ນາຍົກ ເນັ້ນດ່ວນ 4 ວຽກໃຫຍ່ ແກ້ໄຂອຸທົກກະໄພທີ່ເມືອງສະໜາມໄຊ

395 03 ສ.ຫ. 2018 ຂ່າວໜ້າ​ໜຶ່ງ
ນາຍົກ ເນັ້ນດ່ວນ 4 ວຽກໃຫຍ່ ແກ້ໄຂອຸທົກກະໄພທີ່ເມືອງສະໜາມໄຊ

    ວັນ​ທີ 1 ສິງ­ຫາ 2018 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ໄປ​ຕິດ­ຕາມ ແລະ ຊຸກ­ຍູ້​ການ​ແກ້​ໄຂ​ບັນ­ຫາ​ອຸ​ທົກ​ກະ​ໄພ​ນ້ຳ​ຖ້ວມ ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເປັນ​ຄັ້ງ​ທີ 2 ເຊິ່ງ​ກ່ອນ​ລົງ​ຕິດ­ຕາມ​ພື້ນ​ທີ່​ຕົວ​ຈິງ​ນັ້ນ ຢູ່​ທີ່​ຫ້ອງ​ວ່າ­ການ​ປົກ­ຄອງ​ແຂວງ​ອັດ​ຕະ​ປື ໄດ້​ຈັດ​ກອງ​ປະ­ຊຸມ​ປຶກ­ສາ​ຫາ­ລື ແລະ ຮັບ​ຟັງ​ລາຍ​ງານ​ຄວາມ​ຄືບ​ໜ້າ​ໃນ​ການ​ແກ້​ໄຂ​ບັນ­ຫາ​ໄພ­ພິ­ບັດ​ທີ່​ເກີດ​ຂຶ້ນ​ຢູ່​ແຂວງ​ອັດ​ຕະ​ປື ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ​ຮອງ​ລັດ­ຖະ­ມົນ­ຕີ ກະ­ຊວງ​ທີ່​ກ່ຽວ­ຂ້ອງ ແລະ ການ​ນຳ​ແຂວງ​ອັດ​ຕະ​ປື​ເຂົ້າ​ຮ່ວມ.

     ໂອ­ກາດ​ນີ້​ທ່ານ​ນາ­ຍົກ ໄດ້​ຮັບ​ຟັງ​ລາຍ​ງານ​ສະ­ພາບ​ທີ່​ເກີດ​ຂຶ້ນ ກໍ່​ຄື ຄວາມ​ຄືບ​ໜ້າ​ໃນ​ການ​ແກ້​ໄຂ​ບັນ­ຫາ​ຕ່າງໆ​ຢ່າງ­ຮອບ­ດ້ານ​ທີ່​ໄດ້​ຮັບ​ຜົນ​ກະ­ທົບ​ຈາກ​ອຸ​ທົກ​ກະ​ໄພ​ນ້ຳ​ຖ້ວມ ຢູ່​ເມືອງ​ສະ­ໜາມ​ໄຊ ນັບ​ແຕ່​ມື້​ເກີດ​ເຫດ­ການ​ຈົນ​ເຖິງ​ວັນ​ທີ 31 ກໍ­ລະ­ກົດ 2018 ຈາກ​ທ່ານ​ຮອງ​ນາ­ຍົກ​ວ່າ: ພາຍ­ຫຼັງ​ຄະ­ນະ​ຮັບ­ຜິດ­ຊອບ​ແກ້​ໄຂ​ໄພ­ພິ­ບັດ​ທັງ​ສູນ​ກາງ ແລະ ທ້ອງ­ຖິ່ນ​ໄດ້​ຮັບ​ການ​ແຕ່ງ­ຕັ້ງ​ແລ້ວ ກໍ່​ແບ່ງ​ຄວາມ​ຮັບ­ຜິດ­ຊອບ​ກັນ​ຢ່າງ​ຈະ­ແຈ້ງ​ໃນ​ແຕ່​ລະ​ຂັ້ນ ມີ​ການ​ປະ­ຊຸມ​ຄົ້ນ­ຄວ້າ​ປຶກ­ສາ​ຫາ­ລື​ປະ­ສານ​ງານ​ກັນ ແລະ ດຳ­ເນີນ​ການ​ແກ້​ໄຂ​ວຽກ​ງານ​ໃນ​ແຕ່​ລະ​ດ້ານ​ຢ່າງ​ຕໍ່​ເນື່ອງ ເຮັດ​ໃຫ້­ການ​ແກ້​ໄຂ​ແຕ່​ລະ​ບັນ­ຫາ​ມີ​ຄວາມ​ຄືບ​ໜ້າ​ເປັນ​ຢ່າງ​ດີ ເປັນ­ຕົ້ນ ການ​ຈັດ​ສັນ​ທີ່​ພັກ­ຊົ່ວ­ຄາວ​ການ​ຊ່ວຍ­ເຫຼືອ​ປະ­ຊາ­ຊົນ​ໄປ​ພັກ​ທີ່​ສູນ​ອົບ​ພະ​ຍົບ​ຊົ່ວ­ຄາວ ການ­ແຈກ­ຢາຍ​ມອບ​ເຄື່ອງ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ແກ່​ປະ­ຊາ­ຊົນ​ຜູ້​ເຄາະ​ຮ້າຍ ການ​ປິ່ນ­ປົວ​ຜູ້​ທີ່​ໄດ້​ຮັບ​ບາດ­ເຈັບ ການ​ຊອກ​ຄົ້ນ​ຫາ​ຜູ້​ສູນ­ຫາຍ ການ​ຮັກ­ສາ​ຄວາມ​ສະ­ຫງົບ​ຄວາມ​ເປັນ​ລະ­ບຽບ​ຮຽບ​ຮ້ອຍ ການ​ອະ­ນາ­ໄມ​ຮັກ­ສາ​ຄວາມ​ສະ­ອາດ ການ​ຮັບ​ເຄື່ອງ​ຊ່ວຍ­ເຫຼືອ​ການ​ແຍກ-ການ​ຈັດ​ມ້ຽນ ແລະ ການ​ຄຸ້ມ​ຄອງ​ເຄື່ອງ​ຊ່ວຍ­ເຫຼືອ ການ​ປັບ­ປຸງ​ພື້ນ­ຖານ​ໂຄງ​ລ່າງ​ຊົ່ວ­ຄາວ ເພື່ອ​ຮັບ​ໃຊ້​ການ​ແກ້​ໄຂ​ໄພ­ພິ­ບັດ (ເສັ້ນ­ທາງ ຂົວ​ຂ້າມ​ນ້ຳ ໄຟ­ຟ້າ ນ້ຳ​ໃຊ້ ຫ້ອງ​ນ້ຳ​ເຄື່ອນ​ທີ່​ສັນ­ຍານ​ການ​ສື່­ສານ ແລະ ອື່ນໆ) ການ​ໂຄ­ສະ­ນາ​ເຜີຍ­ແຜ່​ໃຫ້​ຂໍ້​ມູນ​ແກ່​ສັງ­ຄົມ ການ​ປຸກ­ລະ­ດົມ​ສັງ­ຄົມ​ເຂົ້າ​ຮ່ວມ​ຊ່ວຍ­ເຫຼືອ ແລະ ວຽກ​ງານ​ອື່ນໆ​ອີກ.

    ສຳ­ລັບ​ແຜນ­ການ​ຕໍ່­ໜ້າ​ທີ່​ຈະ​ຕ້ອງ​ໄດ້​ເຮັດ​ດ່ວນ ແມ່ນ​ເລັ່ງ​ໃສ່​ຊອກ​ຄົ້ນ​ຫາ​ຜູ້​ທີ່​ຍັງ​ສູນ­ຫາຍ ປັບ­ປຸງ​ພື້ນ­ຖານ​ໂຄງ​ລ່າງ​ໃຫ້​ສາ­ມາດ​ຮອງ​ຮັບ​ການ​ແກ້​ໄຂ​ວຽກ​ງານ​ອັນ​ຮີບ​ດ່ວນ​ໄດ້ ສ້າງ​ທີ່​ພັກ­ຊົ່ວ­ຄາວ​ໃຫ້​ແກ່​ຜູ້​ປະ­ສົບ​ເຄາະ​ຮ້າຍ (ຂະ­ຫຍາຍ​ທີ່​ພັກ​ເພື່ອ​ບໍ່​ໃຫ້​ມີ​ຄວາມ​ແອ​ອັດ) ການ​ຕິດ­ຕາມ​ປ້ອງ​ກັນ ແລະ ປິ່ນ­ປົວ​ພະ­ຍາດ​ໃຫ້​ແກ່​ປະ­ຊາ­ຊົນ ເກັບ​ກຳ​ຂໍ້​ມູນ ແລະ ປະ​ເມີນ​ຜົນ​ເສຍ​ຫາຍ ຈັດ​ສັນ​ແຍກ​ເຄື່ອງ​ຊ່ວຍ­ເຫຼືອ​ໃຫ້​ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ​ຖືກ­ຕ້ອງ​ຕາມ​ແຕ່​ລະ​ປະ­ເພດ ແລະ ນຳ­ໄປ​ແຈກ​ຢາຍ​ໃຫ້​ເຖິງ​ປະ­ຊາ­ຊົນ ວາງ​ແຜນ​ປັບ­ປຸງ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທັງ​ໄລ­ຍະ​ສັ້ນ ແລະ ໄລ­ຍະ​ຍາວ.

ໃນ​ໂອ­ກາດ​ນີ້ ທ່ານ​ນາ­ຍົກ​ໄດ້​ໂອ້​ລົມ​ຕໍ່​ຜູ້​ເຂົ້າ​ຮ່ວມ ແລະ ເນັ້ນ​ຕື່ມ​ບາງ​ດ້ານ ເປັນ­ຕົ້ນ ສືບ­ຕໍ່​ຄົ້ນ​ຫາ​ຜູ້​ທີ່​ສູນ­ຫາຍ​ມາ​ໃຫ້​ໄດ້​ທັງ​ໝົດ​ໄວ​ເທົ່າ­ໃດ​ຍິ່ງ​ດີ ຖ້າ​ມີ​ຄວາມ​ເປັນ​ໄປ​ໄດ້​ເຮັດ​ໃຫ້​ສຸດ​ຂີດ​ສຸດ​ຄວາມ​ສາ­ມາດ​ຈັດ​ສັນ​ປະ­ຊາ­ຊົນ​ໄປ​ຢູ່​ທີ່​ປອດ​ໄພ ແລະ ມີ​ຊີ­ວິດ​ການ​ເປັນ​ຢູ່​ດີ​ຂຶ້ນ​ເປັນ​ກ້າວໆ ພ້ອມ​ທັງ​ຟື້ນ​ຟູ​ຈິດ­ໃຈ​ຂອງ​ເຂົາ­ເຈົ້າ​ໃຫ້​ເປັນ​ປົກ­ກະ­ຕິ​ການ​ຈັດ​ສັນ​ເຄື່ອງ​ຊ່ວຍ­ເຫຼືອ ແມ່ນ​ເຮັດ​ໃຫ້​ດີ​ທີ່​ສຸດ​ເຮັດ​ຢ່າງ​ຖືກ­ຕ້ອງ​ມີ​ຄວາມ​ປອດ​ໃສ​ມອບ​ໃຫ້​ເຖິງ​ປະ­ຊາ­ຊົນ​ທຸກ​ຄົນ​ຕາມ​ຄວາມ​ເໝາະ​ສົມ ແລະ ແທດ​ຕົວ​ຈິງ​ສືບ­ຕໍ່​ເກັບ​ກຳ​ຂໍ້​ມູນ​ຜົນ​ເສຍ​ຫາຍ​ດ້ານ​ຕ່າງໆ​ໃຫ້​ມີ​ຄວາມ​ຖືກ­ຕ້ອງ​ຊັດ​ເຈນ ແລະ ມີ​ຄວາມ​ເປັນ​ເອ­ກະ​ພາບ​ກວ່າ​ເກົ່າ ເອົາ­ໃຈ­ໃສ່​ເບິ່ງ­ແຍງ ແລະ ປິ່ນ­ປົວ​ສຸ­ຂະ­ພາບ​ຂອງ​ປະ­ຊາ­ຊົນ​ຢ່າງ​ໃກ້­ຊິດ ຫຼີກ​ລ່ຽງ​ການ​ແຜ່​ລະ­ບາດ​ຂອງ​ພະ­ຍາດ​ໃຫ້​ມີ​ການ​ລາຍ​ງານ​ສະ­ຫຼຸບ​ຕີ​ລາ­ຄາ​ເປັນ​ປະ­ຈຳ ໃຫ້​ມີ​ຜູ້​ຮັບ­ຜິດ­ຊອບ ແລະ ບັນ­ຊາ​ຈະ­ແຈ້ງ ລວມ​ສູນ​ຢູ່​ກັບ​ຄະ­ນະ​ສະ­ເພາະ​ກິດ ຖ້າ​ຫາກ​ຜູ້​ຖືກ​ມອບ​ໝາຍ​ບໍ່​ສາ­ມາດ​ຕັດ­ສິນ​ໄດ້ ແມ່ນ​ໃຫ້​ມາ​ຫາ​ຈຸດ​ບັນ­ຊາ​ການ ເພື່ອ​ແກ້​ໄຂ​ບັນ­ຫາ​ທ້າ​ທາຍ ຄວນ​ມອບ​ວຽກ ແລະ ຖອດ​ຖອນ​ບົດ­ຮຽນ ພ້ອມ​ທັງ​ມີ​ກົນ​ໄກ​ປະ­ສານ​ງານ​ທີ່​ຄ່ອງ​ແຄ້ວ ແລະ ມີ​ປະ​ສິດ­ທິ​ຜົນ.

    ໃນ​ໂອ­ກາດ​ລົງ​ມາ​ຕິດ­ຕາມ​ຜົນ​ກະ­ທົບ​ຈາກ​ໄພ­ພິ­ບັດ​ຢູ່​ແຂວງ​ອັດ​ຕະ​ປື​ຄັ້ງ​ນີ້ ທ່ານ​ນາ­ຍົກ ພ້ອມ​ດ້ວຍ​ຄະ­ນະ ຍັງ​ໄດ້​ໄປ​ຕິດ­ຕາມ ແລະ ມອບ​ເຄື່ອງ​ຊ່ວຍ­ເຫຼືອ​ໃຫ້​ປະ­ຊາ­ຊົນ​ຜູ້​ເຄາະ​ຮ້າຍ​ທີ່​ກຳ­ລັງ​ປິ່ນ­ປົວ ແລະ ຕິດ­ຕາມ​ເບິ່ງ­ແຍງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ຢູ່​ບັນ­ດາ​ສູນ​ອົບ​ພະ​ຍົບ ເປັນ­ຕົ້ນ ປະ­ຊາ­ຊົນ​ທີ່​ບາດ­ເຈັບ​ກຳ­ລັງ​ປິ່ນ­ປົວ​ຢູ່​ໂຮງ­ໝໍ​ແຂວງ​ອັດ​ຕະ​ປື ແລະ ພັກ​ເຊົາ​ຢູ່​ສູນ​ອົບ​ພະ​ຍົບ​ຊົ່ວ­ຄາວ​ຈຸດ​ໂຮງ­ຮຽນ​ມັດ­ທະ­ຍົມ​ຈັນ­ທາ (ເທ­ສະ​ບານ​ແຂວງ) ຈຸດ​ບ້ານ​ໃໝ່ ຈຸດ​ບ້ານ​ຕຳ​ມໍ​ຢອດ ໂຮງ­ຮຽນ ມສ ສະ­ໜາມ​ໄຊ ໃນ​ໂອ­ກາດ​ມາ​ເຄື່ອນ​ໄຫວ​ຕິດ­ຕາມ​ຄັ້ງ​ນີ້ ທ່ານ​ນາ­ຍົກ ຍັງ​ໄດ້​ໄປ​ມອບ​ວັດ­ຖຸ​ປັດ​ໄຈ​ຈຳ­ນວນ​ໜຶ່ງ​ໃຫ້​ແກ່​ຄອບ­ຄົວ​ຜູ້​ເສຍ​ຊີ­ວິດ​ໃນ​ການ​ໄປ​ປະ­ຕິ­ບັດ​ໜ້າ­ທີ່​ຊ່ວຍ­ເຫຼືອ​ຜູ້​ປະ­ສົບ​ໄພ​ແຂວງ​ອັດ​ຕະ​ປື​ຕື່ມ​ອີກ.

ຂ່າວທີ່ກ່ຽວຂ້ອງ