ຂ່າວຫຼ້າສຸດ

ເງິນ 5 ແສນກີບ ເປັນການຊ່ວຍເຫຼືອເບື້ອງຕົ້ນ ຄອບຄົວຜູ້ທີ່ຈຳເປັນ

303 03 ສ.ຫ. 2018 ຂ່າວໜ້າ​ໜຶ່ງ
ເງິນ 5 ແສນກີບ ເປັນການຊ່ວຍເຫຼືອເບື້ອງຕົ້ນ ຄອບຄົວຜູ້ທີ່ຈຳເປັນ

    ທ່ານ​ນາງ ໃບ​ຄຳ ຂັດ​ທິ​ຍະ ຮອງ​ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ​ໃນ​ວັນ 2 ສິງ­ຫາ 2018 ວ່າ: ຕໍ່​ກັບ​ບັນ­ຫາ​ການ​ຮັບ​ບໍ­ລິ­ຈາກ​ວັດ­ຖຸ ແລະ ເງິນ ເພື່ອ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ໂດຍ​ການ​ຊີ້​ນຳ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ແລະ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ເປັນ​ປະ­ທານ​ຊີ້​ນຳ​ໜ່ວຍ​ສະ­ເພາະ​ກິດ ໃນ​ການ­ຈັດ­ຕັ້ງ​ປະ­ຕິ­ບັດ​ຊ່ວຍ­ເຫຼືອ​ສຸກ​ເສີນ​ແກ້​ໄຂ​ຜູ້​ປະ­ສົບ​ໄພ.

    ໂດຍ​ສະ­ເພາະ ບັນ­ຫາ​ການ​ດູ​ແລ​ເງິນ­ສົດ​ທີ່​ໄດ້​ຈາກ​ການ​ປະ­ກອບ­ສ່ວນ​ຈາກ​ສັງ­ຄົມ ໄດ້​ນຳ​ເຂົ້າ​ສູ່​ທະ­ນາ­ຄານ​ລວມ​ສູນ​ທີ່​ມີ​ການ​ຄຸ້ມ​ຄອງ​ວ່າ​ດ້ວຍ​ກົດ­ໝາຍ​ງົບ­ປະ­ມານ ແລະ ປະ­ຕິ­ບັດ​ການ​ໃຊ້​ຈ່າຍ​ທຸກ​ຢ່າງ​ເປັນ​ໄປ​ຕາມ​ແຜນ ຕາມ​ການ​ຕົກ­ລົງ​ຂອງ​ລັດ­ຖະ­ບານ​ທັງ​ໝົດ ສຳ­ລັບ​ວັດ­ຖຸ​ສິ່ງ​ຂອງ​ເຄື່ອງ​ທີ່​ພວກ​ເຮົາ​ໄດ້​ຮັບ​ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ເປັນ​ຈຳ­ນວນ​ຫຼາຍ​ຈາກ​ພາກ­ສ່ວນ​ຕ່າງໆ ໄດ້​ມີ​ການ​ຄຸ້ມ​ຄອງ​ໃນ​ເວ­ລາ​ທີ່​ຮັບ​ເກັບ​ມ້ຽນ​ເຂົ້າ​ສາງ ແລະ ໃນ​ເວ­ລາ​ເບີກ​ຈ່າຍ ພວກ​ເຮົາ​ມີ​ບັນ­ຊີ​ທັງ​ໝົດ​ທຸກ​ລາຍ­ການ​ທີ່​ໄດ້​ຮັບ​ການ​ຊ່ວຍ­ເຫຼືອ.

    ຕິດ​ພັນ​ກັບ​ການ​ປະ­ຕິ­ບັດ​ນະ­ໂຍ­ບາຍ​ເບື້ອງ​ຕົ້ນ ໃນ​ການ​ຊ່ວຍ­ເຫຼືອ​ຄອບ­ຄົວ​ຜູ້​ປະ­ສົບ​ໄພ​ຢູ່​ເມືອງ​ສະ​ໝາມ​ໄຊ ແຂວງ​ອັດ​ຕະ​ປື ໂດຍ​ການ​ຕົກ­ລົງ​ຂອງ​ທາງ​ຄະ­ນະ​ແກ້​ໄຂ​ສະ­ເພາະ​ກິດ​ລະ­ດັບ​ຊາດ ກ່ຽວ​ກັບ​ການ​ແກ້​ໄຂ​ໄພ­ພິ­ບັດ​ໃນ​ຄັ້ງ​ນີ້ ໂດຍ​ແມ່ນ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ​ເປັນ​ຜູ້​ຊີ້​ນຳ​ໂດຍ​ກົງ ມອບ​ໃຫ້​ແຂວງ​ອັດ​ຕະ​ປື​ເປັນ​ຜູ້​ຈັດ​ຕັ້ງ​ປະ­ຕິ­ບັດ​ໃນ​ການ​ເອົາ​ເງິນ 5 ແສນ​ກີບ ໄປ​ໃຫ້​ຄອບ­ຄົວ​ທີ່​ປະ­ສົບ​ໄພ​ເປັນ​ເງິນ​ເບື້ອງ​ຕົ້ນ ເພື່ອ​ໃຫ້​ບາງ​ຄອບ­ຄົວ​ອາດ​ໄດ້​ໃຊ້​ຈ່າຍ​ທີ່​ຈຳ­ເປັນ​ເທົ່າ​ນັ້ນ ແຕ່​ໂດຍ​ລວມ​ແລ້ວ ມາ​ຮອດ​ປັດ­ຈຸ­ບັນ ອົງ­ການ​ປົກ­ຄອງ​ທ້ອງ­ຖິ່ນ ກໍ່​ຄື ສູນ​ພັກ​ເຊົາ​ຊົ່ວ­ຄາວ​ແຕ່​ລະ​ຈຸດ ໄດ້​ມີ​ການ​ໃຫ້​ບໍ­ລິ­ການ​ທີ່​ຄົບ​ຊຸດ ເປັນ­ຕົ້ນ ຢາ​ປິ່ນ­ປົວ​ສຸ­ຂະ­ພາບ ການ​ອຳ­ນວຍ​ຄວາມ​ສະ­ດວກ​ທາງ​ດ້ານ​ອາ­ຫານ ແລະ ເຄື່ອງ­ນຸ່ງ​ຫົ່ມ​ທີ່​ໄດ້​ຈາກ​ນ້ຳ­ໃຈ​ຊ່ວຍ­ເຫຼືອ​ຂອງ​ສັງ­ຄົມ​ທັງ​ພາຍ​ໃນ ແລະ ຕ່າງ­ປະ­ເທດ ໄປ​ຊ່ວຍ­ເຫຼືອ​ຢ່າງ​ເປັນ​ລະ­ບົບ ໃນ​ຈຳ­ນວນ 6 ສູນ ມີ 5.000 ກວ່າ​ຄົນ.

    ທ່ານ​ຮອງ​ລັດ­ຖະ­ມົນ­ຕີ ກ່າວ​ຕື່ມ​ວ່າ: ພວກ​ເຮົາ​ໄດ້​ມີ​ການ​ບໍ­ລິ­ຫານ​ຈັດ­ການ​ຢ່າງ​ເປັນ​ລະ­ບົບ​ຄົບ​ຊຸດ ມີ​ການ​ຊີ້​ນຳ​ຈາກ​ການ​ນຳ​ສູງ​ສຸດ​ຂໍ​ໃຫ້​ປະ­ຊາ­ຊົນ ກໍ່​ຄື ສັງ­ຄົມ​ບໍ່​ໃຫ້​ເປັນ​ຫ່ວງ ພວກ​ເຮົາ​ດຳ­ເນີນ​ວຽກ​ງານ​ທຸກ​ຢ່າງ​ມີ​ຄວາມ​ໂປ່ງ​ໃສ ສາ­ມາດ​ກວດ​ສອບ​ໄດ້ ເຊິ່ງ​ພະ­ນັກ­ງານ ກໍ່​ຄື ອົງ­ການ​ອຳ­ນາດ​ລັດ ແລະ ປະ­ຊາ­ຊົນ​ລວມ​ທັງ​ຜູ້​ສະ­ໝັກ​ໃຈ​ທັງ­ຫຼາຍ​ໄດ້​ທຸ່ມ​ເທ​ກຳ­ລັງ ກາຍ ແລະ ໃຈ ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ຊ່ວຍ­ເຫຼືອ​ໃນ​ຄັ້ງ​ນີ້ ດ້ວຍ​ຄວາມ​ບໍ­ລິ­ສຸດ​ໃຈ ດ້ວຍ​ຄວາມ​ຈິງ​ໃຈ ໂປ່ງ​ໃສ ເຊິ່ງ​ວຽກ​ງານ​ແກ້​ໄຂ​ໄພ­ພິ­ບັດ​ຄັ້ງ​ນີ້ ຍັງ​ຈະ​ມີ​ການ​ສືບ­ຕໍ່​ອີກ​ຫຼາຍ​ໄລ­ຍະ ແລະ ວຽກ​ງານ​ຂັ້ນ​ຕໍ່​ໄປ​ພາຍ­ຫຼັງ​ສະ­ພາບ​ການ​ກັບ​ຄືນ​ສູ່​ປົກ­ກະ­ຕິ​ແລ້ວ ຍັງ​ຈະ​ໄດ້​ມີ​ຫຼາຍ​ໜ້າ​ວຽກ ເປັນ­ຕົ້ນ ການ​ຟື້ນ​ຟູ​ພື້ນ­ຖານ​ໂຄງ​ລ່າງ ການ​ຈັດ​ສັນ​ທີ່­ຢູ່​ອາ­ໄສ ເຮືອນ​ຊານ ພື້ນ​ທີ່​ທຳ​ການ​ຜະ­ລິດ ແລະ ສາ​ທາ​ລະ​ນຸ​ປະ​ໂພກ​ອື່ນໆ​ເຫຼົ່າ​ນີ້​ເປັນ­ຕົ້ນ.

    ອີກ​ເທື່ອ​ໜຶ່ງ​ຂໍ​ໃຫ້​ປະ­ຊາ­ຊົນ​ຈົ່ງ​ມີ​ສະ­ຕິ​ໃນ​ການ​ບໍ­ລິ­ໂພກ​ຮັບ​ຂໍ້​ມູນ​ຂ່າວ­ສານ ການ​ແຊ​ຂໍ້​ມູນ​ຜ່ານ​ສື່​ຕ່າງໆ ຂໍ​ໃຫ້​ມີ​ການ​ພິ­ຈາ­ລະ­ນາ​ໃນ​ການ​ຮັບ​ຟັງ ແລະ ຕິດ­ຕາມ​ຂໍ້​ມູນ​ຂ່າວ​ຕ່າງໆ ສິ່ງ​ໃດ​ເປັນ­ຄວາມ​ຈິງ​ຖືກ­ຕ້ອງ​ສອດ­ຄ່ອງ​ກັບ​ຄວາມ​ເປັນ​ຈິງ ແລະ ຂ່າວ​ບິດ​ເບືອນ ອັນ​ກໍ່​ຄວາມ​ເຂົ້າ­ໃຈ​ຜິດ ແລະ ສ້າງ​ຄວາມ​ປັ່ນ​ປ່ວນ​ກໍ່​ຄວາມ​ບໍ່​ສະ­ຫງົບ​ໃນ​ສັງ­ຄົມ ຮຽກ­ຮ້ອງ​ຈົ່ງ​ເພີ່ມ​ທະ­ວີ​ນ້ຳ­ໃຈ​ແຫ່ງ​ຄວາມ​ສາ­ມັກ­ຄີ ພ້ອມ​ກັນ​ເປັນ​ກຳ­ລັງ​ໃຈ​ໃຫ້​ແກ່​ຜູ້​ປະ­ສົບ​ໄພ ແລະ ເຈົ້າ​ໜ້າ­ທີ່​ທຸກ​ພາກ­ສ່ວນ​ທີ່​ປະ­ຕິ­ບັດ​ໜ້າ­ທີ່​ຢູ່​ພາກ​ສະ­ໜາມ ແລະ ເບື້ອງ​ຫຼັງ​ທີ່​ໄດ້​ປະ­ກອບ­ສ່ວນ​ວຽກ​ງານ​ຂະ​ບວນ​ການ​ນີ້ ເພື່ອ​ພ້ອມ​ກັນ​ປະ­ຕິ­ບັດ​ໜ້າ­ທີ່​ສາ­ມາດ​ຜ່ານ​ພົ້ນ​ວິ​ກິດ​ການ​ຄັ້ງ​ນີ້ ເພື່ອ​ສາ­ມາດ​ເຮັດ​ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໂດຍ​ໄວ.

ຂ່າວທີ່ກ່ຽວຂ້ອງ