ລາວ-ໄທ ຮ່ວມມືວຽກງານການຄຸ້ມຄອງອາຫານ ແລະ ຢາ

    ກົມ​ອາ­ຫານ ແລະ ຢາ ຈັດ​ກອງ​ປະ­ຊຸມ​ຮ່ວມ​ມື​ສອງ​ຝ່າຍ ລາວ-ໄທ ຄັ້ງ​ທີ 3 ທີ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 2 ສິງ­ຫາ 2018 ໂດຍ​ມີ​ທ່ານ ສົມ​ທະ­ວີ ຈາງ​ວິ​ສົມ​ມິດ ຫົວ­ໜ້າ​ກົມ​ອາ­ຫານ ແລະ ຢາ ແລະ ທ່ານ ວັນ​ໄຊ ສັດ­ທະ​ຍາ​ວຸດ​ທິ​ພົງ ເລ­ຂາ­ທິ­ການ ຄະ­ນະ​ກຳ­ມະ­ການ​ອາ­ຫານ ແລະ ຢາ ປະ­ເທດ​ໄທ ບັນ­ດາ​ຄະ­ນະ​ວິ­ຊາ​ການ​ທັງ​ສອງ​ຝ່າຍ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ສືບ­ຕໍ່​ທົບ​ທວນ​ບົດ​ບັນ­ທຶກ​ກອງ​ປະ­ຊຸມ ຄວາມ​ຊົງ​ຈຳ​ຮ່ວມ​ມື ລາວ-ໄທ ຄັ້ງ​ທີ 2 ໃນ​ຂອບ​ການ​ກວດ­ກາ​ປະ­ຕູ​ດຽວ ກ່ຽວ​ກັບ​ວຽກ​ງານ​ຄຸ້ມ​ຄອງ​ອາ­ຫານ ແລະ ຢາ ເພື່ອ​ປຶກ­ສາ​ຫາ­ລື​ແຜນ​ວຽກ​ກິດ­ຈະ­ກຳ ການ​ຮ່ວມ​ມື​ໃນ­ຕໍ່­ໜ້າ ກ່ຽວ​ກັບ​ວຽກ​ງານ​ຄຸ້ມ​ຄອງ​ອາ­ຫານ ແລະ ຢາ ແລະ ຜະ­ລິດ​ຕະ​ພັນ​ການ​ແພດ ເຊິ່ງ​ທັງ​ໝົດ​ເຫຼົ່າ​ນີ້ ເພື່ອ​ປັບ­ປຸງ​ການ​ຮ່ວມ​ມື ປະ­ສານ​ງານ​ໃນ​ການ​ຄຸ້ມ​ຄອງ​ວຽກ​ງານ​ຄວາມ​ປອດ​ໄພ​ອາ­ຫານ ແລະ ຢາ ແລະ ບັນ­ຫາ​ອື່ນໆ​ທີ່​ກ່ຽວ­ຂ້ອງ ກອງ​ປະ­ຊຸມ​ຍັງ​ໄດ້​ສ້າງ​ແຜນ​ກິດ­ຈະ­ກຳ​ການ​ຮ່ວມ​ມື​ກັນ​ໃນ​ຂອບ​ການ​ຮ່ວມ​ມື​ລາວ-ໄທ ແຕ່ 2018-2020

    ທ່ານ ສົມ​ທະ­ວີ ຈາງ​ວິ​ສົມ​ມິດ ກ່າວ​ວ່າ: ກອງ​ປະ­ຊຸມ​ຄັ້ງ​ທີ 2 ຜ່ານ​ມາ ໄດ້​ມີ​ການ​ຕົກ­ລົງ​ຂອບ​ການ​ຮ່ວມ​ມື ແລະ ວາງ​ແຜນ​ກິດ­ຈະ­ກຳ​ຮ່ວມ​ກັນ ມີ​ການ​ແລກ­ປ່ຽນ​ທັດ­ສະ­ນະ​ສຶກ​ສາ ການ​ເຝິກ­ອົບ­ຮົມ ແລະ ແລກ­ປ່ຽນ​ບົດ­ຮຽນ ໃນ​ການ​ຄຸ້ມ​ຄອງ​ອາ­ຫານ ແລະ ຢາ ການ​ກວດ­ກາ​ປະ­ຈຳ​ດ່ານ ການ​ກວດ­ກາ​ປະ­ຕູ​ດຽວ ການ​ວິ­ໄຈ​ອາ­ຫານ ລະ­ບົບ​ແຈ້ງ​ດ່ວນ ການ​ປົກ​ປ້ອງ​ຜູ້​ບໍ­ລິ­ໂພກ ແລະ ວຽກ​ງານ​ອື່ນໆ ເຊິ່ງ​ເຫັນ​ວ່າ​ປະ­ສົບ​ຜົນ­ສຳ­ເລັດ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ເປັນ​ຢ່າງ​ດີ ຜ່ານ​ກອງ​ປະ­ຊຸມ​ຄັ້ງ​ນີ້ ຈະ​ເປັນ​ການ​ປະ­ກອບ­ສ່ວນ​ສຳ­ຄັນ ເຮັດ​ໃຫ້​ວຽກ​ງານ​ການ​ຮ່ວມ​ມື​ສອງ​ຝ່າຍ ຈະ​ໄດ້​ຮັບ​ຜົນ​ປະ­ໂຫຍດ​ຫຼາຍ​ຂຶ້ນ ແລະ ມີ​ປະ​ສິດ­ທິ​ຜົນ​ສູງ​ຂຶ້ນ​ກວ່າ​ເກົ່າ.