ຮອງນາຍົກ ລົງສຳຫຼວດເບິ່ງສະພາບການບໍລິຫານຈັດການນ້ຳໃນເຂື່ອນ ທີ່ແຂວງອັດຕະປື

335 03 ສ.ຫ. 2018 ຂ່າວໜ້າ​ໜຶ່ງ
ຮອງນາຍົກ ລົງສຳຫຼວດເບິ່ງສະພາບການບໍລິຫານຈັດການນ້ຳໃນເຂື່ອນ ທີ່ແຂວງອັດຕະປື

    ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ຄະ­ນະ ໄດ້​ເດີນ­ທາງ​ໄປ​ສຳ​ຫຼວດ​ເບິ່ງ​ສະ­ພາບ​ການ​ເກັບ​ກັກ ແລະ ບໍ­ລິ­ຫານ​ຈັດ­ການ​ນ້ຳ​ໃນ​ເຂື່ອນ​ໄຟ­ຟ້າ​ແຫ່ງ​ຕ່າງໆ​ທີ່­ຢູ່​ພາຍ​ໃນ​ແຂວງ​ອັດ​ຕະ​ປື ເປັນ­ຕົ້ນ ເຂື່ອນ​ໄຟ­ຟ້າ​ນ້ຳ​ກົງ 1 ແລະ 2 ເຂື່ອນ​ໄຟ­ຟ້າ​ຫ້ວຍ​ເຮາະ ເຂື່ອນ​ໄຟ­ຟ້າ​ເຊ​ກະ​ໝານ 1 ໃນ​ວັນ​ທີ 1 ສິງ­ຫາ 2018.

    ທ່ານ​ຮອງ​ນາ­ຍົກ ພ້ອມ​ດ້ວຍ​ຄະ­ນະ​ໄດ້​ລົງ​ເລິກ​ສຳ​ຫຼວດ ແລະ ສອບ​ຖາມ​ເບິ່ງ​ຂໍ້​ມູນ​ຂອງ​ໂຄງ­ການ​ເຂື່ອນ​ໄຟ­ຟ້າ​ເຊ​ກະ​ໝານ 1 ເຊິ່ງ​ເຫັນ​ວ່າ: ລະ­ດັບ​ນ້ຳ​ໃນ​ອ່າງ​ຮອດ​ເວ­ລາ 24:00 ໂມງ ວັນ​ທີ 31 ກໍ​ລະ ກົດ 2018 ຢູ່​ທີ່​ລະ­ດັບ 226,03 ແມັດ ເຊິ່ງ​ລະ­ດັບ​ນ້ຳ​ຍັງ​ບໍ່​ທັນ​ໄຫຼ​ຜ່ານ​ປະ­ຕູ​ນ້ຳ​ລົ້ນ (ລະ­ດັບ​ນ້ຳ​ສູງ​ຂຶ້ນ​ຕື່ມ​ປະ­ມານ 4 ແມັດ ຈຶ່ງ​ຈະ​ເຖິງ​ສັນ​ປະ­ຕູ​ນ້ຳ​ລົ້ນ) ລະ­ດັບ​ນ້ຳ​ຂຶ້ນ​ສູງ​ສຸດ​ໃນ​ໄລ­ຍະ​ຜ່ານ​ມາ ແມ່ນ​ຢູ່​ທີ່​ລະ­ດັບ 230 ແມັດ ແລະ ລະ­ດັບ​ນ້ຳ​ຂຶ້ນ​ຕາມ​ຄວາມ​ສາ­ມາດ​ບັນ­ຈຸ​ຂອງ​ອ່າງ​ແມ່ນ​ຢູ່​ທີ່​ລະ­ດັບ 233,16 ແມັດ​ປະ­ລິ­ມານ​ນ້ຳ​ໄຫຼ​ເຂົ້າ​ອ່າງ​ໃນ​ເດືອນ​ກໍ­ລະ­ກົດ 2018 ສະ­ເລ່ຍ 575,95 ແມັດ​ກ້ອນ​ຕໍ່​ວິ­ນາ­ທີ ແລະ ປະ­ລິ­ມານ​ໄຫຼ​ເຂົ້າ​ສູງ​ສຸດ 1.928 ແມັດ​ກ້ອນ​ຕໍ່​ວິ­ນາ­ທີ ບໍ​ລິ​ມາດ​ນ້ຳ​ໃນ​ອ່າງ (31/7/2018) ມີ 4.156 ຕື້​ແມັດ​ກ້ອນ ບໍ​ລິ​ມາດ​ນ້ຳ​ໃນ​ອ່າງ​ຢູ່​ໃນ​ລະ­ດັບ​ນ້ຳ​ຂຶ້ນ​ສູງ​ສຸດ 4.808 ຕື້​ແມັດ​ກ້ອນ ຄວາມ​ສາ­ມາດ​ບັນ­ຈຸ​ນ້ຳ­ຂອງ​ອ່າງ 5.275 ຕື້​ແມັດ​ກ້ອນ ມີ​ນ້ຳ​ສຳ­ລັບ​ຮັບ​ໃຊ້​ການ​ຜະ­ລິດ​ໄຟ­ຟ້າ​ໃນ​ປັດ­ຈຸ­ບັນ 1.034 ຕື້​ແມັດ​ກ້ອນ.

    ໂອ­ກາດ​ນີ້​ທ່ານ​ຮອງ​ນາ­ຍົກ ໄດ້​ໃຫ້​ກຽດ​ໂອ້​ລົມ​ຕໍ່​ຄະ­ນະ​ຮັບ­ຜິດ­ຊອບ​ໂຄງ­ການ ໂດຍ​ໄດ້​ກ່າວ​ຍ້ອງ­ຍໍ​ຊົມ­ເຊີຍ​ຕໍ່​ຜົນ­ສຳ­ເລັດ​ທີ່​ໂຄງ­ການ​ເຂື່ອນ​ໄຟ­ຟ້າ​ເຊ​ກະ​ໝານ 1 ສາ­ມາດ​ປະ­ຕິ­ບັດ​ໄດ້​ໃນ​ໄລ­ຍະ​ທີ່​ຜ່ານ​ມາ ພ້ອມ​ທັງ​ເນັ້ນ​ຕື່ມ​ບາງ​ດ້ານ ເປັນ­ຕົ້ນ ໃຫ້​ເອົາ­ໃຈ­ໃສ່​ຕໍ່​ການ​ຕິດ­ຕາມ​ປະ­ລິ­ມານ​ນ້ຳ ກໍ່​ຄື ການ​ບໍ­ລິ­ຫານ​ຈັດ­ການ​ນ້ຳ​ໃນ​ອ່າງ​ຢ່າງ​ໃກ້­ຊິດ​ເປັນ​ປົກ­ກະ­ຕິ ແລະ ທັນ​ສະ­ພາບ​ການ ເອົາ­ໃຈ­ໃສ່​ຕໍ່​ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ​ໃນ​ຂົງ­ເຂດ​ອ້ອມ​ຮອບ ແລະ ໃນ​ໂຄງ­ການ ໂດຍ​ສະ­ເພາະ ແມ່ນ​ປ່າ­ໄມ້ ຫ້ວຍ​ນ້ຳ​ລຳ­ເຊ ສັດ ສາ​ວາ​ສິ່ງ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ບັນ­ດາ​ເນື້ອ​ໃນ​ສັນ­ຍາ​ສຳ​ປະ­ທານ​ຢ່າງ​ເຂັ້ມ​ງວດ ແລະ ເກີດ​ປະ­ໂຫຍດ​ສູງ​ສຸດ​ແກ່​ທຸກ​ຝ່າຍ ລວມ​ທັງ​ການ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ດຳ­ລົງ​ຊີ­ວິດ​ໃນ​ເຂດ​ຍົກ­ຍ້າຍ​ຈັດ​ສັນ​ໃຫ້​ມີ​ອາ­ຊີບ​ທີ່​ໝັ້ນ­ຄົງ ແລະ ມີ​ຄຸ­ນະ­ພາບ​ຊີ­ວິດ​ທີ່​ດີ​ຂຶ້ນ​ເປັນ​ກ້າວໆ.

ຂ່າວທີ່ກ່ຽວຂ້ອງ