ຂ່າວຫຼ້າສຸດ

ນາຍົກລັດຖະມົນຕີໃຫ້ທິດຊີ້ນຳ 4 ວຽກໃຫຍ່ ຮີບດ່ວນເພື່ອແກ້ໄຂໄພນ້ຳຖ້ວມ ຢູ່ອັດຕະປື

300 02 ສ.ຫ. 2018 ຂ່າວໜ້າ​ໜຶ່ງ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ພົບ​ປະ​ໂອ້​ລົມ ແລະ ໃຫ້​ທິດ​ຊີ້​ນຳ​ຮີບ​ດ່ວນ​ຕໍ່​ປະ­ທານ ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ການ​ນຳ​ແຂວງ​ອັດ​ຕະ​ປື ມີ 4 ສິ່ງ​ທ້າ​ທາຍ ຕ້ອງ​ເອົາ­ໃຈ­ໃສ່​ຢ່າງ​ເຄັ່ງ­ຮ້ອນ.

    ທ່ານ​ນາ­ຍົກ­ລັດ­ຖະ­ມົນ­ຕີ ທອງ​ລຸນ ສີ​ສຸ​ລິດ ໄດ້​ໂອ້​ລົມ​ຕໍ່​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ແລະ ຄະ­ນະ​ນຳ​ແຂວງ ພ້ອມ​ດ້ວຍ​ເຈົ້າ​ໜ້າ­ທີ່​ກ່ຽວ­ຂ້ອງ ໂດຍ​ໄດ້​ຮຽກ­ຮ້ອງ​ໃຫ້​ຄະ­ນະ​ກຳ​ມະ ການ​ດັ່ງ­ກ່າວ​ສຸມ 4 ວຽກ​ງານ​ທີ່​ເຄັ່ງ­ຮ້ອນ ຄື: ຕ້ອງ​ກອບ​ກູ້ ແລະ ຊອກ​ຄົ້ນ​ເອົາ​ຜູ້​ເສຍ​ຊີ­ວິດ ລວມ​ທັງ​ຜູ້ ສາບ​ສູນ​ໃຫ້​ໄດ້​ທັງ​ໝົດ​ດ້ວຍ​ວິ­ທີ​ການ​ຕ່າງໆ ເພື່ອ​ຮັບ­ປະ­ກັນ​ໃຫ້​ເຂົາ­ເຈົ້າ​ກັບ​ຄືນ​ສູ່​ອ້ອມ​ກອດ ຫຼື ເຖິງ​ເຮືອນ ຂອງ​ຍາດ​ພີ່­ນ້ອງ ພໍ່​ແມ່ ແລະ ຄົນ​ຮັກ​ຢ່າງ​ແທ້​ຈິງ ຕ້ອງ​ຈັດ​ສັນ​ທີ່­ຢູ່​ອາ­ໄສ​ແບບ​ຊົ່ວ­ຄາວ  ແລະ ຖາ­ວອນ ຢ່າງ​ສຸດ​ກົກ​ສຸດ​ປາຍ ຢ່າງ​ເປັນ​ລະ­ບົບ​ຄົບ​ຊຸດ ໃນ​ນັ້ນ ເລື່ອງ​ສຸ​ຂະ​ອະ­ນາ­ໄມ​ປະ­ເພດ​ຫ້ອງ​ນ້ຳ ແລະ ບ່ອນ­ຢູ່​ອາ­ໄສ​ໃຫ້​ພຽງ­ພໍ ຕ້ອງ​ຈັດ​ສັນ​ແບ່ງ­ປັນ​ແຈກ​ຢາຍ ແລະ ຄຸ້ມ​ຄອງ​ເຄື່ອງ​ຊ່ວຍ­ເຫຼືອ ລວມ​ທັງ​ເງິນ ແລະ ອື່ນໆ​ໃຫ້​ວ່ອງ­ໄວ ຈະ­ແຈ້ງ ທົ່ວ​ເຖິງ ແລະ ໂປ່ງ​ໃສ​ຢ່າງ​ໜັກ​ແໜ້ນ ໃນ​ນັ້ນ ມີ​ການ​ຂຶ້ນ​ບັນ­ຊີ​ຈົດ​ແຕ້ມ​ສຳ ລັບ​ເຄື່ອງ​ຊ່ວຍ­ເຫຼືອ ເພື່ອ​ນຳ​ໃຊ້​ໄລ­ຍະ​ສັ້ນ-ຍາວ ສ່ວນ​ເງິນ​ໄດ້​ຈາກ​ການ​ຊ່ວຍ­ເຫຼືອ​ຕ້ອງ​ໃຊ້​ຢ່າງ​ລະ​ມັດ​ລະ ວັງ ພ້ອມ​ມີ​ການ​ປຶກ­ສາ​ຫາ­ລື ແລະ ຕົກ­ລົງ​ກັນ​ເປັນ​ໝູ່​ຄະ­ນະ ກ່ອນ​ຕັດ­ສິນ​ໃຊ້​ຈ່າຍ ແລະ ເອົາ­ໃຈ­ໃສ່​ຄຸ້ມ ຄອງ​ໃຫ້​ບໍ­ລິ­ການ​ອາ­ສາ​ສະ­ໝັກ​ບັນ­ດາ​ໜ່ວຍ​ງານ​ກູ້​ໄພ ລວມ​ທັງ​ສື່​ມວນ​ຊົນ ທັງ​ພາຍ​ໃນ ແລະ ຕ່າງ­ປະ­ເທດ ຢ່າງ​ຈະ­ແຈ້ງ ໃນ​ນັ້ນ ຖ້າ​ບໍ່​ພໍ​ດ້ານ​ກຳ­ລັງ​ຕ້ອງ​ຮີບ​ຮ້ອນ​ແກ້​ໄຂ ພິ­ເສດ ຕ້ອງ​ເລັ່ງ​ພິ­ສູດ​ສົບ​ຜູ້​ເສຍ​ຊີ­ວິດ​ໃຫ້​ວ່ອງ­ໄວ ຕ້ອງ​ປະ­ສານ​ງານ ແລະ ແຈ້ງ​ເພື່ອນ​ບ້ານ​ໃກ້​ຄຽງ ໂດຍ​ສະ­ເພາະ ກຳ­ປູ­ເຈຍ ໃຫ້​ຊ່ວຍ​ເອື້ອ​ອຳ­ນວຍ​ຄວາມ​ສະ­ດວກ ເພື່ອ​ເຮັດ​ໃຫ້­ການ​ກອບ​ກູ້​ດຳ­ເນີນ​ໄປ​ຢ່າງ​ບໍ່​ຂ້ອງ​ບໍ່​ຄາ ແລະ ເອົາ­ໃຈ­ໃສ່​ໃຫ້​ເບິ່ງ­ແຍງ​ພໍ່​ແມ່​ລູກ​ຫຼານ​ຜູ້​ໄດ້​ຮັບ​ຜົນ​ກະ­ທົບ​ຢ່າງ​ໃກ້­ຊິດ ໂດຍ​ສະ­ເພາະ ເລື່ອງ​ສຸ­ຂະ­ພາບ​ຈິດ ພາຍ­ຫຼັງ​ນ້ຳ​ຖ້ວມ.

    ທ່ານ​ນາ­ຍົກ­ລັດ­ຖະ­ມົນ­ຕີ​ຍັງ​ໄດ້​ກ່າວ​ຍ້ອງ­ຍໍ​ຊົມ­ເຊີຍ ແລະ ຂອບ­ໃຈ​ຢ່າງ​ຈິງ​ໃຈ​ຕໍ່​ບັນ­ດາ​ຄະ­ນະ​ນຳ ນາຍ ແລະ ພົນ­ທະ­ຫານ ອາ­ສາ​ສະ­ໝັກ​ກູ້​ໄພ ພາຍ​ໃນ-ຕ່າງ­ປະ­ເທດ ຜູ້​ຊ່ວຍ­ເຫຼືອ​ດ້ານ​ວັດ­ຖຸ​ປັດ​ໄຈ ທັງ​ພາຍ​ໃນ-ຕ່າງ­ປະ­ເທດ ສື່​ມວນ​ຊົນ ແລະ ພໍ່​ແມ່​ປະ­ຊາ­ຊົນ​ໄດ້​ທຸ້ມ­ເທ​ເຫື່ອ­ແຮງ ກຳ­ລັງ­ວັງ­ຊາ ແລະ ສະ­ຕິ​ປັນ­ຍາ​ຢ່າງ​ບໍ່​ຮູ້​ອິດ​ຮູ້​ເມື່ອຍ ປະ­ກອບ­ສ່ວນ​ເຂົ້າ​ພາ­ລະ­ກິດ​ດັ່ງ­ກ່າວ​ມີ​ຄວາມ​ຄືບ​ໜ້າ ແລະ ມີ​ຜົນ­ສຳ­ເລັດ​ຫຼາຍ​ດ້ານ.

    ການ​ປຶກ­ສາ​ຫາ­ລື ແລະ ພົບ​ປະ ລະ­ຫວ່າງ ທ່ານ​ນາ­ຍົກ­ລັດ­ຖະ­ມົນ­ຕີ ແລະ ຄະ­ນະ​ກຳ­ມະ­ການ​ສະ ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ການ​ນຳ​ແຂວງ​ອັດ​ຕະ​ປື ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ແກ້​ໄຂ​ໄພ­ພິ­ບັດ​ນ້ຳ​ຖ້ວມ​ໄດ້​ຈັດ​ຂຶ້ນ​ໃນ​ວັນ​ທີ 1 ສິງ­ຫາ 2018 ທີ່​ຫ້ອງ​ວ່າ­ການ​ປົກ­ຄອງ ແຂວງ​ອັດ​ຕະ​ປື.

ຂ່າວທີ່ກ່ຽວຂ້ອງ