ສະພາ​ແຫ່ງ​ຊາດ​ກູ​ບາ ປະກາດ​ເອກະສານ​ຮ່າງ​ລັດ​ຖະ​ທຳ​ມະນູນ​ໃໝ່

141 02 ສ.ຫ. 2018 ຂ່າວຕ່າງປະເທດ
ສະພາ​ແຫ່ງ​ຊາດ​ກູ​ບາ ປະກາດ​ເອກະສານ​ຮ່າງ​ລັດ​ຖະ​ທຳ​ມະນູນ​ໃໝ່

    ວັນ​ທີ 31 ກໍລະກົດ​ທີ່​ຜ່ານ​ມາ ລະບົບ​ໄປສະນີ​ໃນ​ກູ​ບາ ໄດ້​ເລີ່ມ​ແຈກ​ຂາຍ​ເອກະສານ​ພິເສດ ຍາວ 32 ໜ້າ ທີ່​ໄດ້​ຈັດ​ພິມ​ຮ່າງ​ລັດ​ຖະ​ທຳ​ມະນູນ​ໃໝ່​ທັງ​ໝົດ ພ້ອມ​ກັນ​ນັ້ນ ປ່ອງ​ຂໍ້​ມູນ​ຂ່າວສານ​ທາງ​ການ​ຂອງ​ສະພາ​ແຫ່ງ​ຊາດ ແລະ​ເວບ​ໄຊ​ຂອງ​ອົງການ​ສື່ສານ​ແຫ່ງ​ລັດ ຕ່າງ​ກໍ​ລົງ​ພິມ​ເອກະສານ​ດັ່ງກ່າວ ຜ່ານ​ສື່​ເອ​ເລັກ​ໂຕຣ​ນິກ.

    ຄາດ​ວ່າ ເມື່ອ​ຮອດ​ວັນ​ທີ 3 ສິງຫາ ສາຂາ​ໄປສະນີ​ໃນ​ທົ່ວ​ປະເທດ​ກູ​ບາ ຈະ​ເລີ່ມ​ວາງ​ຂາຍ ເອກະສານ​ດັ່ງກ່າວ ໃນ​ລາຄາ​ສັນຍາ​ລັກ 1 ເປ​ໂຊ (ບໍ່​ເຖິງ 500 ກີບ). ນີ້​ເປັນ​ບາດກ້າວ​ກະກຽມ ໃຫ້​ແກ່​ຂະ​ບວນ​ການ​ທາບ​ທາມ​ຄວາມ​ເຫັນ​ຂອງ​ປະຊາຊົນ ຕາມ​ຕາຕະລາງ​ເວລາ ແມ່ນ​ດຳເນີນ​ໄປ ແຕ່​ວັນ​ທີ 13-15 ພະຈິກ​ໜ້າ​ນີ້.

    ຕໍ່​ຈາກ​ນັ້ນ ສະພາ​ແຫ່ງ​ຊາດ​ກູ​ບາ ຈະ​ຈັດ​ຕັ້ງ​ການ​ການ​ຢັ່ງ​ສຽງ​ປະຊາ​ມະຕິ ຊຶ່ງ​ຕາມ​ຂໍ້​ມູນ ເບື້ອງ​ຕົ້ນ ແມ່ນ​ອາດ​ຈະ​ມີ​ຂຶ້ນ​ໃນ​ເດືອນ​ກຸມພາ ປີ 2019 ແລະ​ຫຼັງ​ຈາກ​ນັ້ນ​ສະພາ​ແຫ່ງ​ຊາດ ກໍ​ຈະ​ປ່ອນ​ບັດ​ຮັບຮອງ​ເອກະສານ​ດັ່ງກ່າວ ຢູ່​ໃນ​ສະໄໝ​ປະຊຸມ ຊຶ່ງ​ຈັດ​ຂຶ້ນ​ຫຼັງ​ຈາກ​ການ​ຢັ່ງ​ສຽງ ປະຊາ​ມະຕິ.

    ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ປະກອບ​ມີ​ສ່ວນ​ຄຳ​ນຳ ແລະ 224 ມາດຕາ. ສ່ວນ​ລັດ ຖະ​ທຳ​ມະນູນ​ຂອງ​ກູ​ບາ ທີ່​ໃຊ້​ຢູ່​ໃນ​ປັດຈຸບັນ ແມ່ນ​ນຳ​ໃຊ້​ມາ​ຕັ້ງແຕ່​ປີ 1976 ແລະ​ໄດ້​ດັດແກ້ ເພີ່ມ​ເຕີມ ມາ​ແລ້ວ 2 ເທື່ອ ຕາມ​ລຳດັບ​ໃນ​ປີ 1992 ແລະ 2002.

    ເນື້ອ​ໃນ​ທີ່​ຖື​ວ່າ​ມີ​ຫຼາຍ​ຈຸດ​ໃໝ່​ທີ່​ສຳຄັນ​ທີ່​ສຸດ ຢູ່​ໃນ​ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ແມ່ນ​ພົວພັນ​ເຖິງ​ລະບົບ​ເສດຖະກິດ ໃນ​ນັ້ນ ນອກຈາກ​ຢືນຢັນ​ອີກ​ເທື່ອ​ໜຶ່ງ ເຖິງ​ບົດບາດ ອັນ​ເປັນ​ເຈົ້າ​ການ​ຂອງ​ເສດຖະກິດ​ແຫ່ງ​ລັດ​ແລ້ວ ກໍ​ຍັງ​ຮັບ​ຮູ້​ເຖິງ​ບົດບາດ​ຂອງ​ການ​ຕະຫຼາດ ແລະ​ສິດ​ຄອບ​ຄອງ​ຂອງ​ເອກະ​ຊົນ; ເປີດ​ກວ້າງ​ສິດທິ​ຕ່າງໆ​ຂອງ​ພົນລະເມືອງ ແລະ​ສິດທິ​ເສລີພາບ ເພື່ອ​ໃຫ້​ເໝາະ​ສົມ​ກັບ​ຍຸກ​ສະໄໝ ເຊັ່ນ​ສິດທິ​ສະເໝີພາບ​ໃນ​ການ​ແຕ່ງດອງ (ລວມ​ທັງ​ຄົນ​ທີ່​ເປັນ​ເພດ ດຽວ​ກັນ) ຫຼື​ສິດທິ​ໃນ​ການ​ໄດ້​ຮັບ​ການ​ສະໜອງ​ນ້ຳ​ສະອາດ​ຢ່າງ​ພຽງພໍ ສິດທິ​ໃນ​ການ​ມີ​ເຮືອນ​ຢູ່ ທີ່​ສົມຄວນ ການ​ດັດແກ້​ຂໍ້​ກຳນົດ​ກ່ຽວ​ກັບ​ສັນຊາດ; ແລະ​ລະບົບ​ການເມືອງ ໃນ​ນັ້ນ​ປະກອບ​ດ້ວຍ ບັນດາ​ຂໍ້​ກຳນົດ​ທີ່​ຈະແຈ້ງ​ກວ່າ​ເກົ່າ ກ່ຽວ​ກັບ​ການ​ກຳນົດ​ສິດທິ​ຂອງ​ອົງການ​ນິຕິບັນຍັດ ອົງການ​ປະຕິບັດ ກົດໝາຍ ແລະ ຍຸຕິ​ທຳ.

 

ຂ່າວທີ່ກ່ຽວຂ້ອງ