ຂ່າວຫຼ້າສຸດ

ຄ່າ​ເງິນ​ຣຽນ​ຂອງ​ອີ​ຣານ ຕົກຕ່ຳ

218 02 ສ.ຫ. 2018 ຂ່າວຕ່າງປະເທດ
ຄ່າ​ເງິນ​ຣຽນ​ຂອງ​ອີ​ຣານ ຕົກຕ່ຳ

     ເງິນ​ຣຽນ (rial) ທີ່​ເປັນ​ສະກຸນ​ເງິນ​ພາຍ​ໃນ​ປະເທດ​ຂອງ​ອີ​ຣານ ມີ​ອັດຕາ​ແລກປ່ຽນ ຢູ່​ທີ່​ລະດັບ​ຕ່ຳ​ສຸດ ໃນ​ວັນ​ທີ 31 ກໍລະກົດ​ທີ່​ຜ່ານ​ມາ ໂດຍ​ຢູ່​ທີ່​ລະດັບ 119.000 ຣຽນ/ໂດ​ລາ​ສະຫະລັດ ສູນ​ເສຍ​ຄ່າ​ໄປ​ເກືອບ 2/3 ນັບ​ແຕ່​ຕົ້ນ​ປີ​ນີ້​ເປັນຕົ້ນ​ມາ ຊຶ່ງ​ເປັນ​ຍ້ອນ​ໄດ້​ຮັບ​ຜົນ​ກະທົບ​ຈາກ ມາດ​ຕະການ​ປິດ​ລ້ອມ​ຂອງ ສ ອາ​ເມ​ຣິ​ກາ. ຄ່າ​ຂອງ​ເງິນ​ຣຽນ ສືບຕໍ່​ຕົກຕ່ຳ​ລົງ​ໃນ​ໄລຍະ​ມໍ່ໆ​ມາ​ນີ້​​ທ່າມກາງ​ທີ່​ອີ​ຣານ ພວມ​ຄອງ​ຄອຍ​ດ້ວຍ​ຄວາມ​ກັງວົນ ຕໍ່​ການ​ທີ່ ສ ອາ​ເມ​ຣິ​ກາ ຈະ​ກັບ​ໄປ​ສູ່​ການ​ປະຕິ​ບັດ​​ຄ​ຳ​ສັ່ງ​ປິດ​ລ້ອມ​ຢ່າງ​ເປັນ​ທາງ​ການ ໂດຍ​ມີ​ກຳນົດ​ເລີ່ມ​ແຕ່​ວັນ​ທີ 6 ສິງຫາ​ນີ້​ເປັນຕົ້ນ​ໄປ.

    ຄ່າ​ຂອງ​ເງິນ​ຣຽນ ຕົກຕ່ຳ​ລົງ​ສູ່​ລະດັບ 100.000 ຣຽນ/ໂດ​ລາ​ສະຫະລັດ ເປັນ​ເທື່ອ​ທຳ​ອິດ ໃນ​ວັນ​ທີ 29 ກໍລະກົດ​ທີ່​ຜ່ານ​ມາ ແລະ​ສືບຕໍ່​ຕົກຕ່ຳ​ລົງ ໂດຍ​ເສຍ​ຄ່າ​ໄປ 18% ພາຍ​ໃນ​ເວລາ​ພຽງ 2 ວັນ​ທີ່​ຜ່ານ​ມາ. ເມື່ອ​ວັນ​ທີ 1 ມັງກອນ 2018 ເງິນ​ຣຽນ​ມີຄ່າ​ແລກປ່ຽນ​ຢູ່​ທີ່ 42.900 ຣຽນ/ໂດ​ລາ ສະຫະລັດ.

    ເມື່ອ​ເດືອນ​ເມສາ​ທີ່​ຜ່ານ​ມາ ລັດຖະບານ​ອີ​ຣານ​ໄດ້​ພະຍາຍາມ​ກຳນົດ​ໃຫ້ ອັດຕາ​ແລກປ່ຽນ ເງິນ​ຣຽນ ໄວ້​ທີ່​ລະດັບ 42.000 ຣຽນ/ໂດ​ລາ​ສະຫະລັດ ແຕ່​ວ່າ​ອັດຕາ​ແລກປ່ຽນ​ຢູ່​ໃນ​ຕະຫຼາດ​ມືດ ໄດ້​ຖືກ​ທຳລາຍ ເມື່ອ​ປະຊາຊົນ​ຊຸກຍູ້​ການ​ແລກປ່ຽນ​ຊື້​ຂາຍ​ຢ່າງ​ຜິດ​ກົດໝາຍ ເພື່ອ​ປົກ​ປ້ອງ​ຄັງ​ເງິນ ຂອງ​ພວກ​ເຂົາ ໂດຍ​ຜ່ານ​ການ​ຈັດ​ຊື້​ເອົາ​ເງິນ​ໂດ​ລາ​ສະຫະລັດ​ເປັນ​ຈຳນວນ​ຫຼາຍ ຫຼື​ລົງທຶນ ດ້ວຍ​ຄວາມ​ຫວັງ​ວ່າ​ຄ່າ​ຂອງ​ເງິນ​ຣຽນ ຈະ​ສືບຕໍ່​ຕົກຕ່ຳ.

 

ຂ່າວທີ່ກ່ຽວຂ້ອງ