ຂ່າວຫຼ້າສຸດ

ດອກປີກໄກ່ ທົ່ວປະເທດ ຊີງຂັນປະທານສະພາແຫ່ງຊາດ ຈັດຂຶ້ນເຊົ້າມື້ນີ້

242 01 ສ.ຫ. 2018 ວົງຈອນກີລາ
ດອກປີກໄກ່ ທົ່ວປະເທດ ຊີງຂັນປະທານສະພາແຫ່ງຊາດ ຈັດຂຶ້ນເຊົ້າມື້ນີ້

    ການ​ແຂ່ງ­ຂັນ​ກີ­ລາ​ດອກ​ປີກ​ໄກ່ ທົ່ວ​ປະ­ເທດ ຮຸ່ນ​ເຍົາ­ວະ​ຊົນ-ຊາວ​ໜຸ່ມ​ທົ່ວ​ໄປ ຊີງ​ຂັນ​ປະ­ທານ​ສະ­ພາ​ແຫ່ງ​ຊາດ ປະ­ຈຳ​ປີ 2018 ຫຼື ລາຍ­ການ ເບຍ​ລາວ ໂອ​ເພັນ 2018 ເພື່ອ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ຍຶດ​ອຳ­ນາດ 23 ສິງ­ຫາ ຄົບ­ຮອບ 43 ປີ ຈະ​ເປີດ​ສາກ​ແຂ່ງ­ຂັນ​ຊີງ​ຫຼຽນ​ຄຳ​ປະ­ເພດ​ທີມ​ໃນ​ຕອນ​ເຊົ້າ​ມື້­ນີ້ (1 ສິງ­ຫາ) ທີ່​ສະ­ໂມ­ສອນ​ກີ­ລາ​ດອກ​ປີກ​ໄກ່ ບຶງ​ຂະ​ຫຍອງ (ເກົ່າ) ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ.

    ພ້ອມ​ກັນ​ນັ້ນ ກໍ່​ຍັງ​ເປັນ​ການ​ຫ້າງ​ຫາ​ກະ­ກຽມ​ຄວາມ​ພ້ອມ ໃຫ້​ແກ່​ບັນ­ດາ​ຄະ­ນະ​ກຳ­ມະ­ການ​ຈັດ­ການ​ແຂ່ງ­ຂັນ ກຳ­ມະ­ການ​ຕັດ­ສິນ ຄູ​ເຝິກ ແລະ ນັກ­ກີ­ລາ ໄດ້​ມີ​ຄວາມ​ພ້ອມ​ຮອບ­ດ້ານ ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ເກມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ ລະ­ຫວ່າງ​ວັນ​ທີ 11-21 ພະ­ຈິກ​ນີ້.

    ການ​ແຂ່ງ­ຂັນ​ລາຍ­ການ​ດັ່ງ­ກ່າວ ຈະ​ມີ​ນັກ­ກີ­ລາ​ດອກ​ປີກ​ໄກ່​ທົ່ວ​ປະ­ເທດ ເຂົ້າ​ຮ່ວມ 320 ກວ່າ​ຄົນ​ມາ​ຈາກ 27 ພາກ­ສ່ວນ ໃນ​ນັ້ນ ມີ 8 ແຂວງ ຈະ​ມີ​ການ​ແຂ່ງ­ຂັນ 12 ລາຍ­ການ ປະ­ກອບ​ມີ ປະ­ເພດ​ທີມ​ຊາຍ ສະ­ເພາະ​ລາຍ­ການ​ນີ້ ເປີດ​ກວ້າງ​ໃຫ້​ນັກ­ກີ­ລາ​ເຍົາ­ວະ​ຊົນ ແລະ ຊາວ​ໜຸ່ມ​ສາ­ມາດ​ສົ່ງ​ຮ່ວມ​ແຂ່ງ­ຂັນ​ໄດ້​ບໍ່​ຈຳ­ກັດ ສ່ວນ​ອີກ 11 ລາຍ­ການ ກໍ່​ແບ່ງ​ອອກ​ເປັນ 2 ຮຸ່ນ ຄື: ຮຸ່ນ​ທົ່ວ​ໄປ ມີ 5 ລາຍ­ການ ປະ­ກອບ​ມີ ດ່ຽວ​ຊາຍ ດ່ຽວ​ຍິງ ຄູ່​ຊາຍ ຄູ່​ຍິງ ແລະ ຄູ່​ປະ­ສົມ ສຳ­ລັບ​ປະ­ເພດ​ເຍົາ­ວະ​ຊົນ ຮຸ່ນ​ອາ­ຍຸ​ບໍ່​ເກີນ 14 ປີ ມີ 2 ລາຍ­ການ ຄື: ດ່ຽວ​ຊາຍ ແລະ ດ່ຽວ​ຍິງ ສ່ວນ​ອາ­ຍຸ​ບໍ່​ເກີນ 17 ປີ ມີ 4 ລາຍ­ການ ຄື: ດ່ຽວ​ຊາຍ ດ່ຽວ​ຍິງ ຄູ່​ຊາຍ ແລະ ຄູ່​ຍິງ.

ຂ່າວທີ່ກ່ຽວຂ້ອງ