ຂ່າວຫຼ້າສຸດ

ຫຼາຍພາກສ່ວນສືບຕໍ່ຊ່ວຍເຫຼືອຜູ້ປະສົບໄພນ້ຳຖ້ວມ ທີ່ແຂວງອັດຕະປື

212 01 ສ.ຫ. 2018 ຂ່າວໜ້າ​ໜຶ່ງ
ຫຼາຍພາກສ່ວນສືບຕໍ່ຊ່ວຍເຫຼືອຜູ້ປະສົບໄພນ້ຳຖ້ວມ ທີ່ແຂວງອັດຕະປື

    ໃນ​ວັນ​ທີ 27 ກໍ­ລະ­ກົດ 2018 ທ່ານ ທອງ​ຜ່ານ ສະ­ຫວັນ​ເພັດ ຮອງ​ລັດ­ຖະ­ມົນ­ຕີ ກະ­ຊວງ​ການ​ຕ່າງ­ປະ­ເທດ ໄດ້​ຕາງ­ໜ້າ​ໃຫ້​ລັດ­ຖະ­ບານ ແລະ ປະ­ຊາ­ຊົນ​ລາວ ຮັບ​ເອົາ​ການ​ຊ່ວຍ­ເຫຼືອ​ເບື້ອງ​ຕົ້ນ​ຈາກ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ (UNDP) ເປັນ​ເງິນ­ສົດ ມູນ​ຄ່າ 100.000 ໂດ​ລາ​ສະ­ຫະ­ລັດ ຕາງ­ໜ້າ​ມອບ​ໂດຍ Mr. Balasubramaniam Murali ຮອງ​ຜູ້­ຕາງ­ໜ້າ​ອົງ­ການ UNDP ປະ­ຈຳ ສປປ ລາວ ທີ່​ກະ­ຊວງ​ການ​ຕ່າງ­ປະ­ເທດ ເພື່ອ​ຊ່ວຍ­ເຫຼືອ​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ທາງ​ທຳ​ມະ​ຊາດ ຢູ່ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື  ນອກ­ຈາກ​ນັ້ນ ອົງ­ການ UNDP ຍັງ​ໄດ້​ສະ­ແດງ​ຄວາມ​ຍິນ​ດີ​ທີ່​ຈະ​ຮ່ວມ​ມື​ກັບ​ອົງ­ການ​ເຄືອ​ຄ່າຍ​ຂອງ ສປຊ ເພື່ອ​ສືບ­ຕໍ່​ຊ່ວຍ­ເຫລືອ ແລະ ສະ­ໜັບ­ສະ­ໜູນ​ລັດ­ຖະ­ບານ ສປປ ລາວ ໃນ​ການ​ຟື້ນ​ຟູ​ຜົນ​ກະ­ທົບ​ຈາກ​ໄພ­ພິ­ບັດ ແລະ ການ​ພັດ­ທະ­ນາ​ປະ­ເທດ ທັງ​ໄລ­ຍະ​ສັ້ນ ແລະ ໄລ­ຍະ​ຍາວ.

    ໃນ​ວັນ​ດຽວ​ກັນ ທີ່​ທະ­ນາ­ຄານ​ແຫ່ງ ສປປ ລາວ (ທຫລ) ທ່ານ ຟາມ ກ໋ວກ ກົງ ຮອງ​ຜູ້­ອຳ­ນວຍ­ການ​ໃຫຍ່ ທະ­ນາ­ຄານ​ຮ່ວມ​ທຸ­ລະ​ກິດ ລາວ-ຫວຽດ ໂດຍ​ເປັນ​ຜູ້­ຕາງ­ໜ້າ​ໃຫ້​ທະ­ນາ­ຄານ​ແຫ່ງ​ລັດ​ຫວຽດ­ນາມ ມອບ​ເງິນ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ທີ່​ແຂວງ​ອັດ​ຕະ​ປື ເປັນ​ຈຳ­ນວນ​ເງິນ 841.500.000 ກີບ ຫຼື 100.000 ໂດ​ລາ​ສະ­ຫະ­ລັດ  ກ່າວ​ຮັບ​ໂດຍ​ທ່ານ ສອນ​ໄຊ ສິດ​ພະ​ໄຊ ຮອງ​ຜູ້​ວ່າ­ການ ທຫລ ເຊິ່ງ​ເງິນ​ຊ່ວຍ­ເຫຼືອ​ດັ່ງ­ກ່າວ​ເພື່ອ​ນຳ­ໄປ​ມອບ​ຕໍ່­ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ໃນ​ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ.

    ໃນ​ວັນ​ທີ 26 ກໍ­ລະ­ກົດ 2018 ຜ່ານ​ມາ ທະ­ນາ­ຄານ​ແຫ່ງ​ປະ­ເທດ​ໄທ ໄດ້​ມອບ​ເງິນ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ທີ່​ແຂວງ​ອັດ​ຕະ​ປື ເປັນ​ຈຳ­ນວນ​ເງິນ 194.919.000 ກີບ ຫຼື 755.500 ບາດ ໂດຍ​ການ​ໂອນ​ເຂົ້າ​ບັນ­ຊີ​ຂອງ​ຄັງ​ເງິນ​ແຫ່ງ​ຊາດ ແຫ່ງ ສປປ ລາວ ທະ­ນາ­ຄານ​ແຫ່ງ ສປປ ລາວ ຕາງ­ໜ້າ​ໃຫ້​ແກ່​ລັດ­ຖະ­ບານ​ແຫ່ງ ສປປ ລາວ ແລະ ຜູ້​ປະ­ສົບ​ໄພ​ນ້ຳ​ຖ້ວມ.

     ໃນ​ວັນ​ທີ 27 ກໍ­ລະ­ກົດ 2018 ຢູ່​ທີ່​ສຳ­ນັກ­ງານ​ອົງ­ການ​ປົກ­ຄອງ​ແຂວງ​ອັດ​ຕະ​ປື ທະ­ນາ­ຄານ​ຮ່ວມ​ພັດ­ທະ­ນາ ເຊິ່ງ​ນຳ​ໂດຍ ທ່ານ ວິ­ໄລ ສີ​ພະ​ພອນ ສະ­ມາ­ຊິກ​ສະ­ພາ​ບໍ­ລິ­ຫານ ທະ­ນາ­ຄານ​ຮ່ວມ​ພັດ­ທະ­ນາ ມີ​ເຂົ້າ­ສານ 10 ໂຕນ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ ລວມ​ມູນ​ຄ່າ 100 ລ້ານ​ກີບ ໃຫ້​ກຽດ​ຮັບ​ໂດຍ ທ່ານ ອຸ­ດົມ​ໄຊ ວົງ­ສາ​ລະ​ຊິດ ຮອງ​ຫົວ­ໜ້າ​ພະ­ແນກ­ການ​ຕ່າງ­ປະ­ເທດ ແຂວງ​ອັດ​ຕະ​ປື.

    ມູນ​ນິ­ທິ​ສະ​ວິດ​ລາວ ໂຣ​ສ​ບີ​ໂຕນ ໂປຣ​ເຈັກ ໄດ້​ນຳ​ເອົາ​ຢາ​ທິບ​ໂກ​ດາຍ ເຊິ່ງ​ເປັນ​ຢາ​ທາ​ຫໍ​ຫ້ຽນ​ກິນ​ຕີນ ແລະ ຜ້າ­ຫົ່ມ ມູນ​ຄ່າ​ທັງ​ໝົດ 205 ລ້ານ​ກີບ ມາ​ມອບ​ໃຫ້​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ໃນ​ວັນ​ທີ 30 ກໍ­ລະ­ກົດ 2018 ເພື່ອ​ໄປ​ຊ່ວຍ­ເຫຼືອ​ຜູ້​ປະ­ສົບ​ອຸ​ທົກ​ກະ​ໄພ​ນ້ຳ​ຖ້ວມ​ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື  ກ່າວ​ມອບ​ໂດຍ ທ່ານ​ນາງ ພົມ​ມະ​ດີ ເວດ​ສະ​ພົງ ຫົວ­ໜ້າ​ພະ​ແນກ​ເກີດ​ໃໝ່​ໂຮງ­ໝໍ​ແມ່ ແລະ ເດັກ ທັງ​ເປັນ​ຕົວ​ແທນ​ຂອງ​ການ​ຊ່ວຍ­ເຫຼືອ​ຂອງ​ມູນ​ນິ­ທິ​ສະ​ວິດ​ລາວ ໂຣ​ສ​ບີ​ໂຕນ ໂປຣ​ເຈັກ ແລະ ກ່າວ​ຮັບ​ໂດຍ​ທ່ານ​ນາງ ຄຳ​ຟອງ ພູມ​ວົງ​ໄຊ ຮອງ​ປະ­ທານ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ນອກ​ນັ້ນ ຍັງ​ມີ​ບໍ­ລິ­ສັດ Seongwoo construction.CO ມອບ​ໝີ່ 140 ແກັດ ມູນ​ຄ່າ 16 ລ້ານ​ກີບ ແລະ ອະ­ດີດ​ນັກ​ສຶກ​ສາ​ອົດ​ສະ​ຕຣາ​ລີ​ສົ່ງ­ເສີມ​ແມ່­ຍິງ ມອບ​ເງິນ 3,5 ລ້ານ​ກີບ.

ຂ່າວທີ່ກ່ຽວຂ້ອງ