ຂ່າວຫຼ້າສຸດ

ມີ​ອີກ 12 ປະເທດ ບໍ່​ໄດ້​ຮັບ​ການ​ຍົກເວັ້ນ​ວີ​ຊາ​ເຂົ້າ​ໄປ​ໃນ​ເກາະ​ເຈ​ຊູ

147 02 ສ.ຫ. 2018 ຂ່າວຕ່າງປະເທດ
ມີ​ອີກ 12 ປະເທດ ບໍ່​ໄດ້​ຮັບ​ການ​ຍົກເວັ້ນ​ວີ​ຊາ​ເຂົ້າ​ໄປ​ໃນ​ເກາະ​ເຈ​ຊູ

    ວັນ​ທີ 31 ກໍລະກົດ​ທີ່​ຜ່ານ​ມາ ກະຊວງ​ຍຸຕິ​ທຳ​ຂອງ ສ ເກົາຫຼີ ໄດ້​ປະກາດ​ເພີ່ມ​ເຕີມ 12 ປະເທດ ທີ່​ບໍ່​ໄດ້​ຮັບ​ອະນຸຍາດ​ຍົກເວັ້ນ​ວີ​ຊາ​ເຂົ້າ​ໄປ​ໃນ​ເກາະ​ເຈ​ຊູ (Jeju) ຂອງ ສ ເກົາຫຼີ ເຮັດ​ໃຫ້​ຍອດ​ຈຳນວນ​ປະເທດ​ຢູ່​ໃນ​ນະໂຍບາຍ​ດັ່ງກ່າວ ເພີ່ມ​ຂຶ້ນ​ເປັນ 24 ປະເທດ ແລະ​ເຂດ​ແຄວ້ນ.

    ວີ​ທະ​ຍຸ​ກະຈາຍສຽງ ແລະ ໂທລະພາບ​ຂອງ ສ ເກົາຫຼີ ໃຫ້​ຮູ້​ວ່າ ພົນລະເມືອງ​ທີ່​ມາ​ຈາກ ເອ​ຢິບ ກຳ​ບີ ເຊ​ເນ​ການ ບັງ​ກລາ​ເດ​​ສ ກຽກ​ກິດ​ສະຖານ ປາ​ກິດ​ສະຖານ ໂຊ​ມາລີ ອູ​ສະ​ເບ​ກິດ​ສະຖານ ເນ​ປານ ກາ​ເມີ​ຣູນ ສີ​ລັງກາ ແລະ​ມຽນ​ມາ ຈະ​ຕ້ອງ​ໄດ້​ຂໍ​ວີ​ຊາ ຖ້າ​ຫາກ​ຢາກ​ເຂົ້າ​ໄປ​ໃນ​ເກາະ​ເຈ​ຊູ.

ການ​ຕົກລົງ​ດັ່ງກ່າວ ຈະ​ໄດ້​ຮັບ​ການ​ປະຕິບັດ ນັບ​ແຕ່​ວັນ​ທີ 1 ກັນຍາ​ໜ້າ​ນີ້​ເປັນຕົ້ນ​ໄປ ສຳລັບ​ພົນລະເມືອງ​ຂອງ​ເອ​ຢິບ ແລະ​ເລີ່ມ​ແຕ່​ວັນ​ທີ 1 ສິງຫາ​ນີ້​ເປັນຕົ້ນ​ໄປ ສຳລັບ​ພົນລະເມືອງ​ຈາກ 11 ປະເທດ​ທີ່​ຍັງ​ເຫຼືອ.

   ໃນ​ຂະນະ​ດຽວ​ກັນ ພົນລະເມືອງ​ຂອງ​ປະ​ເດ ແລະ ເຂດ​ແຄວ້ນ​ຕ່າງໆ​ຄື ເຢ​ແມນ ອີ​ຣານ ຊູ​ດານ ຊີ​ຣີ ສາທາລະນະ​ລັດ​ມາ​ເຊ​ດວນ ກູ​ບາ ອາ​ຟະ​ກາ​ນິດ​ສະຖານ ອີ​ຣັກ ກາ​ນາ ນີ​ເຊຣີ ໂກ​ໂຊ​ໂວ ແລະ​ປາ​ແລັດ​ສະ​ຕິນ ຍັງ​ຄົງ​ຕ້ອງ​ໄດ້​ຂໍ​ວີ​ຊາ ຈຶ່ງ​ສາມາດ​ເຂົ້າ​ໄປ​ໃນ​ເກາະ​ເຈ​ຊູ.

   ສ ເກົາຫຼີ ເລີ່ມ​ປະຕິບັດ​ນະໂຍບາຍ​ຍົກເວັ້ນ​ວີ​ຊາ ໃນ​ເວລາ​ທີ່​ເຂົ້າ​ໄປ​ໃນ​ເກາະ​ເຈ​ຊູ ມາ​ຕັ້ງແຕ່​ປີ 2001 ເພື່ອ​ດຶງ​ດູດ​ນັກ​ທ່ອງ​ທ່ຽວ​ຈາກ​ຕ່າງ​ປະ​ເດ ເຂົ້າ​ໄປ​ໃນ​ເກາະ​ດັ່ງກ່າວ ຊຶ່ງ​ນອນ​ຢູ່​ໃນ​ທິດໃຕ້ ສ ເກົາຫຼີ ນັ້ນ. ເຖິງ​ຢ່າງໃດ​ກໍ​ຕາມ ມາ​ໃນ​ປີ​ນີ້ ໄດ້​ເກີດ​ສະພາບ​ທີ່​ມີ​ພົນລະເມືອງ​ຈາກ​ບັນດາ​ປະເທດ ໃນ​ເຂດ​ຕາເວັນ​ອອກ​ກາງ ຫຼັ່ງໄຫຼ​ເຂົ້າ​ໄປ​ໃນ​ເກາະ​ເຈ​ຊູ ແລະ ຂໍ​ລີ້​ໄພ​ຢູ່​ໃນ ສ ເກົາຫຼີ ເຮັດ​ໃຫ້​ທາງ​ການ ສ ເກົາຫຼີ ຕ້ອງ​ໄດ້​ເປີດ​ກວ້າງ​ລາຍ​ຊື່​ບັນດາ​ປະເທດ ທີ່​ບໍ່​ໃຫ້​ເຂົ້າ​ໄປ​ໃນ​ເກາະ​ເຈ​ຊູ.

 

ຂ່າວທີ່ກ່ຽວຂ້ອງ