ຂ່າວຫຼ້າສຸດ

ຄວາມ​ເຕີບ​ໂຕ​ເສດຖະກິດ​ຂອງ Eurozone ຈຶ້ງ​ຕົວ​ໃນ​ໄຕ​ມາດ​ທີ​ສອງ

250 06 ສ.ຫ. 2018 ຂ່າວຕ່າງປະເທດ
ຄວາມ​ເຕີບ​ໂຕ​ເສດຖະກິດ​ຂອງ Eurozone ຈຶ້ງ​ຕົວ​ໃນ​ໄຕ​ມາດ​ທີ​ສອງ

      ຕົວ​ເລກ​ຢ່າງ​ເປັນ​ທາງ​ການ​ຂອງ​ອົງການ​ສະຖິຕິ​ເອີ​ຣົບ (Eurostat) ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທ້າຍ​ເດືອນ​ກໍລະກົດ ທີ່​ຜ່ານ​ມາ ໃຫ້​ຮູ້​ວ່າ ຄວາມ​ເຕີບ​ໂຕ​ເສດຖະກິດ ຂອງ​ເຂດ​ໃຊ້​ເງິນ​ເອີ​ໂຣ (Eurozone) ໄດ້​ຈຶ້ງ​ຕົວ​ຢູ່​ໃນ​ໄຕ​ມາດ​ທີ 2/2018 ທ່າມກາງ​ຄວາມ​ກັງວົນ​ກ່ຽວ​ກັບ​ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ ທີ່​ມາ​ຈາກ​ຝ່າຍ ສ ອາ​ເມ​ຣິ​ກາ ອາດ​ເປັນ​ການ​ກົດ​ໜ່ວງ​ເສດຖະກິດ​ຂອງ​ສະຫະພາບ​ເອີ​ຣົບ (EU).

    Eurostat ໃຫ້​ຮູ້​ວ່າ ຍອດ​ຜະລິດ​ຕະ​ພັນ​ພາຍ​ໃນ (GDP) ຂອງ Eurozone ໄດ້​ເພີ່ມ​ຂຶ້ນ  0,3% ໃນ​ໄລຍະ​ແຕ່​ເດືອນ​ເມສາ ຫາ​ເດືອນ​ມິຖຸນາ  ປີ 2018 ເປັນ​ການ​ຕ່ຳ​ກວ່າ​ລະດັບ 0,4% ຂອງ​ໄຕ​ມາດ​ກ່ອນ​ໜ້າ​ນັ້ນ. ໃນ​ຂະນະ​ດຽວ​ກັນ ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ​ກາຍ​ແລ້ວ ຄວາມ​ເຕີບ​ໂຕ​ເສດຖະກິດ​ຂອງ Eurozone ບັນລຸ 2,1% ນັບ​ວ່າ​ຕ່ຳ​ກວ່າ​ເມື່ອທ​​ຽບ​ໃສ່​ລະດັບ 2,5% ຂອງ​ໄຕ​ມາດ 1/2018 ແຕ່​ວ່າ​ກໍ​ຍັງ​ສູງ​ກວ່າ​ລະດັບ 1,8% ຂອງ​ປີ 2016.

    ສ່ວນ​ເງິນ​ເຟີ້​ຢູ່​ໃນ Eurozone ພຸ່ງ​ສູງ​ຂຶ້ນ​ໃນ​ເດືອນ​ກໍລະກົດ​ທີ່​ຜ່ານ​ມາ ຂຶ້ນ​ສູ່​ລະດັບ 2,1% ຊຶ່ງ​ເປັນ​ຍ້ອນ​ລາຄາ​ເຊື້ອ​ໄຟ​ເພີ່ມ​ສູງ​ຂຶ້ນ. ລະດັບ​ເພີ່ມ​ຂຶ້ນ​ດັ່ງກ່າວ ນັບ​ວ່າ​ໄວ​ກວ່​​າ ທີ່​ບັນດາ​ນັກ​ສັງເກດ​ການ​ຄາດ​ການ​ເອົາ​ໄວ້ ແຕ່​ວ່າ​ເປັນ​ລະດັບ​ທີ່​ເທົ່າໆ​ກັບ​ຄາດໝາຍ​ຂອງ​​ທະ​ນາ​ຄານ​ກາງ​ເອີ​ຣົບ (ECB).

    ໃນ​ຂະນະ​ດຽວ​ກັນ ອັດຕາ​ສ່ວນ​ຫວ່າງ​ງານ​ຢູ່​ໃນ Eurozone ສືບຕໍ່​ທ່ວງ​ທ່າ​ໄດ້​ຮັບ​ການ​ແກ້​ໄຂ​ຢ່າງ​ໝັ້ນຄົງ ນັບ​ແຕ່​ເວລາ​ທີ່​ຫຼຸດ​ລົງ​ສູ່​ຕ່ຳ​ກວ່າ​ລະດັບ​ທີ່​ປອດ​ໄພ 10% ເມື່ອ​ເດືອນ​ກັນຍາ ປີ 2016 ເປັນຕົ້ນ​ມາ ແລະ​ຮັກສາ​ຢູ່​ທີ່​ລະດັບ 8,3% ໃນ​ເດືອນ​ມິຖຸນາ​ທີ່​ຜ່ານ​ມາ ໂດຍ​ທີ່​ບໍ່​ມີ​ການ​ຜັນ​ຜວນ​ຫຼາຍ. ເຖິງ​ແນວ​ນັ້ນ​ກໍ​ຕາມ ຕົວ​ເລກ​ດັ່ງກ່າວ​ກໍ​ຍັງ​ສູງ​ກວ່າ​ເມື່ອ​ທຽບໃສ່​ອັດຕາ​ສ່ວນ​ສະເລ່ຍ​ຢູ່​ໃນ Eurozone ກ່ອນ​ເວລາ​ເກີດ​ວິ​ກິດ​ການ​ການ​ເງິນ ຊຶ່ງ​ໃນ​ເວລາ​ນັ້ນ​ຢູ່​ທີ່ 7,5%. ໃນ​ຈຳນວນ 19 ປະເທດ ທີ່​ເປັນ​ສະມາຊິກ Eurozone ນັ້ນ ອັດຕາ​ສ່ວນ​ຫວ່າງ​ງານ​ຕ່ຳ​ສຸດ ແມ່ນ​ຢູ່​ໃນ​ເຢຍ​ລະ​ມັນ (3,4% ໃນ​ເດືອນ​ພຶດສະພາ) ແລະ ສູງ​ສຸດ​ແມ່ນ​ຢູ່​ໃນ​ເກ​​ັຣກ (20,2% ໃນ​ເດືອນ​ເມສາ).

 

ຂ່າວທີ່ກ່ຽວຂ້ອງ