ຂ່າວຫຼ້າສຸດ

ສອງແຂວງຂອງປະເທດໄທ ນຳເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ

260 02 ສ.ຫ. 2018 ຂ່າວໜ້າ​ໜຶ່ງ
ສອງແຂວງຂອງປະເທດໄທ ນຳເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ

    ວັນ​ທີ 1 ສິງ­ຫາ 2018 ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ແຂວງ​ໜອງ​ຄາຍ ແລະ ແຂວງ​ອຸ­ດອນ​ທາ­ນີ ຣາ​ຊະ​ອາ­ນາ­ຈັກ​ໄທ ໄດ້​ນຳ​ເອົາ​ວັດ­ຖຸ ແລະ ປັດ​ໄຈ​ປະ­ກອບ­ສ່ວນ​ຊ່ວຍ­ເຫຼືອ​ຜູ້​ປະ­ສົບ​ອຸ​ທົກ​ກະ​ໄພ​ນ້ຳ​ຖ້ວມ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ແລະ ບັນ­ດາ​ແຂວງ​ຕ່າງໆ​ທີ່​ຖືກ​ກະ­ທົບ​ນ້ຳ​ຖ້ວມ ໂດຍ​ຕາງ­ໜ້າ​ມອບ​ຂອງ​ທ່ານ ລົນ​ນະ​ໄຊ ຈິດ​ວິ­ເສດ ເຈົ້າ­ແຂວງ​ໜອງ​ຄາຍ ແລະ ທ່ານ ນະ​ຣົງ ຈີນ​ອ່ຳ ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ແຂວງ​ອຸ­ດອນ​ທາ­ນີ ຕາງ­ໜ້າ​ຮັບ​ຂອງ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເຄື່ອງ​ທີ່​ນຳ​ມາ​ມອບ​ຄັ້ງ​ນີ້ ປະ­ກອບ​ມີ​ເຄື່ອງ​ອຸ­ປະ­ໂພກ-ບໍ­ລິ­ໂພກ ບັນ­ຈຸ​ໃສ່​ລົດ​ບັນ­ທຸກ​ຈຳ­ນວນ 12 ຄັນ ພ້ອມ​ນັ້ນ ຍັງ​ມີ​ເງິນ­ສົດ 1 ລ້ານ​ບາດ (ປະ­ມານ 260 ລ້ານ​ກີບ) ໃນ​ນີ້​ແຂວງ​ໜອງ​ຄາຍ 5 ແສນ​ບາດ ແລະ ແຂວງ​ອຸ­ດອນ​ທາ­ນີ 5 ແສນ​ບາດ ເຊິ່ງ​ເຄື່ອງ​ດັ່ງ­ກ່າວ​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ຈະ​ໄດ້​ນຳ­ໄປ​ແຈກ​ຢາຍ​ຊ່ວຍ­ເຫຼືອ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ໄພ­ພິ­ບັດ​ນ້ຳ​ຖ້ວມ ໂດຍ​ສະ­ເພາະ ແມ່ນ​ເມືອງ​ສະ ໜາມ​ໄຊ ແຂວງ​ອັດ​ຕະ​ປື.

      ໂອ­ກາດ​ນີ້​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ນ້ຳ­ໃຈ​ຂອງ​ພີ່­ນ້ອງ​ປະ­ຊາ­ຊົນ​ໄທ ໂດຍ​ສະ­ເພາະ ແຂວງ​ອຸ­ດອນ​ທາ­ນີ ແລະ ແຂວງ​ໜອງ​ຄາຍ ທີ່​ໄດ້​ມີ​ຄວາມ​ເປັນ​ຫ່ວງ​ເປັນ​ໃຍ​ຕໍ່​ອຸ​ທົກ​ກະ​ໄພ​ນ້ຳ​ຖ້ວມ​ທີ່ ສປປ ລາວ ເຊິ່ງ​ສະ­ແດງ​ເຖິງ​ຄວາມ​ສາ­ມັກ­ຄີ ຮັກ­ແພງ​ໃຫ້­ການ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ຂອງ​ປະ­ເທດ​ເພື່ອນ​ບ້ານ ນອກ​ນັ້ນ ທ່ານ​ຍັງ​ໄດ້​ລາຍ​ງານ​ກ່ຽວ​ກັບ​ສະ­ພາບ​ໂດຍ​ຫຍໍ້​ຂອງ​ການ​ເກີດ​ໄພ­ພິ­ບັດ​ຄັ້ງ​ນີ້​ຕື່ມ​ອີກ.

ຂ່າວທີ່ກ່ຽວຂ້ອງ