ຂ່າວຫຼ້າສຸດ

ຢູ-16 ລາວຊະນະສິງກະໂປ 2-1 ຊີງຂັນອາຊຽນ

208 03 ສ.ຫ. 2018 ວົງຈອນກີລາ
ຢູ-16 ລາວຊະນະສິງກະໂປ 2-1 ຊີງຂັນອາຊຽນ

   ນັກກີລາ​ເຍົາວະ​ຊົນ​ທີມ​ຊາດ​ລາວ ຮຸ່ນ​ອາຍຸ​ບໍ່​ເກີນ 16 ປີ (ຢູ-16) ລົງ​ສະໜາມ​ເປັນ​ນັດ​ທີ 2 (ນັດ​ທຳ​ອິດ​ຊະນະ ຢູ-16 ທີມ​ຊາດ​ບຣູ​ໄນ 3-2) ໃນ​ວັນ​ທີ 1 ສິງຫາ 2018 ສາມາດ​ບຽດ​ເອົາ​ຊະນະ​ຢູ-16 ທີມ​ຊາດ​ສິງກະໂປ 2-1 ໃນ​ການ​ແຂ່ງຂັນ​ເຕະບານ​ຊາຍ ຊີງ​ຂັນ​ອາ​ຊຽນ​ຮຸ່ນ​ອາຍຸ​ບໍ່​ເກີນ 16 ປີ ຫຼື “AFF U-16 CHAM PIONSHIP 2018” ທີ່ປະເທດ​ອິນ​ໂດ​ເນ​ເຊຍ.

   ສຳລັບ​ການ​ແຂ່ງຂັນ​ນັດ​ນີ້ ຢູ-16 ລາວ ໄດ້ 2 ປະຕູ​ຈາກ ໂຈ​ນີ ແຫວນ​ປະເສີດ ນາທີ 16 ແລະ 54 ສ່ວນ​ສິງກະໂປ​ມາ​ໄດ້​ປະຕູ​ຕີ ໄຂ່​ແຕກ​ໃນ​ໄລຍະ​ທ້າຍ​ເກມ​ຈາກ Chua Zikos Vasileios Ming Xun ນາທີ 77 ໄຊຊະນະ​ໃນ​ນັດ​ນີ້​ເຮັດ​ໃຫ້​ທີມ​ຊາດ​ລາວ ມີ 6 ຄະແນນ ຈາກ​ລົງ​ແຂ່ງຂັນ 2 ນັດ ຊະນະ 2 ນັດ ເທົ່າ​ກັບ​ທີມ​ຊາດ​ໄທ 6 ຄະແນນ ແຕ່​ປະຕູ​ໄດ້​ເສຍ​ທີມ​ຊາດ​ໄທ​ດີ​ກວ່າ ສ່ວນ​ຜົນ​ອີກ​ຄູ່ 1 ໃນ​ກຸ່ມ​ດຽວ​ກັນ​ນັ້ນ​ໄທ​ຊະນະ​ບຣູ​ໄນ 7-0.

   ແນວໃດ​ກໍ່​ຕາມ​ທີມ​ຊາດ​ລາວ​ຍັງ​ເຫຼືອ​ການ​ແຂ່ງຂັນ 2 ນັດ ຄື: ວັນ​ທີ 5 ສິງຫາ 2018 ເວລາ 18:30 ໂມງ ລາວ ພົບ ໄທ ແຂ່ງຂັນ​ຢູ່​ທີ່​ສະໜາມ JOKO SAMUDRO STADIUM ແລະ ວັນ​ທີ 7 ສິງຫາ 2018 ເວລາ 15:00 ໂມງ ລາວ ພົບ ມາ​ເລເຊຍ ແຂ່ງຂັນ​ຢູ່​ທີ່​ສະໜາມ JOKO SAMUDRO STADIUM.

ຂ່າວທີ່ກ່ຽວຂ້ອງ