ຂ່າວຫຼ້າສຸດ

ລາວ-ຫວຽດນາມ ຮ່ວມມືສະກັດກັ້ນ ແລະ ຕ້ານອາຊະຍາກຳ

216 02 ສ.ຫ. 2018 ຂ່າວໜ້າ​ໜຶ່ງ
ລາວ-ຫວຽດນາມ ຮ່ວມມືສະກັດກັ້ນ ແລະ ຕ້ານອາຊະຍາກຳ

    ກອງ​ປະ­ຊຸມ​ຮ່ວມ​ມື​ສະ­ກັດ​ກັ້ນ-ຕ້ານ​ອາ​ຊະ​ຍາ​ກຳ ແລະ ຮັກ­ສາ​ຄວາມ​ເປັນ​ລະ­ບຽບ​ຮຽບ​ຮ້ອຍ​ທາງ​ສັງ­ຄົມ ລະ­ຫວ່າງ ກົມ​ໃຫຍ່​ຕຳ­ຫຼວດ ກະ­ຊວງ​ປ້ອງ​ກັນ​ຄວາມ​ສະ­ຫງົບ​ລາວ ແລະ ກົມ​ໃຫຍ່​ຕຳ­ຫຼວດ ກະ­ຊວງ​ຕຳ­ຫຼວດ​ຫວຽດ­ນາມ ຄັ້ງ​ທີ IX ຈັດ​ຂຶ້ນ​ວັນ​ທີ 26 ກໍ­ລະ­ກົດ 2018 ຜ່ານ​ມາ ທີ່​ນະ­ຄອນ­ຫຼວງ​ຮ່າ​ໂນ້ຍ ຝ່າຍ​ລາວ​ນຳ​ໂດຍ ທ່ານ ພົ.ວ ທອງ​ເຫຼັກ ມັງ​ໜໍ່​ເມກ ຫົວ­ໜ້າ​ກົມ​ໃຫຍ່​ຕຳ­ຫຼວດ ແລະ ຝ່າຍ​ຫວຽດ­ນາມ​ນຳ​ໂດຍ​ທ່ານ ພົຕ ເຈີນ​ວັນ​ເວະ ຮັກ­ສາ​ການ​ຫົວ­ໜ້າ​ກົມ​ໃຫຍ່​ຕຳ­ຫຼວດ.

    ກອງ​ປະ­ຊຸມ​ຄັ້ງ​ນີ້ ສອງ​ຝ່າຍ​ໄດ້​ຕີ​ລາ­ຄາ​ຜົນ­ສຳ­ເລັດ​ການ​ຮ່ວມ​ມື​ໃນ​ໄລ­ຍະ​ຜ່ານ​ມາ ແລະ ວາງ​ທິດ​ທາງ​ໃນ­ຕໍ່­ໜ້າ ເຊິ່ງ​ໃນ 1 ປີ­ຜ່ານ­ມາ ເຫັນ​ວ່າ​ສອງ​ຝ່າຍ​ໄດ້​ຈັດ​ຕັ້ງ​ຜັນ​ຂະ­ຫຍາຍ​ບົດ​ບັນ­ທຶກ​ການ​ຮ່ວມ​ມື​ຄັ້ງ​ທີ່​ຜ່ານ​ມາ​ໄດ້​ເປັນ​ຢ່າງ​ດີ ເປັນ­ຕົ້ນ ແມ່ນ​ບັນ­ຫາ​ການ​ແລກ­ປ່ຽນ​ຂໍ້​ມູນ​ຂ່າວ­ສານ ຊ່ວຍ­ເຫຼືອ​ໃນ​ການ​ໄລ່​ຊອກ​ໄລ່​ຈັບ​ເປົ້າ​ໝາຍ​ທີ່​ກໍ່​ເຫດ​ຢູ່​ປະ­ເທດ​ໜຶ່ງ​ແລ້ວ​ເອົາ​ຕົວ​ຫຼົບ­ໜີ​ໄປ​ລີ່້​ຊ່ອນ​ຢູ່​ອີກ​ປະ­ເທດ​ໜຶ່ງ ການ​ຮ່ວມ​ມື​ສະ­ກັດ​ກັ້ນ ແລະ ແກ້​ໄຂ​ບັນ­ຫາ​ຢາ​ເສບ​ຕິດ ບັນ­ຫາ​ຂີ້­ລັກ​ງັດ​ແງະ ບັນ­ຫາ​ຄ້າ­ຂາຍ​ສິ່ງ​ຜິດ​ກົດ­ໝາຍ ບັນ­ຫາ​ຄ້າ​ມະ­ນຸດ ບັນ­ຫາ​ຄ້າ­ຂາຍ​ເຖື່ອນ​ທຸກ​ຮູບ​ແບບ ບັນ­ຫາ​ອາ​ຊະ​ຍາ​ກຳ​ຂ້າມ​ຊາດ​ດ້ານ​ຕ່າງໆ ການ​ບຳ­ລຸງ​ຍົກ​ລະ­ດັບ​ໃຫ້​ແກ່​ກຳ­ລັງ​ຕຳ­ຫຼວດ ການ​ຊ່ວຍ­ເຫຼືອ​ກັນ​ໃນ​ເວ­ທີ​ສາ­ກົນ​ອາ​ຊຽນ ແລະ ບັນ­ຫາ​ອື່ນໆ.

    ສຳ­ລັບ​ທິດ​ທາງ​ໃນ­ຕໍ່­ໜ້າ ສອງ​ຝ່າຍ​ເປັນ​ເອ­ກະ​ພາບ​ກັນ​ສືບ­ຕໍ່​ຮ່ວມ​ມື​ໃນ​ຫຼາຍ​ດ້ານ​ທີ່​ພົວ­ພັນ​ເຖິງ​ວຽກ​ງານ​ຕ້ານ​ອາ​ຊະ​ຍາ​ກຳ ຮັກ­ສາ​ຄວາມ​ເປັນ​ລະ­ບຽບ​ຮຽບ​ຮ້ອຍ​ໃນ​ສັງ­ຄົມ​ຂອງ​ສອງ​ປະ­ເທດ ເຊິ່ງ​ໄດ້​ລະ­ບຸ​ຢູ່​ໃນ​ບົດ​ສະ­ຫຼຸບ​ກອງ​ປະ­ຊຸມ​ຮ່ວມ​ສອງ​ຝ່າຍ ເພື່ອ​ເປັນ​ບ່ອນ​ອີງ​ໃນ​ການ­ຈັດ­ຕັ້ງ​ປະ­ຕິ­ບັດ​ໃຫ້​ມີ​ໝາກ​ຜົນ­ສຳ­ເລັດ​ນັບ​ມື້​ດີ​ຂຶ້ນ​ໄປ​ເລື້ອຍໆ.

    ໂອ­ກາດ​ດຽວ​ກັນ ທ່ານ ພົຕ ເຈີນ​ວັນ​ເວະ ໄດ້​ຕາງ­ໜ້າ​ໃຫ້​ຄະ­ນະ​ນຳ ລວມ​ທັງ​ນາຍ ແລະ ພົນ​ຕຳ ຫຼວດ​ກົມ​ໃຫຍ່​ຕຳ­ຫຼວດ​ຫວຽດ­ນາມ ມອບ​ເງິນ­ສົດ 100 ລ້ານ​ດົງ (ເງິນ​ຫວຽດ­ນາມ) ໃຫ້​ກົມ​ໃຫຍ່​ຕຳ­ຫຼວດ​ລາວ ເພື່ອ​ຊ່ວຍ­ເຫຼືອ​ປະ­ຊາ­ຊົນ​ທີ່​ປະ­ສົບ​ອຸ​ທົກ​ກະ​ໄພ​ຢູ່​ແຂວງ​ອັດ​ຕະ​ປື ຕາງ­ໜ້າ​ກ່າວ​ຮັບ​ໂດຍ​ທ່ານ ພົ.ວ ທອງ​ເຫຼັກ ມັງ​ໜໍ່​ເມກ.

ຂ່າວທີ່ກ່ຽວຂ້ອງ