ຂ່າວຫຼ້າສຸດ

ນາຍົກ ຢ້ຽມຢາມຜູ້ປະສົບໄພນ້ຳຖ້ວມຢູ່ ຄຳມ່ວນ-ສະຫວັນນະເຂດ

215 06 ສ.ຫ. 2018 ຂ່າວໜ້າ​ໜຶ່ງ
ນາຍົກ ຢ້ຽມຢາມຜູ້ປະສົບໄພນ້ຳຖ້ວມຢູ່ ຄຳມ່ວນ-ສະຫວັນນະເຂດ

    ພາຍ­ຫຼັງ​ສຳ­ເລັດ​ການ​ຕິດ­ຕາມ ຊຸກ­ຍູ້​ການ​ແກ້​ໄຂ​ບັນ­ຫາ​ອຸ​ທົກ​ກະ​ໄພ​ນ້ຳ​ຖ້ວມ ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໃນ​ວັນ​ທີ 2 ສິງ­ຫາ 2018 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ສືບ­ຕໍ່​ເດີນ­ທາງ​ໄປ​ຕິດ ຕາມ ໄພ​ນ້ຳ​ຖ້ວມ​ຢູ່​ພື້ນ​ທີ່​ຕົວ​ຈິງ​ເມືອງ ໄຊ​ບູ​ລີ ແຂວງ ສະ­ຫວັນ​ນະ​ເຂດ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ສັນ­ຕິ­ພາບ ພົມ­ວິ­ຫານ  ເຈົ້າ­ແຂວງ​ສະ­ຫວັນ​ນະ​ເຂດ ການ​ນຳ​ແຂວງ ການ­ເມືອງ ພ້ອມ​ດ້ວຍ​ປະ­ຊາ­ຊົນ​ພາຍ​ໃນ​ບ້ານ​ນາ​ແຫນ.

    ທ່ານ​ເຈົ້າ­ແຂວງ​ໄດ້​ລາຍ​ງານ​ໃຫ້​ຊາບ​ໂດຍ​ຫຍ້ຳ​ກ່ຽວ​ກັບ​ສະ­ພາບ​ນ້ຳ​ຖ້ວມ ຢູ່​ແຂວງ​ສະ­ຫວັນ​ນະ​ເຂດ​ວ່າ: ນັບ​ແຕ່​ຕົ້ນ​ເດືອນ​ກໍ­ລະ­ກົດ 2018 ເປັນ­ຕົ້ນ​ມາ ຝົນ​ໄດ້​ຕົກ​ຢ່າງ​ຕໍ່​ເນື່ອງ ແລະ ຕົກ​ເປັນ​ວົງ​ກວ້າງ ໃນ​ທົ່ວ​ທຸກ​ພາກ​ຂອງ​ປະ­ເທດ ເວົ້າ​ລວມ ເວົ້າ​ສະ­ເພາະ ພາຍ​ໃນ​ແຂວງ​ສະ­ຫວັນ​ນະ​ເຂດ ເຮັດ​ໃຫ້​ພື້ນ​ທີ່​ລຸ່ມ​ຕ່ຳ​ຖືກ​ນ້ຳ​ຖ້ວມ ແລະ ປະ­ລິ­ມານ​ນ້ຳ​ຢູ່​ບັນ­ດາ​ສາຍ​ນ້ຳ​ຕ່າງໆ​ໄດ້​ເພີ່ມ​ຂຶ້ນ​ຢ່າງ​ໄວ­ວາ ໂດຍ​ໃຫ້​ຄະ­ນະ​ກຳ­ມະ­ການ​ຄວບ​ຄຸມ​ໄພ­ພິ­ບັດ​ຂັ້ນ​ແຂວງ ເມືອງ ເອົາ­ໃຈ­ໃສ່​ຊີ້​ນຳ-ນຳ­ພາ​ເຝົ້າ​ລະ­ວັງ ໃນ​ເຂດ​ທີ່​ມີ​ຄວາມ​ສ່ຽງ ປຸກ­ລະ­ດົມ​ກຳ­ລັງ​ແຮງ​ທ້ອງ­ຖິ່ນ ບວກ​ກັບ​ກຳ­ລັງ​ຂອງ​ກອງ​ບັນ­ຊາ​ການ​ທະ­ຫານ​ແຂວງ ກຳ­ລັງ​ຫຼວງ ເອົາ​ກະ­ສອບ​ດິນ​ປ້ານ​ເສີມ​ຄູ​ກັນ​ນ້ຳ​ເລາະ​ຕາມ​ແລວ​ເຊ​ບັ້ງ­ໄຟ ເພື່ອ​ປ້ອງ​ກັນ​ບໍ່​ໃຫ້​ນ້ຳ​ໄຫຼ​ເຂົ້າ​ຖ້ວມ​ພື້ນ​ທີ່​ການ​ຜະ­ລິດ ແຕ່​ກໍ່​ເຫຼືອ​ວິ­ໄສ ລະ­ດັບ​ນ້ຳ​ເຊ​ບັ້ງ­ໄຟ ເກີນ​ຂີດ​ທີ່​ຈະ​ຄວບ​ຄຸມ​ໄດ້ ເຮັດ​ໃຫ້​ນ້ຳ​ໄດ້​ລົ້ນ​ຄັນ​ຄູ​ກັນ​ນ້ຳ ໃນ​ວັນ​ທີ 30 ກໍ­ລະ­ກົດ 2018 ເຮັດ​ໃຫ້​ປະ­ລິ­ມານ​ນ້ຳ​ກະ­ຈາຍ​ເປັນ​ວົງ​ກວ້າງ ແລະ ເກີດ​ຄວາມ​ເສຍ​ຫາຍ​ຫຼາຍ​ສົມ­ຄວນ ຕໍ່​ພື້ນ­ຖານ​ການ​ຜະ­ລິດ ເນື້ອ­ທີ່​ທຳ​ການ​ຜະ­ລິດ​ກະ­ສິ­ກຳ ເປັນ­ຕົ້ນ: ຜົນ​ກະ­ທົບ​ຕໍ່​ບ່ອນ­ຢູ່​ອາ­ໄສ ນ້ຳ​ຖ້ວມ​ບ້ານ​ເຮືອນ​ປະ­ຊາ­ຊົນ​ທັງ​ໝົດ ຈຳ­ນວນ 5 ເມືອງ ກວມ​ເອົາ  86 ບ້ານ ມີ 4.257 ຄອບ­ຄົວ 20.983 ຄົນ ໃນ​ນີ້ ໄດ້​ຍົກ­ຍ້າຍ​ຈຳ­ນວນ 468 ຄົນ ຈຳ­ນວນ 2.342 ຄົນ ມາ​ຢູ່​ບ່ອນ​ທີ່​ປອດ​ໄພ ຕໍ່​ຜົນ​ກະ­ທົບ​ຕໍ່​ເນື້ອ­ທີ່​ການ​ຜະ­ລິດ​ກະ­ສິ­ກຳ ກວມ​ເອົາ 12 ເມືອງ 321 ບ້ານ ເນື້ອ­ທີ່ 27.564 ເຮັກ­ຕາ ໜອງ​ປາ 421 ໜອງ ສັດ­ລ້ຽງ​ຕາຍ 381 ໂຕ ຜົນ​ກະ­ທົບ​ຕໍ່​ພື້ນ­ຖານ​ໂຄງ​ລ່າງ ເສັ້ນ­ທາງ​ຖືກ​ຖ້ວມ 56 ຈຸດ ຊົນ­ລະ­ປະ­ທານ 26 ແຫ່ງ ຂົວ 68 ແຫ່ງ ເສົາ​ໄຟ­ຟ້າ​ຫັກ 2 ເສົາ ຍັງ​ບໍ່​ສາ­ມາດ​ນຳ​ໃຊ້​ໄຟ­ຟ້າ​ໄດ້ 2 ບ້ານ ໂຮງ­ຮຽນ​ຖືກ​ຖ້ວມ 44 ແຫ່ງ ວັດ 22 ແຫ່ງ ສຸກ­ສາ­ລາ 1 ແຫ່ງ ນ້ຳ​ບາ​ດານ 9 ໜ່ວຍ.

    ສຳ­ລັບ​ເມືອງ ໄຊ​ບູ​ລີ ເປັນ​ເມືອງ​ທີ່​ມີ​ຜົນ​ກະ­ທົບ​ໜັກ​ສົມ­ຄວນ ມີ​ຈຳ­ນວນ 13 ບ້ານ ທີ່​ລຽບ​ເຊ​ບັ້ງ­ໄຟ ນ້ຳ​ຖ້ວມ​ທີ່­ຢູ່​ອາ­ໄສ ເສັ້ນ­ທາງ​ຖືກ​ຕັດ­ຂາດ​ທັງ​ໝົດ ແລະ ມີ 18 ບ້ານ ທີ່​ບໍ່​ສາ­ມາດ​ເຂົ້າ​ເຖິງ​ດ້ວຍ​ທາງ­ບົກ ໄດ້​ຍົກ­ຍ້າຍ​ປະ­ຊາ­ຊົນ​ຈຳ­ນວນ 468 ຄອບ­ຄົວ ຈຳ­ນວນ 2.342 ຄົນ ໄປ​ຢູ່​ທີ່​ປອດ​ໄພ 5 ຈຸດ ເນື້ອ­ທີ່​ຖືກ​ນ້ຳ​ຖ້ວມ 4.918 ເຮັກ­ຕາ ສຳ­ລັບ​ແຜນ­ການ​ໃນ­ຕໍ່­ໜ້າ ແຂວງ​ໄດ້​ຊີ້​ນຳ​ໃຫ້​ທຸກ​ພາກ­ສ່ວນ​ເອົາ­ໃຈ­ໃສ່ ຕິດ­ຕາມ ແລະ ເລັ່ງ​ປັບ­ປຸງ​ພື້ນ­ຖານ​ໂຄ່ງ​ລ່າງ​ຕ່າງໆ ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໂດຍ​ໄວ.

    ພາຍ­ຫຼັງ​ໄດ້​ຮັບ​ຟັງ​ການ​ລາຍ​ງານ ທ່ານ​ນາ­ຍົກ­ລັດ­ຖະ­ມົນ­ຕີ ກໍ່​ໄດ້​ສະ­ແດງ​ຄວາມ​ເປັນ​ຫ່ວງ​ເປັນ​ໄຍ ຕໍ່​ຜູ້​ທີ່​ໄດ້​ຮັບ​ຜົນ​ກະ­ທົບ ນ້ຳ​ຖ້ວມ ຢູ່​ແຂວງ​ສະ­ຫວັນ​ນະ​ເຂດ ພ້ອມ​ທັງ​ສະ­ແດງ​ຄວາມ​ດີ­ໃຈ​ທີ່​ທາງ​ການ​ນຳ​ຂອງ​ແຂວງ ແລະ ເມືອງ ໄດ້​ມີ​ແຜນ​ກຽມ​ໄວ້​ກ່ອນ ເຊິ່ງ​ສາ­ມາດ​ຍົກ­ຍ້າຍ​ປະ­ຊາ­ຊົນ​ໄດ້​ທັນ ພ້ອມ​ນີ້​ທ່ານ​ນາ­ຍົກ​ໄດ້ເນັ້ນໃຫ້​ອຳ­ນາດ​ປົກ­ຄອງ​ແຂວງ ແລະ ທຸກ​ພາກ­ສ່ວນ​ພາຍ​ໃນ​ແຂວງ ເອົາ­ໃຈ­ໃສ່​ຕື່ມ​ອີກ ເປັນ­ຕົ້ນ: ພາຍ­ຫຼັງ​ອົບ​ພະ​ຍົບ​ປະ­ຊາ­ຊົນ​ມາ​ໄດ້​ແລ້ວ ໃຫ້​ສືບ­ຕໍ່​ເບິ່ງ​ເຂົາ­ເຈົ້າ​ກ່ອນ ເພື່ອ​ໃຫ້​ເຂົາ­ເຈົ້າ​ກັບ​ເມືອ​ບ້ານ ກັບ​ເມືອງ​ຂອງ​ເຂົາ­ເຈົ້າ ດ້ວຍ​ຄວາມ​ປອດ​ໄພ ພາຍ­ຫຼັງ​ນ້ຳ​ລົງ ຈະ​ມີ​ແຜນ­ການ​ພັດ​ທະ ນາ​ແນວ­ໃດ ຂໍ​ໃຫ້​ມີ​ແຜນ­ການ​ສົມ­ທົບ​ຮ່ວມ​ກັນ​ທຸກ​ເມືອງ​ທີ່​ຖືກ​ກະ­ທົບ ສືບ­ຕໍ່​ມີ​ສະ­ຕິ ຕິດ­ຕາມ​ສະ­ພາບ​ດິນ​ຟ້າ​ອາ­ກາດ ໃຫ້​ເປັນ​ປົກ­ກະ­ຕິ ພາຍ­ຫຼັງ​ນ້ຳ​ແຫ້ງ​ລົງ​ແລ້ວ ແມ່ນ​ໃຫ້​ເຝົ້າ​ລະ­ວັງ​ພະ­ຍາດ​ຕິດ­ຕໍ່ ພະ­ຍາດ​ຕິດ­ແປດ ແລະ ພະ­ຍາດ​ຕ່າງໆ​ທີ່​ຈະ​ເກີດ​ຂຶ້ນ ໃຫ້​ເບິ່ງ​ຕື່ມ​ກ່ຽວ​ກັບ​ການ​ວາງ​ແຜນ­ການ​ປ້ອງ​ກັນ​ໄລ­ຍະ​ຍາວ ບ່ອນ​ທີ່​ນ້ຳ​ຖ້ວມ​ທຸກ​ປີ ເພື່ອ​ປ້ອງ​ກັນ​ບໍ່​ໃຫ້​ນ້ຳ​ຖ້ວມ ແລະ ຟື້ນ​ຟູ​ການ​ຜະ­ລິດ​ຂອງ​ປະ­ຊາ­ຊົນ ເຂົ້າ​ສູ່​ສະ­ພາບ​ປົກ­ກະ­ຕິ​ໂດຍ​ໄວ.

    ພ້ອມ​ນີ້ ໃນ​ວັນ​ດຽວ​ກັນ ທ່ານ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ​ໄດ້​ເຄື່ອນ​ໄຫວ​ຢ້ຽມ­ຢາມ ແລະ ຕິດ­ຕາມ​ສະ ພາບ​ນ້ຳ​ຖ້ວມ​ຢູ່​ແຂວງ​ຄຳ​ມ່ວນ ໂດຍ​ໄດ້​ຮັບ​ຟັງ​ລາຍ​ງານ​ກ່ຽວ​ກັບ​ສະ­ພາບ​ນ້ຳ​ຖ້ວມ​ຈາກ​ທ່ານ ໂອ​ໄດ ສຸ­ດາ​ພອນ ເຈົ້າ­ແຂວງ​ຄຳ​ມ່ວນ.

    ໃນ​ທົ່ວ​ແຂວງ​ຄຳ​ມ່ວນ​ມີ 337 ບ້ານ​ທີ່​ຖືກ​ຜົນ​ກະ­ທົບ​ນ້ຳ​ຖ້ວມ​ທັງ​ໝົດ 337 ບ້ານ ມີ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ 20.712 ໃນ​ນັ້ນ​ມີ 34 ບ້ານ​ທີ່​ກະ­ທົບ​ແຮງ ແລະ ໄດ້​ຍົກ­ຍ້າຍ​ປະ­ຊາ­ຊົນ​ໄປ​ຢູ່​ຕາມ​ຈຸດ​ພັກ­ຊົ່ວ­ຄາວ ມີ​ພົນ­ລະ­ເມືອງ​ທັງ​ໝົດ 7.300 ຄົນ ໃນ​ນີ້​ມີ​ເມືອງ​ໜອງ​ບົກ 11 ບ້ານ​ມີ 88 ຄອບ­ຄົວ ເມືອງ​ເຊ​ບັ້ງ­ໄຟ 9 ບ້ານ​ມີ 592 ຄອບ­ຄົວ ເມືອງ​ມະ­ຫາ​ໄຊ 8 ບ້ານ​ມີ 205 ຄອບ­ຄົວ ແລະ ເມືອງ​ຍົມ​ມະ​ລາດ 6 ບ້ານ​ມີ 85 ຄອບ­ຄົວ ມີ​ເນື້ອ­ທີ່​ນາ​ຖືກ​ຖ້ວມ 33.341 ເຮັກ­ຕາ ເທົ່າ​ກັບ 43,47% ຂອງ​ເນື້ອ­ທີ່​ນາ​ໃນ​ທົ່ວ​ແຂວງ ນອກ​ນັ້ນ​ຍັງ​ມີ​ສັດ­ລ້ຽງ ໜອງ​ປາ​ຈຳ­ນວນ​ຫຼວງ­ຫຼາຍ​ໄດ້​ຮັບ​ຄວາມ​ເສຍ​ຫາຍ ໂຮງ­ຮຽນ ສຸກ­ສາ­ລາ ລະ­ບົບ​ໄຟ­ຟ້າ​ຢູ່​ບາງ​ຈຸດ ແລະ ເສັ້ນ­ທາງ​ຫຼາຍ​ສາຍ​ບໍ່​ສາ­ມາດ​ສັນ­ຈອນ​ໄດ້ ມີ​ເສັ້ນ­ທາງ​ຫຼວງ​ແຫ່ງ​ຊາດ 2 ເສັ້ນ​ຄື:ທາງ​ເລກ​ທີ 12 ແຕ່ 3 ແຍກ​ເມືອງ​ຍົມ​ມະ​ລາດ​ໄປ​ຫາ​ດ່ານ​ສາ­ກົນ​ນາ​ເພົ້າ​ໄດ້​ປິດ​ການ​ນຳ​ໃຊ້ ແລະ​ທາງ​ເລກ​ທີ 1E ແຕ່​ເມືອງ​ຍົມ​ມະ​ລາດ​ຫາ​ເມືອງ​ນາ​ກາຍ​ໄດ້​ປິດ​ບໍ່​ໃຫ້​ລົດ​ໜັກ​ຜ່ານ.

    ທ່ານ ທອງ​ລຸນ ສີ​ສຸ​ລິດ ໄດ້​ໂອ້​ລົມ​ຕໍ່​ການ​ນຳ​ແຂວງ​ເຊິ່ງ​ທ່ານ​ໄດ້​ເນັ້ນ​ໃຫ້​ເອົາ­ໃຈ­ໃສ່​ສຸມ​ກຳ­ລັງ​ເຈົ້າ​ໜ້າ­ທີ່​ເຂົ້າ​ຊ່ວຍ ເຫຼືອ​ກອບ​ກູ້​ເອົາ​ຊີ­ວິດ ແລະ ຊັບ​ສິນ​ຂອງ​ພໍ່​ແມ່​ປະ­ຊາ­ຊົນ​ໃຫ້​ທັນ​ເຫດ­ການ ສຸມ​ຈິດ­ໃຈ​ຊອກ​ຫາ​ວິ­ທີ​ທາງ​ໃນ​ການ​ຊ່ວຍ ເຫຼືອ​ກອບ​ກູ້​ເອົາ​ຜົນ­ລະ­ປູກ​ຂອງ​ປະ­ຊາ­ຊົນ ກະ­ກຽມ​ທາງ​ດ້ານ​ແນວ​ພັນ​ຕ່າງໆ​ເພື່ອ​ທົດ​ແທນ​ຜົນ​ຜະ­ລິດ​ທີ່​ເສຍ​ຫາຍ​ໄປ ເອົາ­ໃຈ­ໃສ່​ຕິດ­ຕາມ ກວດ­ກາ​ເພື່ອ​ປ້ອງ​ກັນ​ການ​ເກີດ​ໂລກ­ລະ­ບາດ​ຕ່າງໆ​ທີ່​ອາດ​ຈະ​ເກີດ​ຂຶ້ນ​ພາຍ­ຫຼັງ​ນ້ຳ​ຫຼຸດ​ລົງ ມີ​ສະ­ຕິ​ໃນ​ການ​ບໍ­ລິ­ໂພກ​ຂໍ້​ມູນ​ຂ່າວ­ສານ​ເຊິ່ງ​ອາດ​ຈະ​ມີ​ກຸ່ມ​ຄົນ​ບໍ່​ດີ​ສວຍ​ໃຊ້​ໂອ­ກາດ​ທີ່​ສົ່ງ​ຜົນ​ສະ­ທ້ອນ​ໃຫ້​ແກ່​ສັງ­ຄົມ ພ້ອມ​ທັງ​ເອົາ­ໃຈ­ໃສ່​ກຽມ​ຄວາມ​ພ້ອມ​ເພື່ອ​ຮັບ​ມື​ກັບ​ພາ­ຍຸ​ລູກ​ໃໝ່​ທີ່​ອາດ​ຈະ​ເກີດ​ຂຶ້ນ​ໃນ­ຕໍ່­ໜ້າ ແລະ ແຜນ­ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໂອ­ກາດ​ດັ່ງ­ກ່າວ​ທ່ານ​ນາ­ຍົກ­ລັດ­ຖະ­ມົນ­ຕີ​ຍັງ​ໄດ້​ມອບ​ເງິນ​ຈຳ­ນວນ 300 ລ້ານ​ກີບ ເພື່ອ​ຊ່ວຍ­ເຫຼືອ​ບັນ­ເທົາ​ທຸກ​ແກ່​ປະ­ຊາ­ຊົນ​ຜູ້​ທີ່​ຖືກ​ຜົນ​ກະ­ທົບ​ໃນ​ທົ່ວ​ແຂວງ ພ້ອມ​ທັງ​ເດີນ­ທາງ​ໄປ​ຢ້ຽມ­ຢາມ​ສູນ​ລວມ​ພົນ​ຜູ້​ປະ­ສົບ​ໄພ​ນ້ຳ​ຖ້ວມ​ໂພນ​ໜອງ​ເຢັນ​ເມືອງ​ຍົມ​ມະ​ລາດ​ຕື່ມ​ອີກ.

ຂ່າວທີ່ກ່ຽວຂ້ອງ