ຂ່າວຫຼ້າສຸດ

ບໍລິຄຳໄຊ ຈະສົ່ງ 13 ປະເພດກີລາ ຮ່ວມ “ຊຽງຂວາງ ເກມ”

218 01 ສ.ຫ. 2018 ວົງຈອນກີລາ
ບໍລິຄຳໄຊ ຈະສົ່ງ 13 ປະເພດກີລາ ຮ່ວມ “ຊຽງຂວາງ ເກມ”

   ທ່ານ ບຸນ​ມາກ ພັນ​ດາ​ນຸ​ວົງ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ​ບໍ​ລິ​ຄຳ​ໄຊ ໃຫ້​ສຳ­ພາດ ເມື່ອ​ບໍ່​ດົນ​ມາ​ນີ້​ວ່າ: ສຳ­ລັບ​ການ​ຫ້າງ​ຫາ​ກະ­ກຽມ​ນັກ­ກີ­ລາ​ແຂວງ​ບໍ​ລິ​ຄຳ​ໄຊ ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ເກມ ນັ້ນ ແມ່ນ​ໄດ້​ມີ​ການ​ກະ­ກຽມ​ມາ​ເປັນ​ເວ­ລາ 1 ປີ​ປາຍ​ແລ້ວ ແລະ ເມື່ອ​ບໍ່​ດົນ​ມາ​ນີ້ ພວກ​ເຮົາ​ກໍ່​ໄດ້​ມີ​ການ​ຈັດ­ການ​ແຂ່ງ­ຂັນ​ກີ­ລາ​ທົ່ວ​ແຂວງ ຄັ້ງ​ທີ 4 ທີ່​ເມືອງ​ປາກ​ຊັນ ເປັນ​ເຈົ້າ­ພາບ ກໍ່​ສາ­ມາດ​ຄັດ​ເລືອກ​ນັກ­ກີ­ລາ​ທີ່​ມີ​ຄວາມ​ສາ­ມາດ ແລະ ພອນ​ສະ­ຫວັນ​ດີ­ເດັ່ນ​ຈຳ­ນວນ​ໜຶ່ງ.

   ຄຽງ​ຄູ່​ກັນ​ນັ້ນ ຍັງ​ຈະ​ໄດ້​ກວດ­ຄືນ ແລະ ພົວ­ພັນ​ກັບ​ການ­ຈັດ­ຕັ້ງ​ທີ່​ກ່ຽວ­ຂ້ອງ​ເອົາ​ຈຳ­ນວນ​ນັກ­ກີ­ລາ​ທີ່​ດີ­ເດັ່ນ​ຂອງ​ແຕ່​ລະ​ປະ­ເພດ ທີ່​ເປັນ​ນັກ­ກີ­ລາ​ຂອງ​ແຂວງ​ບໍ​ລິ​ຄຳ​ໄຊ ສົ່ງ​ໄປ​ຮຽນ​ຢູ່​ໂຮງ­ຮຽນ​ພອນ​ສະ­ຫວັນ​ກີ­ລາ-ກາ​ຍະ​ກຳ ວິ­ທະ­ຍາ ໄລ​ພະ­ລະ­ສຶກ­ສາ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ແລະ ສະ​ຖາ​ບັນ​ອື່ນໆ ນອກ​ນັ້ນ ກໍ່​ຈະ​ໄດ້​ເກັບ​ກຳ​ຂໍ້​ມູນ​ຈຳ­ນວນ​ນັກ­ກີ­ລາ​ແຕ່​ລະ​ປະ­ເພດ ເປັນ​ຕົວ​ແທນ​ຂອງ​ແຂວງ​ບໍ​ລິ​ຄຳ​ໄຊ​ທີ່​ຈະ​ເຂົ້າ​ຮ່ວມ​ແຂ່ງ­ຂັນ​ໃນ​ງານ​ດັ່ງ­ກ່າວ ພາຍ­ຫຼັງ​ໄດ້​ຮັບ​ແຈ້ງ​ການ​ຈາກ​ຫ້ອງ​ວ່າ­ການ​ປົກ­ຄອງ​ແຂວງ​ບໍ​ລິ​ຄຳ​ໄຊ ພາຍ​ໃຕ້​ການ​ເຫັນ​ດີ​ຂອງ​ຄະ­ນະ​ປະ­ຈຳ​ພັກ​ແຂວງ ຕາມ​ການ​ສະ­ເໜີ​ຂອງ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ກ່ຽວ​ກັບ​ການ​ສະ­ເໜີ​ປະ­ເພດ​ກີ­ລາ​ເຂົ້າ​ຮ່ວມ​ງານ​ດັ່ງ­ກ່າວ ແລະ ຂັ້ນ​ເທິງ​ຕົກ­ລົງ​ເຫັນ​ດີ ຈະ​ສົ່ງ 13 ປະ­ເພດ​ກີ­ລາ​ເຂົ້າ​ຮ່ວມ ຄື: ແລ່ນ-ລານ​ຍິງ-ຊາຍ ຊ່ວງ​ເຮືອ​ຊາຍ ໝາກ­ເສິກ​ຍິງ-ຊາຍ ເທ​ຄວັນ​ໂດ​ຍິງ-ຊາຍ ເປ​ຕັງ​ຍິງ-ຊາຍ ກະ­ຕໍ້​ຍິງ-ຊາຍ ໜ້າ​ເກັກ​ຍິງ-ຊາຍ ໝາກ​ຂ່າງ​ຍິງ-ຊາຍ ຢູ​ໂດ​ຍິງ-ຊາຍ ຄາ​ຣາ​ເຕ​ໂດ​ຍິງ-ຊາຍ ວູ​ຊູ​ຍິງ-ຊາຍ ມວຍ​ປ້ຳ​ຍິງ-ຊາຍ ແລະ ກ໊ອຟ​ຍິງ-ຊາຍ.

   ການ​ເຂົ້າ​ຮ່ວມ ຊຽງ​ຂວາງ ເກມ ໃນ​ທ້າຍ​ປີ​ນີ້ ແຂວງ​ບໍ​ລິ​ຄຳ​ໄຊ ຕັ້ງ​ເປົ້າ​ຈະ​ພະ­ຍາ­ຍາມ​ສູ້​ຊົນ​ສ້າງ​ຜົນ­ງານ​ບໍ່​ໃຫ້​ຫຼຸດ​ເກົ່າ ເພາະ​ໃນ​ງານ​ຄັ້ງ​ທີ 10 ທີ່​ແຂວງ​ອຸ­ດົມ​ໄຊ ເປັນ​ເຈົ້າ­ພາບ​ໃນ​ປີ 2014 ຜ່ານ​ມາ ພວກ​ເຮົາ​ຍາດ​ມາ​ໄດ້​ເຖິງ 17 ຫຼຽນ​ຄຳ 6 ຫຼຽນ​ເງິນ ແລະ 17 ຫຼຽນ​ທອງ ຈົບ​ອັນ​ດັບ​ທີ 7 ຂອງ​ຕາ­ຕະ­ລາງ ຈາກ 25 ພາກ­ສ່ວນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ