢູ່​ໃນ​ຖານ​ທັບ​ເຮືອ​ເລກ 5 ຂອງ ສ ອາ​ເມ​ຣິ​ກາ ໃນ​ບາ​ເຣນ.

    ການເຄື່ອນໄຫວ​ດັ່ງກ່າວ ມີ​ຂຶ້ນ​ຫຼັງ​ຈາກ​ທີ່​ປະທານາທິບໍດີ ສ  ອາ​ເມ​ຣິ​ກາ ໂດ​ນາ​​ລ ທຣຳ ມີ​ຂໍ້​ຕົກລົງ​ອອກ​ມາ ກ່ຽວ​ກັບ​ການ​ທີ່ ສ ອາ​ເມ​ຣິ​ກາ ຖອນ​ອອກ​ຈາກ​ຂໍ້​ຕົກລົງ​ນີວ​ເຄລຍ ກັບ​ອີ​ຣານ. ນັບ​ແຕ່​ເວລາ​ທີ່ ສ ອາ​ເມ​ຣິ​ກາ ຖອນ​ອອກ​ຈາກ​ຂໍ້​ຕົກລົງ​ນີວ​ເຄລຍ​ອີ​ຣານ​ແລ້ວ ຄ່າ​ຂອງ​ສະກຸນ​ເງິນ ພາຍ​ໃນ​ປະເທດ​ຂອງ​ອີ​ຣານ ກໍ​ໄດ້​ຕົກຕ່ຳ​ລົງ​ຢ່າງ​ແຮງ ເຮັດ​ໃຫ້​ປະຊາຊົນ​ພາກັນ​ລົງ​ສູ່​ທ້ອງ​ຖະໜົນ ເພື່ອ​ປະ​ທ້ວງ​ຢູ່​ໃນ​ຫຼາຍ​ຕົວ​ເມືອງ​ໃຫຍ່​ໃນ​ອີ​ຣານ​ໃນ​ຫຼາຍ​ອາທິດ​ທີ່​ຜ່ານ​ມາ.

 

ຂ່າວທີ່ກ່ຽວຂ້ອງ