ຂ່າວຫຼ້າສຸດ

ອັດຊ່ອງຫວ່າງການຮົ່ວໄຫຼລາຍຮັບທຸກກໍລະນີ

245 02 ສ.ຫ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ວິ­ຊາ​ການ​ຂອງ​ຂະ­ແໜງ​ພາ­ສີ ແລະ ກອງ​ປະ­ຊຸມ​ສະ­ຫຼຸບ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ຈັດ​ຂຶ້ນ​ວັນ​ທີ 24-26 ກໍ­ລະ­ກົດ 2018 ທີ່​ຫ້ອງ​ປະ­ຊຸມ​ໃຫ່​ຍ​ກົມ​ພາ­ສີ ແລະ ວັນ​ທີ 27 ກໍ­ລະ­ກົດ 2018 ທີ່​ສູນ​ເຝິກ­ອົບ­ຮົມ​ທ່າ​ເດື່ອ ເມືອງ​ຫາດ​ຊາຍ​ຟອງ ເປັນ​ປະ­ທານ​ຂອງ​ທ່ານ ບຸນ​ປະ­ເສີດ ສີ​ກຸນ­ລະ­ບຸດ ຮັກ­ສາ​ການ​ຫົວ­ໜ້າ​ກົມ​ພາ­ສີ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ບັນ­ດາ​ຫົວ­ໜ້າ​ກອງ​ຄຸ້ມ​ຄອງ​ພາ­ສີ I-VII ຫົວ­ໜ້າ​ກອງ​ກວດ­ກາ​ພາ­ສີ​ປະ­ຈຳ​ແຂວງ ຫົວ­ໜ້າ​ດ່ານ​ພາ­ສີ​ສາ­ກົນ ດ່ານ​ພາ­ສີ​ປະ­ເພ­ນີ ແລະ ດ່ານ​ພາ­ສີ​ທ້ອງ­ຖິ່ນ​ທົ່ວ​ປະ­ເທດ​ເຂົ້າ​ຮ່ວມ.

     ທ່ານ ບຸນ​ປະ­ເສີດ ສີ​ກຸນ­ລະ­ບຸດ ໄດ້​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ເກັບ​ລາຍ​ຮັບ 6 ເດືອນ​ຕົ້ນ​ປີ​ສາ­ມາດ​ປະ­ຕິ­ບັດ​ໄດ້ 3.341 ຕື້​ກີບ ເທົ່າ​ກັບ 46,41%  ຂອງ​ແຜນ­ການ​ສູ້​ຊົນ 7.200 ຕື້​ກີບ ເພື່ອ​ບັນ­ລຸ​ການ​ເກັບ​ລາຍ​ຮັບ​ໝົດ​ປີ​ໃຫ້​ໄດ້ 100% ກອງ​ປະ­ຊຸມ​ໄດ້​ສຸມ​ໃສ່​ຄົ້ນ­ຄວ້າ​ປຶກ­ສາ​ຫາ­ລື​ດ້ານ​ວິ­ຊາ​ການ ເພື່ອ​ເປັນ​ເອ­ກະ​ພາບ​ໃນ​ການ​ກຳ­ນົດ​ມາດ​ຕະ­ການ​ຈັດ​ເກັບ​ລາຍ​ຮັບ​ໃຫ້​ມີ​ຄວາມ​ເປັນ​ເອ­ກະ​ພາບ ເປັນ­ຕົ້ນ ການ​ປະ­ຕິ­ບັດ​ສາ­ລະ­ບານ​ອັດ­ຕາ​ພາ­ສີ​ລະ­ບົບ​ເອ­ກະ​ພາບ ອັດ­ຕາ​ອາ­ກອນ​ຊົມ­ໃຊ້ ແລະ ອາ­ກອນ​ມູນ​ຄ່າ​ເພີ່ມ​ຂາ​ເຂົ້າ ປຶກ ສາ​ຫາ­ລື​ການ​ສ້າງ ແລະ ປັບ­ປຸງ​ນິ­ຕິ​ກຳ ເພື່ອ​ເປັນ​ບ່ອນ​ອີງ​ໃນ​ການ­ຈັດ­ຕັ້ງ​ປະ­ຕິ­ບັດ​ກະ­ກຽມ​ປັບ­ປຸງ​ກົດ­ໝາຍ​ວ່າ​ດ້ວຍ​ພາ­ສີ ປີ 2019 ປັບ­ປຸງ​ລະ­ບຽບ​ການ​ສັບ​ຊ້ອນ​ໝູ­ນວຽນ ແລະ ກຳ­ນົດ​ມາດ­ຕະ­ຖານ​ເງື່ອນ­ໄຂ​ຕຳ   ແໜ່ງ​ງານ​ຂອງ​ພະ­ນັກ­ງານ​ພາ­ສີ ແລະ ບັນ­ຫາ​ອື່ນໆ​ທີ່​ຕິດ​ພັນ​ກັບ​ວຽກ​ງານ​ຂະ­ແໜງ​ພາ­ສີ.

    ໂອ­ກາດ​ນີ້ ທ່ານ​ຮອງ​ນາ­ຍົກ ໄດ້​ໃຫ້​ທິດ​ຊີ້​ນຳ​ຂະ­ແໜງ​ພາ­ສີ​ຕ້ອງ​ໄດ້​ເອົາ­ໃຈ­ໃສ່​ເພີ່ມ​ທະ­ວີ​ສຶກ​ສາ​ອົບ­ຮົມ​ແນວ​ຄິດ-ການ­ເມືອງ ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ໃຫ້​ພະ­ນັກ­ງານ​ສະ­ມາ­ຊິກ​ພັກ​ໃນ​ຂົງ­ເຂດ​ພາ­ສີ​ນັບ​ແຕ່​ສູນ​ກາງ​ລົງ​ຮອດ​ທ້ອງ­ຖິ່ນ ສືບ­ຕໍ່​ເຝິກ­ອົບ­ຮົມ ແລະ ຍົກ​ລະ­ດັບ​ວິ­ຊາ​ສະ­ເພາະ​ຢ່າງ​ຕໍ່​ເນື່ອງ ຮີບ​ຮ້ອນ​ສຸມ​ໃສ່​ການ​ແກ້​ໄຂ​ປາ­ກົດ­ການ​ຫຍໍ້­ທໍ້​ຢ່າງ​ເຂັ້ມ​ງວດ ແລະ ເປັນ​ເຈົ້າ​ການ ເຮັດ​ໃຫ້​ການ­ເຄື່ອນ­ໄຫວ​ລວມ​ສູນ​ຕາມ​ສາຍ​ຕັ້ງ​ສອດ­ຄ່ອງ​ກັບ​ໂຄງ​ປະ­ກອບ​ການ­ຈັດ­ຕັ້ງ​ໃໝ່ ການ­ຈັດ­ຕັ້ງ​ປະ­ຕິ­ບັດ​ລະ­ບຽບ​ກົດ­ໝາຍ​ພາ­ສີ ລະ­ບຽບ​ກົດ­ໝາຍ ອື່ນໆ​ທີ່​ກ່ຽວ­ຂ້ອງ​ມີ​ຄວາມ​ເຂັ້ມ​ງວດ ແລະ ເປັນ​ເອ­ກະ​ພາບ​ກັນ​ໃນ​ທົ່ວ​ຂະ­ແໜງ​ພາ­ສີ.

    ດ້ານ​ລາຍ​ຮັບ ເພື່ອ​ບັນ­ລຸ​ຕາມ​ແຜນ­ການ​ທີ່​ວາງ​ໄວ້​ຂະ­ແໜງ​ພາ­ສີ​ຕ້ອງ​ໄດ້​ເຂັ້ມ​ງວດ​ກວດ­ກາ  ແລະ ເພີ່ມ​ທະ­ວີ​ວຽກ​ງານ​ຕ້ານ ແລະ ສະ­ກັດ​ກັ້ນ​ການ​ລັກ­ລອບ​ສິນ­ຄ້າ​ໜີ​ພາ­ສີ​ໃນ​ທຸກ​ຮູບ​ແບບ​ທັງ​ໃນ​ດ່ານ ແລະ ນອກ​ດ່ານ​ໃຫ້​ເຂັ້ມ­ແຂງ​ຕິດ­ຕາມ​ຄຸ້ມ​ຄອງ​ການ​ເຄື່ອນ​ຍ້າຍ​ພາຍ​ໃນ​ຕາມ​ກົດ­ໝາຍ ແລະ ລະ­ບຽບ​ການ​ກຳ­ນົດ​ໂດຍ​ສະ­ເພາະ ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ ການ​ນຳ​ເຂົ້າ​ພາ­ຫະ­ນະ ຊອກ​ທ່າ­ແຮງ​ທີ່​ບົ່ມ​ຊ້ອນ​ຂອງ​ຂະ­ແໜງ ພາ­ສີ ແລະ ອັດ​ຊ່ອງ​ຫວ່າງ​ການ​ຮົ່ວ​ໄຫຼ​ຂອງ​ລາຍ​ຮັບ​ທຸກ​ຢ່າງ.

    ສຳ­ລັບ​ວຽກ​ງານ​ຫັນ​ພາ­ສີ​ເປັນ​ທັນ​ສະ­ໄໝ​ສືບ­ຕໍ່​ປັບ­ປຸງ ແລະ ນຳ​ໃຊ້​ລະ­ບົບ ASYCUDA ໃຫ້​ສອດ ຄ່ອງ​ກັບ​ບັນ­ດາ​ຂັ້ນ​ຕອນ​ການ​ແຈ້ງ​ພາ­ສີ​ທີ່​ໄດ້​ປັບ­ປຸງ​ໃນ​ໄລ­ຍະ​ໃໝ່ ເຊື່ອມ​ໂຍງ​ລະ­ບົບ​ເຂົ້າ​ກັບ​ລະ­ບົບ​ຂອງ​ພາກ­ສ່ວນ​ກ່ຽວ­ຂ້ອງ​ທີ່​ຕິດ​ພັນ​ກັບ​ວຽກ​ພາ­ສີ ສືບ­ຕໍ່​ດຳ­ເນີນ​ໂຄງ­ການ Smart VAT ໄລ­ຍະ 2 ໃນ​ການ​ຈັດ​ເກັບ​ຄ່າ​ທຳ­ນຽມ​ຜ່ານ​ຕູ້​ເກັບ​ເງິນ​ອີ​ເລັກ​ໂຕຣ​ນິກ (KIOSK) ການ​ປັບ­ປຸງ ແລະ ພັດ­ທະ­ນາ​ເວັບ​ໄຊ​ຂອງ​ກົມ​ດຳ­ເນີນ​ການ​ໃຫ້​ສຳ­ເລັດ​ຕາມ​ຄາດ­ໝາຍ.

    ໂອ­ກາດ​ນີ້​ກົມ​ພາ­ສີ ຍັງ​ໄດ້​ປະ­ກອບ­ສ່ວນ​ມອບ​ເງິນ​ຊ່ວຍ­ເຫຼືອ 30 ລ້ານ​ກີບ​ໃຫ້​ແກ່​ຜູ້​ປະ­ສົບ​ໄພ​ນ້ຳ​ຖ້ວມ​ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື​ຕື່ມ​ອີກ.

ຂ່າວທີ່ກ່ຽວຂ້ອງ