ບາດລ້ຽວໃໝ່ຂອງການພົວພັນຣັດເຊຍ-ອາເມຣິກາ

429 03 ສ.ຫ. 2018 ນານາສາລະ

   ວັນ​ທີ 16 ກໍ­ລະ­ກົດ​ແລ້ວ­ນີ້ ທີ່​ນະ­ຄອນ ແຮນຊິງ​ຕີ ປະ­ເທດ​ແຟງ​ລັງ ໄດ້​ມີ​ກອງ​ປະ­ຊຸມ​ສຸດ​ຍອດ ຄັ້ງ​ທຳ​ອິດ​ລະ­ຫວ່າງ​ປະ­ທາ­ນາ­ທິ­ບໍ­ດີ ໂດ​ນານ​ທຣຳ ສະ­ຫະ­ລັດ​ອາ​ເມ​ຣິ​ກາ ແລະ ປະ­ທາ­ນາ­ທິ­ບໍ­ດີ ວາລາດີ​ເມຍ ປູ​ຕິນ ຣັດ​ເຊຍ ພາຍ­ຫຼັງ​ການ​ພົບ​ປະ 4 ຊົ່ວ­ໂມງ ລະ­ຫວ່າງ​ຜູ້­ນຳ​ທັງ​ສອງ​ກໍ່​ໄດ້​ມີ​ການ​ອອກ​ມາ​ຖະ­ແຫຼງ​ຂ່າວ​ຮ່ວມ​ກັນ.

   ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ:

   ປະ­ທາ­ນາ­ທິ­ບໍ­ດີ ປູ​ຕິນ ໃຫ້­ການ​ຕີ​ລາ­ຄາ​ວ່າ: ການ​ພົບ​ປະ​ຄັ້ງ​ນີ້ ມີ​ຂຶ້ນ​ທ່າມ­ກາງ​ບັນ­ຍາ­ກາດ​ທີ່ເປີດ​ອົກ​ເປີດ​ໃຈ ແລະ ສຸມ​ໃສ່​ວຽກ​ງານ ແລະ ຖື​ວ່າການ​ພົບ​ປະ​ນີ້​ປະ­ສົບ​ຜົນ­ສຳ­ເລັດ ແລະ ມີ​ປະ­ໂຫຍດການ​ພົວ­ພັນ​ທີ່​ເຄັ່ງ​ຕຶງ​ລະ­ຫວ່າງ ຣັດ​ເຊຍກັບອາເມ​ຣິ​ກາ ໃນ​ປັດ­ຈຸ­ບັນ​ແມ່ນ​ຍ້ອນ​ເຫດ­ຜົນ​ພາ­ວະ​ວິໄສ ທັງ​ສອງ​ປະ­ເທດ​ຕ່າງ​ກໍ່​ພວມ​ປະ​ເຊີນ​ກັບ​ຄວາມທ້າ​ທາຍ​ຕ່າງໆ​ທີ່​ຄື​ກັນ ເຊັ່ນ: ກົນ​ໄກ​ດ້ານ​ຄວາມສະ­ຫງົບ​ສາ­ກົນ ການ​ສັນ​ລະ​ສູດ​ຕົວ​ຕົນ​ຂອງ​ລັດ­ທິກໍ່​ການ​ຮ້າຍ... ທາງ​ດ້ານ​ປະ­ທາ­ນາ­ທິ­ບໍ­ດີ ທຣຳ ໄດ້ຕີ​ລາ­ຄາ​ການ​ພົບ​ປະ​ໂດຍ​ເອີ້ນ​ວ່າ: ຈຸດ​ເວ­ລາ​ແຫ່ງບາດ​ລ້ຽວ​ໃນ​ການ​ພົວ­ພັນລະ­ຫວ່າງ ອາ​ເມ​ຣິ​ກາກັບ​ຣັດ​ເຊຍ ການ​ສົນ­ທະ­ນາ​ຄັ້ງ​ນີ້​ແມ່ນ​ເປີດ​ອົກ​ເປີດໃຈ ແລະ ມີ​ໝາກ­ຜົນ ທັງ​ໃຫ້​ທັດ­ສະ­ນະ​ວ່າ ສອງປະ­ເທດ​ຕ້ອງ​ໄດ້​ຊອກ​ໂອ­ກາດ​ການ​ຮ່ວມ​ມື ຖ້າ​ຫາກວ່າ​ຢາກ​ມີ​ການ​ແກ້​ໄຂ​ສະ­ພາບ​ການ​ຢູ່​ໃນ​ໂລກ.

   ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ (VOV WORLD) ສະ­ບັບ​ອອນ​ລາຍ ລົງ​ວັນ​ທີ 18 ກໍ​ລະກົດ 2018 ໄດ້​ລົງ​ພິມ​ບົດ​ໃນ​ຫົວ­ຂໍ້: ຈຸດ​ເລີ່ມ​ຕົ້ນ​ໃໝ່ຈາກ​ການ​ພົບ​ປະ​ສຸດ​ຍອດ​ລະ­ຫວ່າງ​ຣັດ​ເຊຍ-ອາເມ​ຣິ​ກາ ມີ​ບາງ​ຈຸດ​ວ່າ: “... ຜ່ານ​ບັນ­ດາ​ບົດ​ກ່າວ​ຄຳ​ເຫັນ​ທີ່​ການ​ປະ­ຊຸມຂ່າວ​ ພາຍ­ຫຼັງ​ການ​ພົບ​ປະອາດ​ເຫັນ​ໄດ້​ວ່າ ການນຳ 2 ຝ່າຍ ບັນ­ລຸ​ໄດ້​ຄວາມ​ເຫັນ​ດີ​ເຫັນ​ພ້ອມ​ຢ່າງ​ບໍ່​ແມ່ນ​ໜ້ອຍ ສິ່ງ​ທີ່​ເປັນ​ໜ້າ​ສົນ­ໃຈ​ທີ່​ສຸດ​ແມ່ນ​ບັນດາ​ຄຳ​ກ່າວ​ຫາ​ຣັດ​ເຊຍ ແຊກ​ແຊງ​ເຂົ້າ​ການ​ເລືອກຕັ້ງ​ອາ​ເມ​ຣິ​ກາ ທ່ານ​ປະ­ທາ­ນາ­ທິ­ບໍ­ດີ Donald Trump ໄດ້​ກໍ່​ຄວາມ​ຕົກ­ສະ­ເງີ້​ຕໍ່​ອົງ­ການ​ນັກ​ການເມືອງ​ອາ​ເມ​ຣິ​ກາ ເມື່ອ​ຖື​ວ່າ: ບໍ່​ມີ​ກົນ­ອຸ­ບາຍ​ແຊກແຊງ​ຂອງ​ຣັດ​ເຊຍ ເຂົ້າ​ໃນ​ການ​ເລືອກ​ຕັ້ງ​ອາ​ເມ​ຣິກາ​ແຕ່​ຢ່າງ­ໃດ ຄື​ດັ່ງ​ການ​ສືບ­ສວນ​ກ່າວ​ຫາ ແລະ ທ່ານ​ເນັ້ນ​ໜັກ​ວ່າ ເລື່ອງ​ຮຽກ­ຮ້ອງ​ດຳ­ເນີນ​ການ​ສືບສວນ​ບັນ­ຫາ​ນີ້ ແມ່ນ​ວິ­ນາດ­ສະ­ກຳ ຊ້ຳ­ບໍ່­ໜຳ​ ຜູ້­ນຳໜ້າ​ທຳ​ນຽບ​ຂາວ​ຍັງ​ຖະ­ແຫຼງ​ວ່າ ບໍ່​ມີ​ຍາມ​ໃດ​ຖື ທ່ານ ປະ​ນາ​ທາ​ທິ​ບໍ­ດີ Putin ເປັນ​ປໍ​ລະ​ປັກ ເຊິ່ງນັ້ນ​ແມ່ນ​ຜູ້​ແກ່ງ​ແຍ້ງ​ທີ່​ດີ ພ້ອມ​ທັງ​ຢືນ­ຢັນ​ວ່າ​ຈະມີການ​ພົບ​ປະ​ມີ​ລັກ­ສະ­ນະ​ສ້າງ­ສັນ​ກັບ​ການ​ນຳ Putin ໃນ​ອະ­ນາ­ຄົດ​ຕື່ມ​ອີກ​ຫຼາຍ​ຄັ້ງ.

   ກ່ຽວ​ກັບ​ການ​ຮ່ວມ​ມື​ເສດ­ຖະ­ກິດ 2 ຝ່າຍ ໄດ້​ເຫັນດີ​ເປັນ​ເອ­ກະ­ສັນ​ສ້າງ­ຕັ້ງ​ກຸ່ມ​ລວມ​ກຸ່ມ​ໜຶ່ງ ເພື່ອເຕົ້າ­ໂຮມ​ບັນ­ດາ “ນັກ­ທຸ­ລະ­ກິດ​ໃໝ່” ຂອງ​ວົງ​ການນັກ­ທຸ­ລະ­ກິດ 2 ປະ­ເທດ ຢັ້ງ­ຢືນ​ຄວາມ​ສຳ­ຄັນ​ຂອງເລື່ອງ​ສືບ­ຕໍ່​ຮ່ວມ​ມື ​ໃນ​ການ​ໄຈ້​ແຍກ​ບັນ­ດາ​ສຳ​ເນົາເອ­ກະ­ສານ​ດ້ານ​ການ­ເມືອງ-ການ​ທະ­ຫານ​ທັງ​ໝົດ ພ້ອມ​ທັງ​ສະ­ເໜີ​ການ​ສ້າງ­ຕັ້ງ​ກຸ່ມ​ວຽກ​ງານ​ລວມ ກ່ຽວ​ກັບ​ການ​ຕ້ານ​ກໍ່​ການ​ຮ້າຍ ຝ່າຍ​ຣັດ​ເຊຍ ໄດ້ມອບ​ໃບ​ສະ­ເໜີ​ການ​ຮ່ວມ​ມື​ໃນ​ຂົງ­ເຂດ​ຍຸດ​ທະ​ສາດເປັນ​ປົກ­ກະ­ຕິ ແລະ ບໍ່​ແຜ່​ຂະ­ຫຍາຍ​ອາ­ວຸດ​ລ້າງຜານ​ໃຫ້​ຝ່າຍ​ອາ​ເມ​ຣິ​ກາ ທ່ານ​ປະ­ທາ­ນາ­ທິ­ບໍ­ດີ​ຣັດເຊຍ Vladimir Putin ກໍ່​ແຈ້ງ​ກັບ​ທ່ານ​ປະ​ທາ​ນາ​ທິບໍ​ດີ ອາ​ເມ​ຣິ​ກາ Donald Trump ວ່າ ຣັດ​ເຊຍ ພ້ອມແລ້ວ​ທີ່​ຈະ​ຕໍ່​ກຳ­ນົດ​ເວ­ລາ​ສົນ­ທິ­ສັນ­ຍາ​ຫຼຸດ­ຜ່ອນອາ­ວຸດ​ບຸກ​ໂຈມ​ຕີ​ຍຸດ​ທະ​ສາດ​ໃໝ່ (START ໃໝ່) ຂໍ້​ຕົກ­ລົງ​ຈຳ­ກັດ​ຈຳ­ນວນ​ບັນ­ດາ​ອາ­ວຸດ​ນິວ​ເຄຼຍ​ທີ່ໄດ້​ຜັນ​ຂະ­ຫຍາຍ ແລະ ສ້າງ­ຕັ້ງ​ກົນ​ໄກ​ກວດ­ກາ​ໃໝ່ ເຊິ່ງ​ຈະ​ໝົດ​ອາ­ຍຸ​ໃນ​ປີ 2021.

   ໃນ​ບັນ­ດາ​ບັນ­ຫາ​ສາ­ກົນ ທີ່​ກ່ຽວ­ຂ້ອງ​ເຖິງ​ສະພາບ​ການ​ຊີ​ຣີ ການ​ນຳ​ຣັດ​ເຊຍ ຕີ​ລາ­ຄາ​ວ່າ ມົດສະ​ກູ ແລະ ວໍ​ຊິງ​ຕັນ ອາດ​ຈະ​ຮັບ­ປະ­ກັນ​ບົດ­ບາດຕົ້ນ­ຕໍ​ໃນ​ການ​ແກ້​ໄຂ​ວິ​ກິດ​ການ​ມະ­ນຸດ­ສະ­ທຳ​ຢູ່ ຊີ​ຣີ ການ​ນຳ​ຣັດ​ເຊຍ ແລະ ອາ​ເມ​ຣິ​ກາ ກໍ່​ປຶກ­ສາ​ຫາ­ລືກ່ຽວ​ກັບ​ບັນ­ຫາ​ອີ​ຣານ ສະ­ພາບ​ການ​ປະ­ຕິ­ບັດ​ຂໍ້​ຕົກລົງ​ທຳ­ລາຍ​ລູກ​ສອນ​ໄຟ​ໄລ­ຍະ​ກາງ ແລະ ໄລ­ຍະສັ້ນ ທ່ານ​ປະ­ທາ­ນາ­ທິ­ບໍ­ດີ Putin ກໍ່​ຕີ​ລາ­ຄາ​ສູງ​ບັນດາ​ບາດ­ກ້າວ​ເດີນ​ຢ່າງ​ມີ​ປະ​ສິດ­ທິ​ຜົນ ແນ­ໃສ່​ແກ້​ໄຂສະ­ພາບ​ການ​ໃນ​ແຫຼມ​ເກົາ­ຫຼີ ດ້ວຍ​ການ​ເຂົ້າ​ຮ່ວມຂອງ​ທ່ານ​ປະ­ທາ­ນາ­ທິ­ບໍ­ດີ ອາ​ເມ​ຣິ​ກາ Trump ໃນຂະ­ນະ​ນັ້ນ ທ່ານ Trump ໄດ້​ສະ­ແດງ​ຄວາມ​ເຊື່ອໝັ້ນ​ວ່າທ່ານ Putin ແລະ ປະ­ເທດ​ຣັດ​ເຊຍ ພ້ອມແລ້ວ​ທີ່​ຈະ​ຮ່ວມ​ມື​ກັບ​ອາ​ເມ​ຣິ​ກາ ເພື່ອ​ແກ້​ໄຂ​ບັນຫາ​ນີວ​ເຄຼຍ​ຂອງ ສປປ ເກົາ­ຫຼີ ກໍ່​ຄືການ​ຮ່ວມ​ມື​ກັບອາ​ເມ​ຣິ​ກາ ແລະ ອິດ​ສະ­ໜາ​ແອນ ໃນ​ການ​ແກ້​ໄຂສະ­ພາບ​ການ​ຢູ່​ຊີ​ຣີ.

   ເພື່ອ​ຕີ​ລາ­ຄາ​ໂດຍ​ສັງ­ເຂບ​ກ່ຽວ​ກັບ​ໝາກ­ຜົນແຫ່ງ​ການ​ພົບ​ປະລະ­ຫວ່າງ ຣັດ​ເຊຍ-ອາ​ເມ​ຣິ​ກາ ທ່ານ​ປະ­ທາ­ນາ­ທິ­ບໍ­ດີ Donald Trump ໄດ້​ກ່າວ​ວ່າ: “ຈຸດ​ເລີ່ມ​ຕົ້ນ​ໃໝ່​ອັນ​ດີ­ງາມ​ໃຫ້​ບັນ­ດາ​ຝ່າຍ​ທັງ​ໝົດ” ການ​ພົວ­ພັນ 2 ປະ­ເທດ​ຈະ​ປ່ຽນ­ແປງ​ພາຍ­ຫຼັງ​ການພົບ​ປະ​ຢູ່ Helsinki...”.

   ກ່ອນ​ໜ້າ​ນີ້​ທັງ​ສອງ​ທ່ານ​ໄດ້​ພົບ​ກັນ​ມາ​ແລ້ວ 2 ເທື່ອ ຕາມ​ລຳ­ດັບຄື: ໃນ​ເດືອນ​ກໍ­ລະ­ກົດ ປີ 2017 ທີ່​ນະ­ຄອນ​ຮຳ​ບວກ ປະ­ເທດ​ເຢຍ​ລະ​ມັນ ໃນ​ຂອບກອງ​ປະ­ຊຸມ G20 ແລະ ໃນ​ເດືອນ​ພະ­ຈິກ ປີ 2017 ເຊັ່ນ​ກັນ ຢູ່​ກອງ​ປະ­ຊຸມ APEC ທີ່​ນະ­ຄອນດາ​ໜັງ ປະ­ເທດ​ຫວຽດ­ນາມ ແຕ່​ການ​ພົບ​ສຸດ​ຍອດຢູ່​ນະ­ຄອນ​ແຮນ​ຊິງ​ກີ ໃນ​ເທື່ອ​ນີ້​ນັບ​ວ່າ​ເປັນ​ການພົບ​ປະ​ສຸດ​ຍອດ​ຄັ້ງ​ທຳ​ອິດ​ລະ­ຫວ່າງ​ຜູ້­ນຳ​ທັງ​ສອງທ່ານ.

ຂ່າວທີ່ກ່ຽວຂ້ອງ