ຂ່າວຫຼ້າສຸດ

ອາຊຽນສົ່ງເສີມຄວາມເຂັ້ມແຂງ ແລະ ທັນສະໄໝ

245 03 ສ.ຫ. 2018 ຂ່າວໜ້າ​ໜຶ່ງ

   ໃນ​ວັນ​ທີ 2 ສິງ­ຫາ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ນຳພາ­ຄະ​ນະ​ຜູ້​ແທນ​ລາວ​ເຂົ້າ​ຮ່ວມ​ພິ­ທີ​ເປີດ​ ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ​ອາ​ຊຽນ ຄັ້ງ​ທີ 51 ພາຍ​ໃຕ້ຄຳ​ຂວັນ “ອາ​ຊຽນ​ເຂັ້ມ­ແຂງ ແລະ ທັນ​ສະ­ໄໝ” ທີ່​ປະ­ເທດ​ສິງ­ກະ­ໂປ.

   ຫຼັງ​ຈາກ​ພິ­ທີ​ເປີດ ທ່ານ​ລັດ­ຖະ­ມົນ­ຕີ ສະ­ເຫຼີມ​ໄຊ ກົມ​ມະ​ສິດ ພ້ອມ​ດ້ວຍ​ຄະ­ນະ​ຜູ້​ແທນ​ລາວ ໄດ້​ສືບ­ຕໍ່​ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ​ອາ​ຊຽນ ຄັ້ງ​ທີ 51 ຊຶ່ງ​ກອງ​ປະ­ຊຸມ​ໄດ້​ທົບ​ທວນ­ຄືນ​ຄວາມ​ຄືບ​ໜ້າຂອງ​ການ​ສົ່ງ­ເສີມ ​ຄວາມ​ເຂັ້ມ­ແຂງ​ຂອງ​ປະ­ຊາ​ຄົມ​ອາ​ຊຽນ ໂດຍ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ກິດ­ຈະ­ກຳ​ຮ່ວມ​ມື​ຕ່າງໆ ລວມ​ທັງ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ບຸ­ລິ­ມະ­ສິດ ສຳ­ລັບ​ການ​ເປັນ​ປະ­ທານ​ອາ​ຊຽນ​ຂອງ​ສິງ­ກະ­ໂປ ໂດຍ​ສະ­ເພາະແມ່ນ​ການ​ສ້າງ​ເຄືອ​ຂ່າຍ​ເມືອງ​ພັດ­ທະ­ນາ ແລະ ການ​ເພີ່ມ​ເສີມ​ໃຫ້​ກັນ ແລະ ກັນ ລະ­ຫວ່າງ​ວິ­ໄສ​ທັດ​ປະ­ຊາ​ຄົມ​ອາ​ຊຽນ 2025 ແລະ ວາ­ລະ​ເພື່ອ​ການ​ພັດ­ທະ­ນາ​ແບບ​ຍືນ​ຍົງ​ຂອງ​ສະ­ຫະ​ປະ­ຊາ​ຊາດ 2030 ແລະ ປຶກ­ສາ​ຫາ­ລື​ວິ­ທີ​ທາງ​ເພື່ອ​ຮັດ​ແໜ້ນ​ການ​ຮ່ວມ​ມື​ໃນ­ຕໍ່­ໜ້າ ໃນ​ນີ້ ທ່ານ​ລັດ­ຖະ­ມົນ­ຕີ ສະ­ເຫຼີມ​ໄຊ ກົມ​ມະ​ສິດ ໄດ້​ເນັ້ນ​ເຖິງ​ຄວາມ​ສຳ­ຄັນ​ໃນ​ການ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ເພື່ອ​ໃຫ້​ບັນ­ດາ​ປະ­ເທດ​ສະ­ມາ­ຊິກ ໂດຍ​ສະ­ເພາະ ປະ­ເທດ​ສະ­ມາ­ຊິກ​ໃໝ່ ສາ­ມາດ​ຮັດ​ແໜ້ນ​ຄວາມ​ແຕກ​ໂຕນ​ທາງ​ດ້ານ​ການ​ພັດ­ທະ­ນາ ແລະ ສົ່ງ­ເສີມ​ຄວາມ​ເຂັ້ມ­ແຂງ​ໃຫ້​ສະ­ມາ­ຊິກ​ໃໝ່ ສາ­ມາດ​ຈັດ​ຕັ້ງ​ປະ­ຕິ­ບັດ​ພັນ­ທະ​ຂອງ​ຕົນ ເພື່ອ​ບັນ­ລຸ​ວິ­ໄສ​ທັດ​ປະ­ຊາຄົມ​ອາ​ຊຽນ 2025 ແລະ ພ້ອມ​ນີ້ ກໍ່​ໄດ້​ຊຸກ­ຍູ້​ໃຫ້​ສຳ­ເລັດ​ການ​ປະ​ເມີນ​ຄວາມ​ຄືບ​ໜ້າ ​ໃນ​ການ​ຮັດ​ແຄບ​ຄວາມ​ແຕກ​ໂຕນ​ພາຍ​ໃນ​ອາ​ຊຽນ ໂດຍ​ກອງ​ເລ­ຂາ​ອາ​ຊຽນ.

   ນອກ­ຈາກ​ນັ້ນ ກອງ​ປະ­ຊຸມ​ຍັງ​ໄດ້​ຮັບ​ຊາບ​ຄວາມ​ຄືບ​ໜ້າ​ຂອງ​ວຽກ​ງານ​ສົ່ງ­ເສີມ ແລະ ປົກ​ປ້ອງ​ສິດ­ທິ​ມະນຸດ​ພາຍ​ໃນ​ອາ​ຊຽນ ພາຍ​ໃຕ້​ການ​ດຳ­ເນີນ​ງານ​ຂອງ​ຄະ­ນະ​ກຳ­ມາ​ທິ​ການ​ລະ­ຫວ່າງ​ລັດ­ຖະ­ບານ​ອາ​ຊຽນ ວ່າ​ດ້ວຍ​ສິດ­ທິ​ມະ­ນຸດ ແລະ ແລກ­ປ່ຽນ​ຄວາມ​ຄິດ​ຄວາມ​ເຫັນ​ກ່ຽວ​ກັບ​ສະ­ພາບ​ການ​ພາກ​ພື້ນ ແລະ ສາ­ກົນ​ທີ່​ມີ​ຄວາມ​ສົນ­ໃຈ ແລະ ເປັນ​ຫ່ວງ​ຮ່ວມ​ກັນ ເຊັ່ນ: ການ​ກໍ່​ການ​ຮ້າຍການ​ຄ້າ​ມະ­ນຸດ ບັນ­ຫາ​ຢາ​ເສບ​ຕິດ ໄພ­ພິ­ບັດ​ທຳ​ມະ​ຊາດ ແລະ ສະ­ພາບ​ການ​ແຫຼມ​ເກົາ­ຫຼີ ແລະ ທະ­ເລ​ຈີນ​ໃຕ້.

   ກອງ​ປະ­ຊຸມ​ຍັງ​ໄດ້​ຮັບ​ຊາບ​ຄວາມ​ຄືບ​ໜ້າ​ຂອງ​ການ­ຈັດ­ຕັ້ງ​ປະ­ຕິ­ບັດ​ ຖະ­ແຫຼງ­ການ​ປະ­ພຶດ​ຂອງ​ບັນ­ດາ​ຝ່າຍ​ໃນ​ທະ­ເລ​ຈີນ​ໃຕ້ ໂດຍ​ສະ­ເພາະ ການ​ປຶກ­ສາ​ຫາ­ລື​ກ່ຽວ​ກັບ​ກົດ​ແຫ່ງ​ການ​ປະ­ພຶດ​ຢູ່​ທະ­ເລ​ຈີນ​ໃຕ້ ຫຼັງ​ຈາກ​ນັ້ນ ທ່ານ​ລັດ­ຖະ­ມົນ­ຕີ ສະ­ເຫຼີມ​ໄຊ ກົມ​ມະ​ສິດ ຍັງ​ໄດ້​ເຂົ້າ​ຮ່ວມ​ລົງ​ນາມ​ເອ­ກະ­ສານ​ການ​ຮັບ​ເອົາ​ອາກ​ຊັງ​ຕິດ ແລະ ອີ​ຣານ ເຂົ້າ​ເປັນ​ພາ­ຄີ​ຂອງ​ສົນ­ທິ­ສັນ­ຍາ​ໄມ­ຕີ​ຈິດ ແລະ ການ​ຮ່ວມ​ມື​ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້.

   ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ໄດ້​ສະ­ແດງ​ຄວາມ​ເຫັນ­ໃຈ​ຕໍ່ ສປປ ລາວ ໃນ​ກໍ­ລະ­ນີ​ເຫດ​ນ້ຳ​ຖ້ວມ​ທີ່​ເມືອງ​ສະ­ໜາມ​ໄຊ ແລະ ໃນ​ໂອ­ກາດ​ນີ້ ທ່ານ​ລັດ­ຖະ­ມົນ­ຕີ ສະ­ເຫຼີມ​ໄຊ ກົມ​ມະ​ສິດ ກໍ່​ໄດ້​ສະ­ແດງ​ຄວາມ​ຂອບ­ໃຈ​ຢ່າງ​ຈິງ​ໃຈ​ຕໍ່​ບັນ­ດາ​ປະ­ເທດ​ຄອບ­ຄົວ​ອາ​ຊຽນ ຄູ່​ເຈລະ­ຈາ​ອາ​ຊຽນ ປະ­ເທດ​ເພື່ອນ​ມິດ ແລະ ອົງ​ການ­ຈັດ­ຕັ້ງ​ພາກ​ພື້ນ ແລະ ສາ­ກົນ​ຕ່າງໆ​ທີ່​ໄດ້​ໃຫ້­ການ​ຊ່ວຍ­ເຫຼືອ​ປະ­ຊາ­ຊົນ ແລະ ລັດ­ຖະ­ບານ​ແຫ່ງ ສປປ ລາວ ກໍ່​ຄື ຜູ້​ຖືກ​ເຄາະ​ຮ້າຍ​ຈາກ​ພາ­ຍຸ​ເຊິນ​ຕິນ ແລະ ພາ­ຍຸ​ລະ­ດູ​ຮ້ອນ ທ່ານ​ລັດ­ຖະ­ມົນ­ຕີ​ຕ່າງ­ປະ­ເທດ​ລາວ ຍັງ​ໄດ້​ຂອບ­ໃຈ ແລະ ຕີ​ລາ­ຄາ​ສູງ​ຕໍ່​ການ​ເອົາ­ໃຈ­ໃສ່ ແລະ ການ​ຕອບ​ສະ­ໜອງ​ຢ່າງ​ວ່ອງ­ໄວ​ຂອງ​ເລ­ຂາ­ທິ­ການ​ໃຫຍ່​ອາ​ຊຽນ ໃນ​ຖາ­ນະ​ເປັນ​ຜູ້​ປະ­ສານ​ງານ​ຫຼັກ​ ໃນ​ການ​ຊ່ວບ​ບັນ­ເທົາ​ເຫດ​ສຸກ​ເສີນ​ຂອງ​ອາ​ຊຽນ ​ທີ່​ໄດ້​ເດີນ­ທາງ​ມາ​ສັງ­ເກດ​ການ​ໂດຍ​ກົງ​ໃນ​ຂົງ­ເຂດ​ຖືກ​ຜົນ​ກະ­ທົບ​ໃນ​ເມືອງ​ສະ­ໜາມ​ໄຊ ລວມ​ທັງ​ການ​ປະ­ຕິ­ບັດ​ໜ້າ­ທີ່​ຊ່ວຍ­ເຫຼືອຂອງ​ສູນ​ປະ­ສານ​ງານ​ອາ​ຊຽນ ​ເພື່ອ​ຊ່ວຍ­ເຫຼືອ​ດ້ານ​ມະ­ນຸດ­ສະ­ທຳ​ກ່ຽວ​ກັບ​ການ​ຄຸ້ມ​ຄອງ​ໄພ­ພິ­ບັດ ຫຼື AHA Centre.

ຂ່າວທີ່ກ່ຽວຂ້ອງ