ຂ່າວຫຼ້າສຸດ

ແດດ​ຮ້ອນ​ຢູ່​ໃນ​ຍີ່ປຸ່ນ ຍັງ​ບໍ່​ຢຸດຕິ

155 02 ສ.ຫ. 2018 ຂ່າວຕ່າງປະເທດ
ແດດ​ຮ້ອນ​ຢູ່​ໃນ​ຍີ່ປຸ່ນ ຍັງ​ບໍ່​ຢຸດຕິ

    ຕົວ​ເລກ​ຈາກ​ລັດຖະບານ​ຍີ່ປຸ່ນ ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 31 ກໍລະກົດ​ທີ່​ຜ່ານ​ມາ ໃຫ້​ຮູ້​ວ່າ ມີ​ຜູ້​ຕ້ອງ​ໄດ້​ນອນ​ໂຮງໝໍ 57.000 ກວ່າ​ຄົນ ພາຍ​ໃນ​ສາມ​ເດືອນ​ທີ່​ຜ່ານ​ມາ ຊຶ່ງ​ພົວພັນ​ເຖິງ​ສະພາບ​ແດດ​ຮ້ອນ​ເອົ້າ​ແກ່ຍາວ​ຢູ່​ໃນ​ຍີ່ປຸ່ນ ແລະ​ ຄາດ​ວ່າ​ຕົວ​ເລກ​ດັ່ງກ່າວ ຈະ​ເພີ່ມ​ຂຶ້ນ ສູ່​ລະດັບ​ສ້າງ​ສະຖິຕິ.

    ອົງການ​ຄຸ້ມ​ຄອງ​ອັກຄີ​ໄພ ແລະ​ໄພ​ທຳ​ມະ​ຊາດ (FDMA) ຂອງ​ຍີ່ປຸ່ນ ໃຫ້​ຮູ້​ວ່າ ນັບ​ແຕ່​ວັນ​ທີ 30 ເມສາ ຮອດ​ວັນ​ທີ 29 ກໍລະກົດ​ທີ່​ຜ່ານ​ມາ ມີ​ຜູ້​ຕ້ອງ​ໄດ້​ເຂົ້າ​ໂຮງໝໍ​ລວມ​ແລ້ວ 57.534 ຄົນ ຍ້ອນ​ເມົາ​ແດດ ແລະ​ໝົດ​ແຮງ​ຍ້ອນ​ແດດ​ຮ້ອນ​ເອົ້າ ໃນ​ນັ້ນ​ມີ​ຜູ້​ເສຍ​ຊີວິດ​ໄປ​ແລ້ວ 125 ຄົນ.

    ໃນ​ຂະນະ​ດຽວ​ກັນ ທ່ານ ລີ ນັກ-ຢອນ ນາຍົກລັດຖະມົນຕີ​ຂອງ ສ ເກົາຫຼີ ໄດ້​ຊີ້​ນຳ​ເມື່ອ​ວັນ​ທີ 31 ກໍລະກົດ​ທີ່​ຜ່ານ​ມາ ໃຫ້​ບັນດາ​ສຳນັກງານ​ອົງການ​ທີ່​ກ່ຽວຂ້ອງ ຢູ່​ໃນ​ລັດຖະບານ ມີ​ທິດ​ທາງ ເພື່ອ​ປ້ອງ​ກັນ​ຄວາມ​ເສຍ​ຫາຍ ທີ່​ເກີດ​ຈາກ​ແດດ​ຮ້ອນ​ອົບເອົ້າ​ແກ່ຍາວ​ຢູ່​ໃນ​ປະເທດ​ນີ້ ໃນ​ຫຼາຍ​ມື້​​ທີ່​ຜ່ານ​ມາ.

    ທ່ານ ລີ ໄດ້​ຊີ້​ນຳ​ໃຫ້​ກະຊວງ​ອຸດສາຫະກຳ ກະຊວງ​ການ​ຄ້າ ແລະ​ ກະຊວງ​ຊັບພະຍາກອນ ຂອງ ສ ເກົາຫຼີ ດຳເນີນ​ການ​ພິຈາລະນາ​ມາດ​ຕະການ ເພື່ອ​ຫຼຸດຜ່ອນ​ແບກ​ຫາບ​ອັນ​ໜັກໜ່ວງ ໃນ​ດ້ານ​ຄ່າ​ໄຟຟ້າ​ໃຫ້​ແກ່​ປະຊາຊົນ ທີ່​ເກີດ​ຈາກ​ການ​ໃຊ້​ອຸປະກອນ​ປັບ​ອາກາດ​ຫຼາຍ ໃນ​ສະພາບ​ອາກາດ ຮ້ອນ​ນັ້ນ. ທ່ານ ລີ ຍັງ​ໄດ້​ສະເໜີ​ໄປ​ຍັງ​ບັນດາ​ອົງການ​ທີ່​ກ່ຽວຂ້ອງ ໃຫ້​ຄວາມ​ຊ່ວຍເຫຼືອ ຂະແໜງການ​ກະສິກຳ ແລະ​ລ້ຽງສັດ ຊຶ່ງ​ເປັນ​ສອງ​ຂະແໜງການ ທີ່​ໄດ້​ຮັບ​ຄວາມ​ເສຍ​ຫາຍ ຍ້ອນ​ແດດ​ຮ້ອນ​ອົບເອົ້າ.

 

ຂ່າວທີ່ກ່ຽວຂ້ອງ