ຂ່າວຫຼ້າສຸດ

ນະຄອນຫຼວງວຽງຈັນ ລ້ຽງງົວເປັນສິນຄ້າມີທ່າຂະຫຍາຍຕົວ

558 02 ສ.ຫ. 2018 ຂ່າວໜ້າ​ໜຶ່ງ
ນະຄອນຫຼວງວຽງຈັນ ລ້ຽງງົວເປັນສິນຄ້າມີທ່າຂະຫຍາຍຕົວ

    ການ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ 6 ຂອງ​ອົງ­ຄະ​ນະ​ພັກ ກໍ່​ຄື ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ນວ ໄລ­ຍະ 2016-2020 ເຂົ້າ​ສູ່​ແຜນ​ວຽກ​ຕົວ​ຈິງ​ຂອງ​ແຜນ​ງານ​ຜະ­ລິດ​ສະ­ບຽງ​ອາ­ຫານ ແລະ ຜະ­ລິດ​ເປັນ​ສິນ­ຄ້າ​ໃຫ້​ບັນ­ລຸ​ຄາດ­ໝາຍ​ທີ່​ວາງ​ໄວ້ ໃນ​ວັນ​ທີ 1 ສິງ­ຫາ 2018 ທີ່​ປົກ­ຄອງ​ເມືອງ ປາກ​ງື່ມ ນະ­ຄອນ­ຫຼວງ​ວຽງ​ຈັນ ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ໄດ້​ຈັດ​ກອງ​ປະ­ຊຸມ​ສຳ​ມະ​ນາ​ກ່ຽວ​ກັບ​ການ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ກາງ​ສະ­ໄໝ​ຂອງ​ອົງ­ຄະ​ນະ​ພັກ​ນະ­ຄອນ­ຫຼວງ​ວຽງ​ຈັນ ຫົວ­ຂໍ້ ການ​ສົ່ງ­ເສີມ​ລ້ຽງ​ງົວ​ຊີ້ນ​ເປັນ​ສິນ­ຄ້າ​ຂອງ​ນະ­ຄອນ­ຫຼວງ​ວຽງ​ຈັນ ມີ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ພວງ​ປາ​ຣີ​ສັກ ປຣະ​ວົງ​ວຽງ​ຄຳ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ​ລ້ຽງ​ງົວ​ຢູ່​ໃນ​ນະ­ຄອນ­ຫຼວງ​ວຽງ​ຈັນ ໄດ້​ຮັບ​ການ​ພັດ­ທະ­ນາ​ຂຶ້ນ​ຕາມ​ລຳ­ດັບ ໂດຍ​ມີ​ການ​ຫັນ­ປ່ຽນ​ລະ­ບົບ ແລະ ວິ­ທີ​ການ​ລ້ຽງ​ແບບ​ຄອບ­ຄົວ​ປ່ອຍ​ທຳ​ມະ​ຊາດ​ຫັນ​ໄປ​ສູ່​ການ​ລ້ຽງ​ແບບ​ເປັນ​ຟາມ​ຫຼາຍ​ຂຶ້ນ ເຊິ່ງ​ໄດ້​ແຍກ​ອອກ​ເປັນ 2 ແບບ​ການ​ລ້ຽງ​ຄື: ການ​ລ້ຽງ​ແບບ​ເຄິ່ງ​ຂັງ ເຄິ່ງ​ປ່ອຍ ແລະ ການ​ລ້ຽງ​ເປັນ​ຟາມ​ມີ​ການ​ໃຫ້​ນ້ຳ ແລະ ອາ­ຫານ ຕະ­ຫຼອດ​ມີ​ການ​ນຳ​ໃຊ້​ເຕັກ­ນິກ​ເຂົ້າ​ຊ່ວຍ​ການ​ຮັກ­ສາ​ສຸ­ຂະ­ພາບ​ເປັນ​ຢ່າງ​ດີ ປັດ­ຈຸ­ບັນ​ມີ​ງົວ​ທັງ​ໝົດ 81.406 ໂຕ ສາ­ມາດ​ຕອບ​ສະ­ໜອງ​ການ​ບໍ­ລິ­ໂພກ​ຊີ້ນ​ງົວ 640,49 ໂຕນ​ຕໍ່​ປີ ເທົ່າ​ກັບ 53,37% ຂອງ​ຄາດ­ໝາຍ​ຮອດ​ປີ 2020 ຂອງ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ 6 ຂອງ​ອົງ­ຄະ​ນະ​ພັກ ນວ ທີ່​ຕັ້ງ​ໄວ້ 1.200 ໂຕນ​ຕໍ່​ປີ ສະ­ເພາະ​ການ​ລ້ຽງ​ງົວ​ເປັນ​ສິນ­ຄ້າ​ໄດ້​ຊຸກ­ຍູ້​ການ​ລ້ຽງ​ງົວ​ຊີ້ນ​ແບບ​ເປັນ​ຟາມ​ໃຫ້​ມີ​ການ​ລ້ຽງ​ເປັນ​ສິນ­ຄ້າ​ໂດຍ​ນຳ​ໃຊ້​ກົນ​ໄກ 4 ປະ­ສານ 4 ຮ່ວມ ໃນ​ລະ­ດັບ​ແຕກ​ຕ່າງ​ກັນ ແລະ ນຳ​ໃຊ້​ທ່າ­ແຮງ​ຊັບ­ພະ­ຍາ­ກອນ​ພື້ນ​ທີ່​ການ​ລ້ຽງ ເຊິ່ງ ນວ ກຳ­ນົດ​ເຂດ​ປູກ​ຫຍ້າ​ລ້ຽງ​ງົວ​ກັບ​ຜູ້​ປະ­ກອບ​ການ​ລ້ຽງ ມີ 3 ເຂດ ແລະ ກຳ­ນົດ​ເຂດ​ປູກ​ຫຍ້າ 2 ເຂດ ເຊິ່ງ​ມີ​ທົ່ງ​ຫຍ້າ​ລ້ຽງ​ງົວ​ແບບ​ທຳ​ມະ​ຊາດ ແລະ ທົ່ງ​ຫຍ້າ​ປູກ​ທັງ​ໝົດ 49 ພັນ​ກວ່າ​ເຮັກ­ຕາ ເພື່ອ​ຕອບ​ສະ­ໜອງ​ອາ­ຫານ​ສັດ​ໃຫ້​ພຽງ­ພໍ ປັດ­ຈຸ­ບັນ​ທົ່ວ ນວ ມີ​ຟາມ​ລ້ຽງ​ງົວ 32 ຟາມ ເທົ່າ​ກັບ 64 % ຂອງ​ຄາດ­ໝາຍ​ຕັ້ງ​ໄວ້ 50 ຟາມ​ຮອດ​ປີ 2020 ແລະ ມີ​ງົວ​ທັງ​ໝົດ 3.398 ໂຕ ເທົ່າ​ກັບ 28% ໃນ​ນັ້ນ ມີ​ຟາມ​ສະ­ມາ­ຄົມ​ຜູ້​ປະ­ກອບ​ການ​ລ້ຽງ ມີ​ສະ­ມາ­ຊິກ 17 ຟາມ ມີ​ງົວ 1.756 ໂຕ ມີ​ຟາມ​ລ້ຽງ​ງົວ​ເອ­ກະ­ລາດ 15 ຟາມ ມີ​ງົວ 2.688 ໂຕ.

    ພ້ອມ​ນີ້ ທາງ​ຄະ­ນະ​ນຳ​ກອງ​ປະ­ຊຸມ ແລະ ຜູ້​ເຂົ້າ​ຮ່ວມ​ໄດ້​ລົງ​ໄປ​ຢ້ຽມ­ຢາມ​ຟາມ​ງົວ​ໄຊ​ພອນ xp ບ້ານ​ນາ​ປາກ​ກວາງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ