ຂ່າວຫຼ້າສຸດ

ລະດັບນ້ຳຂອງເພີ່ມຂຶ້ນ ນະຄອນຫຼວງຕ້ອງການເປົາ ແລະ ໄຖ່ຈາກສັງຄົມ

250 03 ສ.ຫ. 2018 ຂ່າວໜ້າ​ໜຶ່ງ

    ປັດ­ຈຸ­ບັນ ​ທົ່ວ​ປະ­ເທດ​ມີ​ສະ­ພາບ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້​ລະ­ດັບ​ນ້ຳ​ໃນ​ແມ່­ນ້ຳ​ຫຼາຍ​ສາຍ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ຢູ່​ນະ­ຄອນ­ຫຼວງ​ວຽງ​ຈັນ ຈາກ​ການ​ລົງ​ຕິດ­ຕາມ​ເກັບ​ກຳ​ຂໍ້​ມູນ​ຕົວ​ຈິງ​ຂອງ​ສື່​ມວນ​ຊົນ​ໜັງ­ສື­ພິມ​ວຽງ​ຈັນ​ໃໝ່ ໃນ​ວັນ​ທີ 2 ສິງ­ຫາ 2018 ເຫັນ​ວ່າ: ລະ­ດັບ​ນ້ຳ­ຂອງ​ໄດ້​ຂຶ້ນ​ສູງ​ໃນ​ຫຼາຍ​ຈຸດ ເປັນ­ຕົ້ນ ແມ່ນ​ຢູ່​ເຂດ​ບ້ານ​ໜອງ​ດາ ບ້ານ​ໃໝ່ ແລະ ບ້ານ​ຫ້ວຍ​ຫ້ອມ ເມືອງ​ສີ​ໂຄດ​ຕະ­ບອງ ລວມ​ທັງ​ເສັ້ນ­ທາງ​ໄປ​ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ລະ­ດັບ​ນ້ຳ​ໄດ້​ເຂົ້າ​ຖ້ວມ​ເຂດ​ດິນ​ກະ­ສິ­ກຳ ແລະ ບ້ານ​ເຮືອນ​ປະ­ຊາ­ຊົນ​ຈຳ­ນວນ​ໜຶ່ງ.

    ດັ່ງ­ນັ້ນ ຈຶ່ງ​ແຈ້ງ​ເຕືອນ​ມາ​ຍັງ​ປະ­ຊາ­ຊົນ​ຜູ້​ທີ່​ອາ­ໄສ​ຢູ່​ລຽບ​ຕາມ​ແຄມ​ນ້ຳ­ຂອງ ຈົ່ງ​ພ້ອມ​ກັນ​ມີ​ສະ­ຕິ​ລະ­ວັງ​ຕົວ​ສູງ​ຕິດ­ຕາມ​ສະ­ພາບ​ການ​ຂຶ້ນ​ຂອງ​ນ້ຳ​ຢ່າງ​ໃກ້­ຊິດ ເປັນ​ເຈົ້າ​ການ​ເກັບ​ມ້ຽນ​ວັດ­ຖຸ​ສິ່ງ​ຂອງ ຕະ­ຫຼອດ​ເຖິງ​ສັດ­ລ້ຽງ​ໄວ້​ໃນ​ສະ­ຖານ­ທີ່​ປອດ​ໄພ ເນື່ອງ​ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ໄດ້​ແຈ້ງ​ໃຫ້​ຮູ້​ວ່າ ປັດ­ຈຸ­ບັນ​ສະ­ພາບ​ຝົນ­ຕົກ​ຍັງ​ຈະ​ສືບ­ຕໍ່​ຕົກ​ເປັນ​ບໍ­ລິ­ເວນ​ກວ້າງ​ໃນ​ທົ່ວ​ປະ­ເທດ ເຮັດ​ໃຫ້​ສະ­ພາບ​ການ​ນ້ຳ­ຂອງ​ຂຶ້ນ​ໃກ້​ກັບ​ເຂດ​ເຕືອນ​ໄພ ແລະ ຂີດ​ອັນ­ຕະ­ລາຍ​ໃນ​ຫຼາຍ​ຈຸດ​ແລ້ວ.

    ນອກ​ນີ້ ວັນ​ທີ 2 ສິງ­ຫາ 2018 ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ ກໍ່​ໄດ້​ແຈ້ງ​ມາ​ຍັງ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ກໍ່​ຄື ຜູ້​ທີ່​ອາ­ໄສ​ຢູ່​ລຽບ​ຕາມ​ແຄມ​ນ້ຳ­ຂອງ​ໃຫ້​ມີ​ການ​ເຝົ້າ​ລະ­ວັງ ໂດຍ​ສະ­ເພາະ ເຂດ​ທີ່​ຕ່ຳ ແລະ ເຂດ​ທີ່​ເຄີຍ​ຖ້ວມ​ຜ່ານ​ມາ ພ້ອມ​ນີ້ ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ ຍັງ​ໄດ້​ເປີດ​ຮັບ​ບໍ­ລິ­ຈາກ​ເປົາ ແລະ ໄຖ່​ໃໝ່ ແລະ ເກົ່າ ເພື່ອ​ມາ​ໃສ່​ຊາຍ ສ້າງ​ເປັນ​ກຳ­ແພງ​ກັນ​ນ້ຳ​ໄຫຼ​ເຂົ້າ​ຖ້ວມ ດັ່ງ­ນັ້ນ​ຜູ້​ທີ່​ມີ​ຈິດ­ໃຈ​ຢາກ​ປະ­ກອບ­ສ່ວນ​ວັດ­ຖຸ​ດັ່ງ­ກ່າວ ກໍ່​ສາ­ມາດ​ໄປ​ມອບ​ໄດ້​ທີ່​ສູນ​ຮັບ​ບໍ­ລິ­ຈາກ​ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ ສຳ­ນັກ­ງານ​ຕັ້ງ​ຢູ່​ບ້ານ​ໂພນ​ໄຊ ເມືອງ​ໄຊ​ເຊດ​ຖາ ໃກ້​ກັບ​ວັດ​ທາດ​ຝຸ່ນ.

ຂ່າວທີ່ກ່ຽວຂ້ອງ