ຂ່າວຫຼ້າສຸດ

ອາຊຽນ ສົ່ງເສີມ ແລະ ປົກປ້ອງສິດທິມະນຸດ

258 02 ສ.ຫ. 2018 ຂ່າວໜ້າ​ໜຶ່ງ

    ວັນ​ທີ 1 ສິງ­ຫາ 2018 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ນຳ­ພາ​ຄະ­ນະ​ຜູ້​ແທນ​ລາວ ເຂົ້າ​ຮ່ວມ​ກອງ​ປະ­ຊຸມ​ພົບ​ປະ​ລະ­ຫວ່າງ​ລັດ­ຖະ­ມົນ­ຕີ​ຕ່າງ­ປະ­ເທດ​ອາ​ຊຽນ ແລະ ຄະ­ນະ​ກຳ­ມາ​ທິ​ການ ລະ­ຫວ່າງ ລັດ­ຖະ­ບານ​ອາ​ຊຽນ ວ່າ​ດ້ວຍ​ສິດ­ທິ​ມະ­ນຸດ (ໄອ​ຈາ) ແລະ ກອງ​ປະ­ຊຸມ​ຄະ­ນະ​ກຳ­ມາ​ທິ​ການ​ເຂດ​ປອດ​ອາ­ວຸດ​ນິວ​ເຄລຍ​ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້.

    ໃນ​ກອງ​ປະ­ຊຸມ​ພົບ​ປະ​ລະ­ຫວ່າງ​ລັດ­ຖະ­ມົນ­ຕີ​ຕ່າງ­ປະ­ເທດ​ອາ​ຊຽນ ແລະ ໄອ​ຈາ ລັດ­ຖະ­ມົນ­ຕີ​ຕ່າງ­ປະ­ເທດ​ອາ​ຊຽນ ໄດ້​ຮັບ​ຊາບ​ບົດ​ລາຍ​ງານ​ປະ­ຈຳ​ປີ 2018 ຂອງ​ໄອ​ຈາ ແລະ ຮັບ​ຊາບ​ແຜນ​ກິດ­ຈະ­ກຳ​ບຸ­ລິ­ມະ­ສິດ ແລະ ງົບ­ປະ­ມານ​ສຳ­ລັບ​ປີ 2019 ເພື່ອ​ຈັດ​ຕັ້ງ​ປະ­ຕິ­ບັດ​ບັນ­ດາ​ກິດ­ຈະ­ກຳ​ບຸ­ລິ­ມະ­ສິດ ເພື່ອ​ສົ່ງ­ເສີມ ແລະ ປົກ​ປ້ອງ​ສິດ­ທິ​ມະ­ນຸດ ໃນ​ນີ້ ສປປ ລາວ ມີ​ແຜນ​ຈະ​ຈັດ 1 ກິດ­ຈະ­ກຳ​ຄື: ກອງ​ປະ­ຊຸມ​ສຳ​ມະ​ນາ​ຂອງ​ໄອ​ຈາ ກ່ຽວ​ກັບ​ສິດ­ທິ​ມະ­ນຸດ ແລະ ການ​ລຶ­ບລ້າງ​ຄວາມ­ທຸກ​ຍາກ ອີງ­ໃສ່​ຖະ­ແຫຼງ­ການ​ອາ​ຊຽນ​ວ່າ​ດ້ວຍ​ສິດ­ທິ​ມະ­ນຸດ ແລະ ເປົ້າ​ຫມາຍ​ການ​ພັດ­ທະ­ນາ​ແບບ​ຍືນ​ຍົງ.

   ສຳ­ລັບ​ກອງ​ປະ­ຊຸມ​ຄະ­ນະ​ກຳ­ມາ​ທິ​ການ ​ເຂດ​ປອດ​ອາ­ວຸດ​ນິວ​ເຄລຍ ​ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້ ກອງ​ປະ­ຊຸມ​ໄດ້​ຮັບ​ຊາບ​ຄວາມ​ຄືບ​ໜ້າ ​ການ­ຈັດ­ຕັ້ງ​ປະ­ຕິ­ບັດ​ແຜນ​ປະ­ຕິ­ບັດ​ງານ ເພື່ອ​ສົ່ງ­ເສີມ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ວ່າ​ດ້ວຍ​ການ​ຮັກ­ສາ​ອາ​ຊຽນ ໃຫ້​ເປັນ​ເຂດ​ປອດ​ອາ­ວຸດ​ນິວ​ເຄລຍ ປີ 2018-2022 ນອກ​ນັ້ນ ຍັງ​ໄດ້​ປຶກ­ສາ​ຫາ­ລື​ກ່ຽວ​ກັບ​ຄວາມ​ຄືບ​ໜ້າ­ການ​ລົງ​ນາມ ແລະ ການ​ໃຫ້​ສັດ­ຕະ­ຍາ­ບັນ​ແກ່​ອະ­ນຸ​ສັນ­ຍາ​ຂອງ​ສົນ­ທິ­ສັນ­ຍາ ວ່າ​ດ້ວຍ​ເຂດ​ປອດ​ອາ­ວຸດ​ນິວ​ເຄລຍ​ອາ­ຊີ​ຕາ­ເວັນ​ອອກ­ສຽງ​ໃຕ້ (SEANWFZ) ໂດຍ​ບັນ­ດາ​ປະ­ເທດ​ມະ­ຫາ​ອຳ­ນາດ​ທີ່​ມີ​ນິວ​ເຄລຍ​ຄອບ​ຄອງ ເຊັ່ນ: ຝຣັ່ງ ອັງ­ກິດ ຣັດ​ເຊຍ ຈີນ ແລະ ອາ​ເມ​ຣິ​ກາ ແນ­ໃສ່​ຮັກ­ສາ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້​ໃຫ້​ເປັນ​ເຂດ​ປອດ​ອາ­ວຸດ​ນິວ​ເຄລຍ ແລະ ອາ­ວຸດ​ທຳ­ລາຍ​ລ້າງ​ອື່ນໆ.

ຂ່າວທີ່ກ່ຽວຂ້ອງ