ຂ່າວຫຼ້າສຸດ

ເລັ່ງແກ້ໄຂຜົນກະທົບຈາກອຸທົກກະໄພ ຢູ່ແຂວງອັດຕະປື

333 01 ສ.ຫ. 2018 ຂ່າວໜ້າ​ໜຶ່ງ
ເລັ່ງແກ້ໄຂຜົນກະທົບຈາກອຸທົກກະໄພ ຢູ່ແຂວງອັດຕະປື

    ກອງ​ປະ­ຊຸມ​ຄະ­ນະ​ກຳ­ມະ­ການ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ຈັດ​ຂຶ້ນ​ວັນ​ທີ 31 ກໍ­ລະ­ກົດ 2018 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ມີ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ກອງ​ປະ­ຊຸມ​ທ່ານ​ຮອງ​ນາ­ຍົກ​ໄດ້​ຊີ້​ນຳ ແລະ ລົງ​ເລິກ ໃຫ້​ກົມ ສູນ ແລະ ພະ­ແນກ­ການ​ທີ່​ກ່ຽວ­ຂ້ອງ​ປະ­ສານ​ສົມ­ທົບ​ກັບ​ພາກ­ສ່ວນ​ທີ່​ກ່ຽວ­ຂ້ອງ ວາງ​ແຜນ​ແກ້​ໄຂ​ບັນ­ຫາ​ອຸ​ທົກ​ກະ​ໄພ ທີ່​ມີ​ຜົນ​ຕໍ່​ປະ ຊາ​ຊົນ ພ້ອມ​ຊ່ວຍ­ເຫຼືອ​ຜູ້​ທີ່​ຖືກ​ຜົນ​ກະ­ທົບ​ໃຫ້​ທົ່ວ​ເຖິງ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ເຂົາ­ເຈົ້າ​ໃຫ້​ເຂົ້າ​ສູ່​ຄວາມ​ເປັນ​ປົກ­ກະ­ຕິ ປະ​ເມີນ​ຜົນ​ເສຍ​ຫາຍ​ທີ່​ເກີດ​ຂຶ້ນ ວາງ​ແຜນ­ການ​ຊ່ວຍ­ເຫຼືອ​ບັນ­ເທົາ​ທຸກ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ແຈ້ງ​ຂ່າວ​ທຸກ​ສະ­ພາບ​ຄວາມ​ຄືບ​ໜ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ຂອງ​ພາກ­ສ່ວນ​ທີ່​ກ່ຽວ­ຂ້ອງ ຮັບ​ການ​ຊ່ວຍ­ເຫຼືອ​ທຸກ​ຮູບ​ແບບ ຄຸ້ມ​ຄອງ ແລະ ນຳ​ໃຊ້​ທຶນ​ຊ່ວຍ­ເຫຼືອ​ໄພ­ພິ­ບັດ ລະ­ບົບ​ການ­ແຈກ­ຢາຍ ແລະ ລະ­ບົບ​ຄຸ້ມ​ຄອງ​ເຄື່ອງ​ຊ່ວຍ­ເຫຼືອ​ໃຫ້​ຖືກ­ຕ້ອງ​ຕາມ​ລະ­ບຽບ​ການ ວາງ​ແຜນ​ພັດ­ທະ­ນາ​ໃນ​ເຂດ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ໃນ​ໄລ­ຍະ​ຍາວ ເພື່ອ​ໃຫ້​ປະ­ຊາ­ຊົນ​ມີ​ອາ­ຊີບ​ໝັ້ນ­ຄົງ​ຖາ­ວອນ ຊອກ​ຫາ​ສາ­ເຫດ​ທີ່​ພາ­ໃຫ້​ເກີດ​ອຸ­ບັດ​ຕິ​ເຫດ ເພື່ອ​ຊອກ​ຫາ​ວິ­ທີ​ແກ້​ໄຂ​ໄລ­ຍະ​ຍາວ ຄົ້ນ­ຄວ້າ​ປະ​ເມີນ​ທາງ​ດ້ານ​ການ​ອອກ​ແບບ ເຕັກ­ນິກ​ໃນ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ ເຂື່ອນ​ກັ້ນ​ນ້ຳ ແລະ ເສັ້ນ­ທາງ ຜົນ​ກະ­ທົບ​ທາງ​ດ້ານ​ສັງ­ຄົມ-ສິ່ງ­ແວ­ດລ້ອມ ສັງ​ລວມ​ເກັບ​ກຳ​ຂໍ້​ມູນ​ຄວາມ​ເສຍ​ເຫຍ ເພື່ອ​ລາຍ​ງານ​ໃຫ້​ຂັ້ນ​ເທິງ.

    ພ້ອມ​ນີ້ ກອງ​ປະ­ຊຸມ​ຍັງ​ໄດ້​ປັບ­ປຸງ​ໜ່ວຍ​ງານ​ປະ­ສານ​ງານ​ຂອງ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ​ຄືນ­ໃໝ່ ເພື່ອ​ເປັນ­ໃຈ​ກາງ​ໃນ​ການ​ປະ­ສານ​ສົມ­ທົບ​ກັບ​ທຸກ​ພາກ­ສ່ວນ​ທີ່​ກ່ຽວ­ຂ້ອງ​ທັງ​ສູນ​ກາງ ແລະ ທ້ອງ­ຖິ່ນ ເພື່ອ​ໃຫ້​ສາ­ມາດ​ຈັດ​ຕັ້ງ​ປະ­ຕິ­ບັດ​ວຽກ​ງານ​ໄດ້​ຢ່າງ​ມີ​ປະ​ສິດ­ທິ​ຜົນ​ຕື່ມ​ອີກ.

ຂ່າວທີ່ກ່ຽວຂ້ອງ