ຂ່າວຫຼ້າສຸດ

ເກີດເຫດໄຟໄໝ້ດ້ານໃນສິມໃຫຍ່ ວັດທາດຫຼວງເໜືອ

303 06 ສ.ຫ. 2018 ຂ່າວໜ້າ​ໜຶ່ງ
ເກີດເຫດໄຟໄໝ້ດ້ານໃນສິມໃຫຍ່ ວັດທາດຫຼວງເໜືອ

    ວັນ​ທີ 3 ສິງ­ຫາ 2018 ໄດ້​ເກີດ​ອັກ­ຄີ​ໄພ​ໄຟ​ໄໝ້​ເຄື່ອງ​ຂອງ​ຢູ່​ດ້ານ​ໃນ​ສິມ​ໃຫຍ່​ວັດ​ທາດ­ຫຼວງ​ເໜືອ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ໄດ້​ສ້າງ​ຄວາມ​ເສຍ​ຫາຍ ເປັນ­ຕົ້ນ ເຄື່ອງ​ຂອງ​ທີ່​ວາງ​ຢູ່​ຕໍ່­ໜ້າ​ພະ​ພຸດ​ທະ​ຮູບ ແລະ ຄວັນ​ໄຟ​ໄດ້​ກະ­ຈາຍ​ໄປ​ທົ່ວ​ດ້ານ​ໃນ​ເຮັດ​ໃຫ້​ຝາ ປະ­ຕູ​ປ້ອງ​ຢ້ຽມ ແລະ ເພ­ດານ​ສິມ​ໄດ້​ກາຍ­ເປັນ​ສີ­ດຳ.

    ຕາມ​ການ​ໃຫ້​ຂໍ້​ມູນ​ຈາກ​ຜູ້​ເຫັນ​ເຫດ­ການ​ຕົວ​ຈິງ​ໃນ​ເວ­ລາ​ເກີດ​ເຫດ​ຄື​ທ້າວ ຄຳ​ພູ​ວົງ ໄຊ​ຍະ​ວົງ ຫຼື (ກ້ອງ) ປະ­ຊາ­ຊົນ​ບ້ານ​ໜອງ​ດ້ວງ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ທີ່​ນັ່ງ​ບໍ­ລິ­ການ​ຫ້ອງ​ນ້ຳ​ຢູ່​ຂ້າງ​ສິມ​ດັ່ງ­ກ່າວ​ວ່າ: ໃນ​ເວ­ລາ​ປະ­ມານ 6:45 ໂມງ ໄດ້​ຍິນ​ສຽງ​ຢູ່​ດ້ານ​ໃນ​ຄິດ​ວ່າ​ມີ​ຄູ​ອາ​ບາ​ອາ­ຈານ​ຢູ່​ແຕ່​ແທ້​ຈິງ​ແລ້ວ​ແມ່ນ​ບໍ່​ມີ​ຜູ້​ໃດ​ຢູ່ ບຶດ­ໜຶ່ງ​ກໍ່​ເຫັນ​ຄວັນ​ໄຟ​ເປັນ​ສີ­ດຳ​ອອກ​ມາ​ຕາມ​ປະ­ຕູ ແລະ ປ່ອງ­ຢ້ຽມ ຈາກ​ນັ້ນ ເມື່ອ​ເຫັນ​ເຫດ­ການ​ວ່າ​ມີ​ໄຟ​ໄໝ້​ເກີດ​ຂຶ້ນ​ຢູ່​ດ້ານ​ໃນ​ສິມ ແລະ ເວ­ລາ​ໄຟ​ໄໝ້​ນັ້ນ ປະ­ຕູ ແລະ ປ່ອງ­ຢ້ຽມ​ໄດ້​ອັດ​ໄວ້ ຈຶ່ງ​ໄດ້​ໄປ​ບອກ​ເຈົ້າ​ອາ­ວາດ​ວັດ ພ້ອມ​ທັງ​ຄູ­ບາ​ທີ່­ຢູ່​ໃກ້​ສິມ​ມາ​ເບິ່ງ ແລະ ເມື່ອ​ມາ​ເບິ່ງ​ກໍ່​ເຫັນ​ວ່າ​ມີ​ໄຟ​ລຸກ​ໄໝ້​ຢູ່​ດ້ານ​ໃນ​ແທ້ ເຈົ້າ​ອາ­ວາດ​ຈຶ່ງ​ໄດ້​ໂທ​ຫາ​ລົດ​ມອດ​ໄພ​ຈາກ​ຕຳ­ຫຼວດ ແລະ ໜ່ວຍ​ກູ້​ໄພ ຈຳ­ນວນ 3 ຄັນ ມາ​ຊ່ວຍ​ມອດ​ໄຟ​ໄດ້​ທັນ​ເວ­ລາ ເຮັດ​ໃຫ້​ໄຟ​ບໍ່​ລຸ­ກລາມ​ໄປ​ບ່ອນ​ອື່ນ.

    ສຳ­ລັບ​ເຫດ­ການ​ໄຟ​ໄໝ້​ຄັ້ງ​ນີ້ ໄດ້​ເຮັດ​ໃຫ້​ເຄື່ອງ​ຂອງ​ບູ­ຊາ​ພະ​ທີ່​ວາງ​ໄວ້​ຢູ່​ຕໍ່­ໜ້າ​ພະ​ໃຫຍ່​ດ້ານ​ໃນ​ສິມ​ຖືກ​ໄຟ​ໄໝ້​ເສຍ​ຫາຍ​ໝົດ ແລະ ເຮັດ​ໃຫ້​ມີ​ຄວັນ​ດຳ​ຕິດ​ຢູ່​ຕາມ​ຝາ ປະ­ຕູ ປ່ອງ­ຢ້ຽມ ແລະ ເພ­ດານ​ສິມ ສ່ວນ​ດ້ານ​ນອກ​ສິມ​ແມ່ນ​ບໍ່​ເປັນ​ຫຍັງ​ຖື​ວ່າ​ເປັນ​ການ​ເສຍ​ຫາຍ​ພຽງ​ເລັກ​ນ້ອຍ ສ່ວນ​ສາ­ເຫດ​ທີ່​ພາ­ໃຫ້​ເກີດ​ອັກ­ຄີ​ໄພ​ຄັ້ງ​ນີ້​ອາດ​ຈະ​ເກີດ​ຈາກ​ການ​ໄຕ້​ທູບ​ທຽນ​ບູ­ຊາ ຫຼື ໄຟ­ຟ້າ​ລັດ​ວົງ​ຈອນ ປັດ­ຈຸ­ບັນ​ເຈົ້າ​ໜ້າ­ທີ່​ກຳ­ລັງ​ເກັບ​ກຳ​ຂໍ້​ມູນ​ຊອກ​ຫາ​ສາ­ເຫດ ແລະ ປະ​ເມີນ​ຜົນ​ເສຍ​ຫາຍ ລາຍ​ລະ­ອຽດ​ຈະ­ແຈ້ງ​ໃຫ້​ຊາບ​ຕາມ​ຫຼັງ​ຕື່ມ​ຕໍ່​ກັບ​ເຫດ­ການ​ໄຟ ໄໝ້​ຄັ້ງ​ນີ້.

ຂ່າວທີ່ກ່ຽວຂ້ອງ