ຂ່າວຫຼ້າສຸດ

ນັກກີລາລາວ ຍາດໄດ້ຫຼຽນຄຳ ເທຄວັນໂດນາໆຊາດ ທີ່ ສ ເກົາຫຼີ

423 01 ສ.ຫ. 2018 ວົງຈອນກີລາ
ນັກກີລາລາວ ຍາດໄດ້ຫຼຽນຄຳ ເທຄວັນໂດນາໆຊາດ ທີ່ ສ ເກົາຫຼີ

   ຕາມ​ການ​ລາຍ​ງານ​ຂອງ ທ່ານ ກິມ​ຈົງ​ວູ ຫົວ­ໜ້າ​ຄູ​ເຝິກ​ນັກ­ກີ­ລາ​ເທ​ຄວັນ​ໂດ​ທີມ​ຊາດ​ລາວ ຊາວ ສ ເກົາ­ຫຼີ ແຈ້ງ​ໃຫ້​ຊາບ​ວ່າ: ເພື່ອ​ເປັນ​ການ​ທົດ​ສອບ​ຄວາມ​ພ້ອມ ຂອງ​ນັກ­ກີ­ລາ​ເທ​ຄວັນ​ໂດ​ທີມ​ຊາດ​ລາວ ປະ­ເພດ​ຟ້ອນ​ປຸ່ມ​ເຊ້ ຊຸດ​ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ ຄັ້ງ​ທີ 18 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ລະ­ຫວ່າງ​ວັນ​ທີ 18 ສິງ­ຫາ ຫາ 2 ກັນ­ຍາ 2018 ດັ່ງ­ນັ້ນ ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ລາວ ຈຶ່ງ​ໄດ້​ສົ່ງ​ນັກ­ກີ­ລາ​ປະ­ເພດ​ຟ້ອນ​ປຸ່ມ​ເຊ້​ຄວາມ​ຫວັງ​ຫຼຽນ​ຄຳ ເຂົ້າ​ຮ່ວມ​ແຂ່ງ­ຂັນ​ທົດ​ສອບ​ຄວາມ​ສາ­ມາດ ໃນ​ການ​ແຂ່ງ­ຂັນ​ເທ​ຄວັນ​ໂດ​ນາໆຊາດ ທີ່​ເມືອງ  ເຈ​ຈູ ສ ເກົາ­ຫຼີ ເປັນ​ເຈົ້າ­ພາບ.

   ສຳ­ລັບ​ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ເຂົ້າ​ຮ່ວມ 61 ປະ­ເທດ ສະ­ເພາະ​ປະ­ເພດ​ຟ້ອນ​ປຸ່ມ​ດ່ຽວ​ຍິງ-ຊາຍ ມີ​ນັກ­ກີ­ລາ​ເຂົ້າ​ຮ່ວມ 40 ກວ່າ​ຄົນ ໃນ​ນັ້ນ 2 ນັກ­ກີ­ລາ​ລາວ​ເຮົາ​ສາ­ມາດ​ຍາດ​ໄດ້ 1 ຫຼຽນ​ຄຳ ດ່ຽວ​ຍິງ ຈາກ ນາງ ກິ​ດາ​ວອນ ພິ­ລາ​ວົງ ທີ່​ຟ້ອນ​ໄດ້​ຄະ­ແນນ​ເທົ່າ​ກັນ​ກັບ​ນັກ­ກີ­ລາ​ຈາກ​ໄຕ້​ຫວັນ ສ່ວນ ຫູ​ຽນ​ທອງ ຮ່ວມ​ຕົກ​ເປັນ​ຂອງ ນັກ­ກີ­ລາ​ຈາກ ສປ ຈີນ ແລະ ນັກ­ກີ­ລາ​ຈາກ​ກາ​ນາ​ດາ ສ່ວນ​ຜົນ­ງານ​ນັກ­ກີ­ລາ​ລາວ​ອີກ​ຄົນ ສາ­ມາດ​ຍາດ​ຫຼຽນ​ທອງ​ມາ​ຄອງ ຈາກ​ທ້າວ ສຸກ​ທະ­ວີ ປັນ­ຍາ​ສິດ ປະ­ເພດ​ຟ້ອນ​ປຸ່ມ​ເຊ້ ດ່ຽວ​ຊາຍ.

   ນອກ­ຈາກ​ນັກ­ກີ­ລາ​ເທ​ຄວັນ​ໂດ​ທີມ​ຊາດ​ລາວ ໄດ້​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ດັ່ງ­ກ່າວ ທີ່ ສ ເກົາ­ຫຼີ ສະ­ຫະ­ພັນ​ເທ​ຄວັນ​ໂດ​ແຫ່ງ​ຊາດ​ລາວ ຍັງ​ໄດ້​ສົ່ງ​ນັກ­ກີ­ລາ​ທີມ ຊາດ​ລາວ ຈຳ­ນວນ​ໜຶ່ງ​ຊຸດ​ກຽມ​ຮ່ວມ ໃນ​ງານ​ກີ­ລາ​ເອ​ຊຽນ ເກມ ທີ່​ປະ­ເທດ​ອິນ​ໂດ​ເນ​ເຊຍ ໄປ​ເກັບ​ຕົວ​ເຝິກ­ຊ້ອມ​ຢູ່​ທີ່​ປະ­ເທດ​ໄທ ນອກ ຈາກ​ນີ້ ນັກ­ກີ­ລາ​ລາວ ຍັງ​ສາ­ມາດ​ຍາດ​ມາ​ໄດ້ 3 ຫຼຽນ​ຄຳ 4 ຫຼຽນ​ເງິນ ແລະ 1 ຫຼຽນ​ທອງ ໃນ​ການ​ແຂ່ງ­ຂັນ​ເທ​ຄວັນ​ໂດ ດາ​ນັງ ໂອ​ເພັນ ທີ່ ສສ ຫວຽດ­ນາມ ເປັນ​ເຈົ້າ­ພາບ ລະ­ຫວ່າງ​ວັນ​ທີ 28-29 ກໍ­ລະ­ກົດ ຜ່ານ​ມາ.

ຂ່າວທີ່ກ່ຽວຂ້ອງ